ଭୁବନେଶ୍ୱର,୧୦।୬(ବ୍ୟୁରୋ): କଟକ ବାରବାଟୀ ଷ୍ଟାଡିୟମରେ ଆସନ୍ତା ୧୨ ତାରିଖରେ ହେବାକୁ ଥିବା ଭାରତ ଏବଂ ଦକ୍ଷିଣ ଆଫ୍ରିକା ଟି-୨୦ କ୍ରିକେଟ୍ ମ୍ୟାଚ୍ ପାଇଁ ସମସ୍ତ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି। ଉଭୟ ଦଳର ଖେଳାଳି ଶୁକ୍ରବାର ଅପରାହ୍ନ ପ୍ରାୟ ୧ଟା ୫୦ରେ ଭୁବନେଶ୍ୱରସ୍ଥିତ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚତ୍ବାର କାର୍ଯ୍ୟକ୍ରମ ରହିଛି। ତେଣୁ ରହଣିସ୍ଥଳ ଜୟଦେବ ବିହାରସ୍ଥିତ ମେ’ ଫେୟାର ହୋଟେଲକୁ ଖେଳାଳିଙ୍କୁ କିପରି ସୁରକ୍ଷାର ସହ ନିଆଯିବ ସେନେଇ କମିଶନରେଟ ପୋଲିସ ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଛି। ଏଥିପାଇଁ ଗୁରୁବାର ଅପରାହ୍ନରେ କମିଶନରେଟ ପୋଲିସ ପକ୍ଷରୁ ବିମାନ ବନ୍ଦରଠାରୁ ହୋଟେଲ ପର୍ଯ୍ୟନ୍ତ ମକ୍ଡ୍ରିଲ୍ କରାଯାଇଥିଲା। ମକ୍ଡ୍ରିଲ୍ ପୂର୍ବରୁ ପୂର୍ବାହ୍ନରେ ଡିସିପି ପ୍ରତୀକ ସିଂ ଓ ଅପରାହ୍ନରେ ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ଏୟାରପୋର୍ଟରୁ ବିମାନବନ୍ଦର ପର୍ଯ୍ୟନ୍ତ ସୁରକ୍ଷା ବ୍ୟବସ୍ଥା ଯାଞ୍ଚ କରିଥିଲେ। ଅପରାହ୍ନ ପ୍ରାୟ ୪ଟା ୩୦ରେ ପ୍ରଥମେ ଭାରତୀୟ ଦଳର ଦୁଇଟି ବସ୍କୁ ସୁରକ୍ଷା ବଳୟ ମଧ୍ୟରେ ଏୟାରପୋର୍ଟରୁ ହୋଟେଲ ପର୍ଯ୍ୟନ୍ତ ନିଆଯାଇଥିଲା। ଏହାପରେ ଦକ୍ଷିଣ ଆଫ୍ରିକା ଦଳର ଗୋଟିଏ ବସ୍କୁ ନିଆଯାଇଥିଲା। ବସ୍ର ଆଗରେ, ପଛରେ ଓ କଡ଼ରେ ଏକ୍ସକର୍ଟ ଭ୍ୟାନ ରହିଥିଲା। ଖେଳାଳି ଯିବା ସମୟରେ ରାସ୍ତାରେ କୌଣସି ଲୋକ କିମ୍ବା ଅନ୍ୟ ଗାଡ଼ି ରହିବ ନାହିଁ। ତେଣୁ ମକ୍ଡ୍ରିଲ୍ ସମୟରେ ମଧ୍ୟ ଗୁରୁବାର ରାସ୍ତା ଖାଲି କରାଯାଇ ସୁରକ୍ଷାର ସହ ଖେଳାଳିଙ୍କ ବସ୍କୁ ହୋଟେଲ ପର୍ଯ୍ୟନ୍ତ ନିଆଯାଇଥିଲା। ବସ୍ ଭିତରେ ସୁରକ୍ଷା ଦେବା ପାଇଁ ସାଦା ପୋଷାକରେ ପୋଲିସ ରହିବେ। ବସ୍ରେ ଯଦି କୌଣସି ଅସୁବିଧା ହେଲା ତେବେ ଅନ୍ୟ ସ୍ପେୟାର ଗାଡ଼ି ଦ୍ୱାରା ଖେଳାଳିଙ୍କୁ ବାରବାଟୀ ଷ୍ଟାଡିୟମ ନିଆଯିବ। ଅନ୍ୟପକ୍ଷରେ ହୋଟେଲରେ ମଧ୍ୟ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ମ୍ୟାଚ୍ର ଗୋଟିଏ ଦିନ ପୂର୍ବରୁ ଅର୍ଥାତ୍ ଶନିବାର ଉଭୟ ଟିମ୍ ଅଭ୍ୟାସ ପାଇଁ ବାରବାଟୀ ଷ୍ଟାଡିୟମ୍ ଯିବେ। ତେଣୁ ଖେଳାଳିମାନେ କିପରି ସୁରକ୍ଷାର ସହ ମେ’ଫେୟାର ହୋଟେଲ ଆସିବେ ଓ ଏହାପରେ ଅଭ୍ୟାସ ପାଇଁ ଷ୍ଟାଡିୟମ ଯିବେ, ପୁଣି ହୋଟେଲ ଫେରିବେ ଏବଂ ରବିବାର ମ୍ୟାଚ୍ ଖେଳିବା ସହ ପ୍ରତ୍ୟାବର୍ତ୍ତନ କରିବା ପର୍ଯ୍ୟନ୍ତ ସମସ୍ତ ସୁରକ୍ଷା ଓ ଅନ୍ୟାନ୍ୟ ବ୍ୟବସ୍ଥା କରାଯାଇଛି। ପୋଲିସ କମିଶନର କହିଛନ୍ତି, ଖେଳାଳିଙ୍କୁ ସୁରକ୍ଷା ଦେବା ଆମ କର୍ତ୍ତବ୍ୟ। ତେଣୁ କମିଶନରେଟ ପୋଲିସ ପକ୍ଷରୁ ଆବଶ୍ୟକ ସମସ୍ତ ବ୍ୟବସ୍ଥା କରାଯାଇଛି। ଶୁକ୍ରବାର କଟକରେ ମକ୍ଡ୍ରିଲ କରାଯିବାର ଯୋଜନା ରହିଛି ବୋଲି କମିଶନର କହିଛନ୍ତି।