ନୂଆଦିଲ୍ଲୀ: ଜମା ଏବଂ ଉଠାଣ କ୍ଷେତ୍ରରେ କିଛି ବ୍ୟାଙ୍କ ଗ୍ରାହକଙ୍କଠାରୁ ଚାର୍ଜ ଆଦାୟ କରିବେ। ରିପୋର୍ଟ ମୁତାବକ ବ୍ୟାଙ୍କ ଅଫ୍ ବରୋଦା ନିର୍ଦ୍ଧାରିତ ନେଣଦେଣଠାରୁ ଅଧିକ ଥର ନେଣଦେଣରେ ନଭେମ୍ବର ପହିଲାରୁ ଏଭଳି ନିୟମ ଲାଗୁ କରିଛି। ବ୍ୟାଙ୍କ ଅଫ୍ ଇଣ୍ଡିଆ, ପଞ୍ଜାବ ନ୍ୟାଶନାଲ ବ୍ୟାଙ୍କ, ଆକ୍ସିସ ବ୍ୟାଙ୍କ ଏବଂ ସେଣ୍ଟ୍ରାଲ ବ୍ୟାଙ୍କ ଏହି ନିୟମ ମଧ୍ୟ ସେମାନଙ୍କ ଗ୍ରାହକଙ୍କ କ୍ଷେତ୍ରରେ କାର୍ଯ୍ୟକାରୀ କରାଇବାକୁ ଯାଉଥିବା ରିପୋର୍ଟରେ ପ୍ରକାଶ ପାଇଛି। ଏହି ବ୍ୟାଙ୍କଗୁଡିକ କେବେ ସୁଦ୍ଧା ଏହାକୁ ଲାଗୁ କରାଉଛନ୍ତି ତାହା ଦେଖିବାକୁ ବାକି ରହିଛି। ବ୍ୟାଙ୍କଗୁଡିକର ଏଭଳି ପଦକ୍ଷେପ ଗ୍ରାହକଙ୍କୁ ପ୍ରଭାବିତ କରିବ। କାରଣ ଫ୍ରି ଟ୍ରାଞ୍ଜାକଶନ ବାଦ ଯଦି ଜଣେ ନେଣଦେଣ କରିବେ ତେବେ ତାଙ୍କୁ ଅଧିକ ଅର୍ଥ ଗଣିବାକୁ ପଡିବ।
କେନ୍ଦ୍ର ସରକାରଙ୍କ ଏଭଳି ନିଷ୍ପତ୍ତିକୁ କଂଗ୍ରେସ ପାର୍ଟି ପକ୍ଷରୁ ସମାଲୋଚନା କରାଯାଇଛି। ଏହି ରିପୋର୍ଟ ଆସିବା ପରେ କଂଗ୍ରେସର ଜେନେରାଲ ସେକ୍ରେଟାରି ରଣଦୀପ ସିଂ ସୁର୍ଜଓ୍ବୋଲା ସରକାରଙ୍କୁ ଟାର୍ଗେଟ କରିଛନ୍ତି। ସରକାରଙ୍କ ଏଭଳି ପଦକ୍ଷେପ ଲୋକଙ୍କ ପାଇଁ ‘କମର ତୋଡ ତୋଫା’ ବା ଜବରଦସ୍ତ ଉପହାର ବୋଲି ସେ ମତବ୍ୟକ୍ତ କରିଛନ୍ତି।
ସୂଚନାଯୋଗ୍ୟ, ମାସକୁ ୩ଥର ଉଠାଣ କ୍ଷେତ୍ରରେ ଲୋକଙ୍କୁ କୌଣସି ଚାର୍ଜ ଲାଗିବ ନାହିଁ। ମାତ୍ର ଫ୍ରି ଉଠାଣ ସୀମା ପରେ ଟ୍ରାଞ୍ଜାକଶନ ଚାର୍ଜ ଭାବେ ଫ୍ଲାଟ ୧୫୦ ଟଙ୍କା ଗଣିବାକୁ ପଡିବ। ସେହିଭଳି ମାସରେ ୩ଥର ଜମାକୁ ଫ୍ରି କରାଯାଇଛି। ଏହା ପରେ ଜମା କରିବା ଉପରେ ପ୍ରତି ଟ୍ରାଞ୍ଜାକଶନ ପିଛା ଗ୍ରାହକଙ୍କୁ ୪୦ ଟଙ୍କା ଦେବାକୁ ପଡିବ। ଲୋକମାନେ ନିଜ ଟଙ୍କାକୁ ଜମା କିମ୍ବା ଉଠାଣ କରିବା ଉପରେ ଚାର୍ଜ ଦେବାକୁ ପଡୁଥିବା ସୁର୍ଜଓ୍ବୋଲା ମତ ରଖିଛନ୍ତି।