ଦିଗପହଣ୍ଡି,୨୧।୩(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବନାଞ୍ଚଳ ନୂଆପଡ଼ା ସେକ୍ସନ ବାରିହାକଟା ଗ୍ରାମ ନିକଟ ଗାଇଡା ସଂରକ୍ଷିତ ଜଙ୍ଗଲରୁ ଶୁକ୍ରବାର ସକାଳ ପ୍ରାୟ ସାଢ଼େ ୧୨ ଟାରେ ଏକ ଗୁଳିବିଦ୍ଧ ବାରହାର ମୃତଦେହକୁ ବନବିଭାଗ କର୍ମଚାରୀ ଜବତ କରିଛନ୍ତି। ବାରହା ଶିକାରରେ ସମ୍ପୃକ୍ତ ଅନ୍ୟ ୨ ଜଣ ଶିକାରି ଦୌଡ଼ି ପଳାଇଥିବାବେଳେ ଜଣେ ଶିକାରିଙ୍କୁ ଗିରଫ କରାଯାଇଛି। ଗିରଫ ଅଭିଯୁକ୍ତ ଜଣକ ହେଲେ ଦିଗପହଣ୍ଡି ବ୍ଲକ ବୋମକେଇ ଗ୍ରାମର ସିମାଞ୍ଚଳ ପ୍ରଧାନ। ବାରହା ଶିକାରରେ ବ୍ୟବହୃତ ଦେଶୀ ବନ୍ଧୁକ,ଲୁହା ତେଣ୍ଟା,ଫାସ ଯୁକ୍ତ କ୍ଳଚ ୱାଇର, ମୋବାଇଲ ଫୋନ ତାଙ୍କ ନିକଟରୁ ଜବତ କରାଯାଇଛି।
ରାତି ପ୍ରାୟ ସାଢ଼େ ୮ ଟାରେ ତାଙ୍କୁ କୋର୍ଟ ଚାଲାଣ କରାଯିବା ପରେ ବନ ବିଭାଗ ମାମଲା ନଂ.୧୯୭/୨୪-୨୫ ଅନୁଯାୟୀ ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି। ନୂଆପଡ଼ା ବନ ବିଭାଗ ସେକ୍ସନ ଫରେଷ୍ଟର ଇଶ୍ୱା. ଗଣେଶ ଖବର ପାଇ ସଦଳବଳେ ଜଙ୍ଗଲରେ ପହଞ୍ଚିଥିଲେ। ସେମାନେ ପହଞ୍ଚିବା ବେଳେ ୨ ଶିକାରି ସେଠାରୁ କୌଶଳକ୍ରମେ ଦୌଡ଼ି ପଳାଇଥିବା ବେଳେ ସିମାଞ୍ଚଳ ଙ୍କୁ ମାଡ଼ି ବସିଥିଲେ। ତାଙ୍କ ନିକଟରୁ ଦେଶୀ ବନ୍ଧୁକ, ମୃତ ବାରହା,ଫାସ ସାମଗ୍ରୀକୁ ଜବତ କରି ରେଞ୍ଜର ଦିବ୍ୟ ରଞ୍ଜନ ସାହୁଙ୍କୁ ଖବର ଦେଇଥିଲେ। ରେଞ୍ଜର ଘଟଣାସ୍ଥଳରେ ପହଞ୍ଚି ସରଜମିନ ତଦନ୍ତ କରି ଫେରିଥିଲେ। ମୃତ ବାରହାଟି ମାଇ ପ୍ରଜାତିର। ତାକୁ ଦିଗପହଣ୍ଡି ପ୍ରାଣୀ ଚିକିତ୍ସାଳୟରେ ବ୍ୟବଚ୍ଛେଦ କରାଯିବା ପରେ ପୋତି ଦିଆଯାଇଛି। ବାରହା ଶିକାରରେ ସମ୍ପୃକ୍ତ ଅନ୍ୟ ୨ ଅଭିଯୁକ୍ତଙ୍କୁ ଚିହ୍ନଟ କରାଯାଇଛି । ଖୁବ ଶୀଘ୍ର ସେମାନଙ୍କୁ ଗିରଫ କରାଯିବ ବୋଲି ରେଞ୍ଜର ଜଣାଇଛନ୍ତି।
ସୂଚନା ଯୋଗ୍ୟ ଯେ, ଗତ କିଛିବର୍ଷ ହେଲା ଦିଗପହଣ୍ଡି ବନାଞ୍ଚଳ ଅଧିନ ବିଭିନ୍ନ ସଂରକ୍ଷିତ ଜଙ୍ଗଲରେ ଅବାଧ ବନ୍ୟଜନ୍ତୁ ଶିକାର ଚାଲିଛି। ଶିକାରି ମାନେ ଯୋଜନାବଦ୍ଧ ଭାବେ ଅନାୟସରେ ଶିକାର କରୁଥିବା ବେଳେ ବନବିଭାଗ କର୍ମଚାରୀଙ୍କ ଏଥିପ୍ରତି ଧ୍ୟାନ ନଥିବା ସ୍ଥାନୀୟ ଅଞ୍ଚଳବାସୀ ଅଭିଯୋଗ କରିଛନ୍ତି।
