ବାଣପୁର,୧୨।୫(ଡି.ଏନ.ଏ.): ଖୋର୍ଦ୍ଧା ଜିଲା ବାଣପୁର ଥାନା ଅନ୍ତର୍ଗତ ଭୀମପୁର ହରିଜନ ସାହି ଗାଁ ଦାଣ୍ଡରେ ବିଭତ୍ସ ହତ୍ୟା ଘଟଣାରେ ବାଣପୁର ପୋଲିସ ଶୁକ୍ରବାର ଜଣଙ୍କୁ ଗିରଫ କରିବା ସହ କୋର୍ଟ ଚାଲାଣ କରିଛି। ସୂଚନା ମୁତାବକ, ଗୁରୁବାର ବାଣପୁର ଭୀମପୁର ହରିଜନ ସାହିର ଦୁଇ ଭାଇ ରବିନ୍ଦ୍ର ନାଥ ନାୟକ ଓ ସାନ ଭାଇ ସୋମନାଥ ନାୟକ ନିଜ ଦାଣ୍ଡ ଦୁଆରେ ବସି କଥାବାର୍ତ୍ତା ହେଉଥିବା ବେଳେ ହଠାତ୍ ସେହି ଗ୍ରାମର ବସନ୍ତ ନାୟକ ଓରଫ କେଳୁ ଧାରୁଆ ଅସ୍ତ୍ରରେ ଦୁଇ ଭାଇଙ୍କୁ ମରଣାତ୍ମକ ଆକ୍ରମଣ କରିଥିଲେ। ଫଳରେ ଉଭୟ ଗୁରୁତର ଆହତ ହୋଇଥିଲେ। ଉଭୟଙ୍କୁ ଗୁରୁତର ଅବସ୍ଥାରେ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ବଡ ଭାଇ ରବିନ୍ଦ୍ର ନାଥ ନାୟକଙ୍କୁ ମୃତ ଘୋଷଣା କରିଥିଲେ। ଖବରପାଇ ବାଣପୁର ପୋଲିସ ଘଟଣାସ୍ଥଳରେ ପହଞ୍ଚି କେସ ନମ୍ବର ୧୭୯/୨୨ରେ ଏକ ହତ୍ୟା ମାମଲା ରୁଜୁ କରି ତଦନ୍ତ ଜାରି କରିଥିଲା। ଶୁକ୍ରବାର ଭୀମପୁର ହରିଜନ ସାହିର ଅଭିଯୁକ୍ତ ବସନ୍ତ ନାୟକ ଓରଫ କେଳୁ ନାୟକଙ୍କୁ ଗିରଫ କରିବା ସହିତ ତାଙ୍କ ବିରୋଧରେ ଆଇପିସି କେସ ନମ୍ବର ୧୪୭/୧୪୮/୩୪୧/୨୯୪/୩୨୩ / ୩୦୭/୩୦୨/୧୦୯/୧୪୯ରେ ମାମଲା ରୁଜୁ କରି ବାଣପୁର ଜେଏମଏଫସି କୋର୍ଟକୁ ପଠେଇ ଥିବାର ବାଣପୁର ଥାନାଧିକାରୀ ଜୟ ପ୍ରକାଶ ପରିଡା ସୂଚନା ଦେଇଛନ୍ତି।