ବରଗଡ଼, ୫ା୧(ପ୍ରେମାନନ୍ଦ ଖମାରୀ): କୃଷି ଓଡ଼ିଶା-୨୦୨୫ ଉତ୍ସବ ରବିବାର ଉଦଯାପିତ ହୋଇଛି। ଭୁବନେଶ୍ବରରେ ଆୟୋଜିତ ଏହି କାର୍ଯ୍ୟକ୍ରମରେ ବରଗଡ଼ ଜିଲା ପ୍ରଥମ ସ୍ଥାନ ଅଧିକାର କରିଛି। ସର୍ବୋକୃଷ୍ଟ ଆତ୍ମା ଭାବେ ବରଗଡ଼ ସାରା ରାଜ୍ୟରେ ସମ୍ମାନିତ ହୋଇଛି।
କୃଷି ଓଡ଼ିଶା-୨୦୨୫ରେ ବରଗଡ଼ ଜିଲା କୃଷି ବିଭାଗ ବିଶ୍ବପ୍ରସିଦ୍ଧ ଧନୁଯାତ୍ରାର ମୁଖ୍ୟ ଆକର୍ଷକ ମହାରାଜ କଂସଙ୍କର ଆଦେଶ ମୁତାବକ ସମନ୍ୱିତ ଚାଷ ପଦ୍ଧତି ଆପଣାଇବା ପାଇଁ ସାରା ରାଜ୍ୟବାସୀଙ୍କୁ ବାର୍ତ୍ତା ପ୍ରଦାନ କରିବା ସହିତ ମା’ ସମଲଶ୍ବରୀଙ୍କ ଧବଳମୁଖୀ ବେଶକୁ ବରଗଡ଼ରୁ ଉତ୍ପାଦିତ ଉତ୍କୃଷ୍ଟ ତୁଳାରେ ସଜାଇ ଦର୍ଶକ ମାନକ ପାଇଁ ଏକ ଆକର୍ଷଣର କେନ୍ଦ୍ର ବିନ୍ଦୁ ସଜାଇ ପାରିଥିଲା।
ଓଡ଼ିଶାର ଭାତ ହାଣ୍ଡି ବରଗଡ଼ର ଷ୍ଟଲରେ ୩୫୦ କିସମ ଦେଶୀ ଧାନ ବିହନ, କଳା ଧାନ ଓ ଦେଶୀ ମାଣ୍ଡିଆ ବିହନ ଦର୍ଶକକୁ ବେଶ ଆକର୍ଷଣ କରିପାରିଥିଲା ଏବଂ ଏଥିପାଇଁ ପ୍ରଥମ ସ୍ଥାନ ଅଧିକାର କରିଥିଲା। ଉପ ମୁଖ୍ୟମନ୍ତ୍ରୀ ତଥା କୃଷିମନ୍ତ୍ରୀ କନକ ବର୍ଦ୍ଧନ ସିଂଦେଓଙ୍କଠାରୁ ବରଗଡ଼ ମୁଖ୍ୟ ଜିଲା କୃଷି ଅଧିକାରୀ ପ୍ରସନ୍ନ କୁମାର ମିଶ୍ର ସମ୍ମାନ ଗ୍ରହଣ କରିଥିଲେ।
