ଲକ୍ଷ୍ନୌ,୨୧।୩: ଉତ୍ତରପ୍ରଦେଶର ବରେଲି ଜିଲାରେ ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି। ଭାଜପାକୁ ଭୋଟ ଦେବାରୁ ତାଙ୍କ ସ୍ବାମୀ ଘରୁ ତଡି ଦେଇଥିବା ଜଣେ ମହିଳା ଅଭିଯୋଗ କରିଛନ୍ତି। ଏପରିକି ଛାଡପତ୍ର ଦେବାର ଧମକ ମଧ୍ୟ ଦେଇଛନ୍ତି। ପୋଲିସ ଏନେଇ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ସୂଚନାନୁସାରେ, ଗୌନ୍ତିଆର ଏଜାଜନଗର ନିବାସୀ ତସଲିମ୍ ଅନସାରୀ ତାଙ୍କ ସ୍ତ୍ରୀ ଉଜମାଙ୍କୁ ଘରୁ ତଡି ଦେଇଛନ୍ତି। ଜାନୁୟାରୀ ୨୦୨୧ରେ ଉଭୟଙ୍କ ବିବାହ ହୋଇଥିଲା। ଦୁହେଁ ଏକ ଭଡା ଘରେ ରହୁଥିଲେ। ଗତ ଫେବୃୟାରୀ ୧୨ରେ, ତସଲିମ୍ଙ୍କ ମାମୁଁ ତୈଏବ ତାଙ୍କ ଘରକୁ ଆସି ସମାଜବାଦୀ ପାର୍ଟିକୁ ଭୋଟ ଦେବାକୁ କହିଥିଲେ। ଫେବୃୟାରୀ ୧୪ରେ ଭୋଟ ଦେବା ପରେ ତୈଏବ ତସଲିମ୍ଙ୍କ ଘରେ ପହଞ୍ଚିଥିଲେ। କାହାକୁ ଭୋଟ ଦେଇଛ ବୋଲି ପଚାରିବାରୁ ଉଜମା କହିଥିଲେ, ତିନି ତଲାକ ଆଇନ ତିଆରି କରିବା ଏବଂ ଗରିବ ଲୋକଙ୍କୁ ରାସନ ଦେବା କାରଣରୁ ସେ ଭାଜପାକୁ ଭୋଟ ଦେଇଛନ୍ତି। ଏଥିରେ ରାଗିଯାଇ ସ୍ତ୍ରୀଙ୍କୁ ଛାଡପତ୍ର ଦେବାକୁ ତସଲିମ୍ଙ୍କୁ ତାଙ୍କ ମାମୁଁ କହିଥିଲେ।
ମାର୍ଚ୍ଚ ୧୧ରେ ଉଜମାଙ୍କୁ ଘରୁ ତଡି ଦିଆଯାଇଥିଲା। ଯଦି ସେ ପୋଲିସ ନିକଟରେ ଅଭିଯୋଗ କରନ୍ତି ତେବେ ଛାଡପତ୍ର ଦେବା ସହିତ ତାଙ୍କ ଭାଇଙ୍କୁ ମଧ୍ୟ ହତ୍ୟା କରାଯିବ ବୋଲି ତାଙ୍କୁ ଧମକ ଦିଆଯାଇଛି।