ନୂଆରୂପ ନେବ ବରଗଡ଼ ବସ୍‌ଷ୍ଟାଣ୍ଡ, ବଦଳିବ ଠିକଣା

ବରଗଡ଼,୩।୨(ପ୍ରେମାନନ୍ଦ ଖମାରୀ): ବରଗଡ଼ ସରକାରୀ ବସଷ୍ଟାଣ୍ଡ ତାର ଅସ୍ତିତ୍ୱ ହଜାଇ ବସିଛି। ଏଠାରେ ରହିଥିବା ବିଭିନ୍ନ ସମସ୍ୟା ଅସମାହିତ ହୋଇ ରହିଯାଇଛି। କେତେବେଳେ ପାନୀୟଜଳ ସଙ୍କଟ ତ ଆଉକେବେ ବସଷ୍ଟାଣ୍ଡରେ ବର୍ଷାଜଳ ଲହଡ଼ି ମାରୁଛି। ସେହିପରି ବିଭିନ୍ନ ସମୟରେ ବସଷ୍ଟାଣ୍ଡ ପରିସରରେ ରହିଥିବା ଶୌଚାଳୟରେ ମାସମାସ ଧରି ତାଲା ଝୁଲିବାର ନଜିର ରହିଥିବାବେଳେ ପରିମଳ ବ୍ୟବସ୍ଥା ଏଠାରେ ଭୁଷୁଡ଼ି ପଡ଼ିଛି। ଏଥିପାଇଁ ସର୍ବପୁରାତନ ଏହି ବସଷ୍ଟାଣ୍ଡ୍‌ରେ ମୌଳିକ ସୁବିଧା ସୁଯୋଗରୁ ବଞ୍ଚିତ ହୋଇ ଯାତ୍ରୀମାନଙ୍କୁ ବହୁ ଅସୁବିଧା ଭୋଗିବାକୁ ପଡୁଛି। ତେଣୁ ନୂଆ ସରକାର ସରକାରୀ ବସଷ୍ଟାଣ୍ଡକୁ ନୂତନ ରୂପରେଖ ଦେବାକୁ ଯୋଜନା କରୁଛନ୍ତି। ସରକାରୀ ବସଷ୍ଟାଣ୍ଡକୁ ଘରୋଇ ବସଷ୍ଟାଣ୍ଡ୍‌ ପାଖକୁ ଉଠାଇ ନେବା ଏବଂ ଉଭୟ ସରକାରୀ, ଘରୋଇ ବସଷ୍ଟାଣ୍ଡକୁ ଏକ ଆଦର୍ଶ ବସଷ୍ଟାଣ୍ଡଭାବେ ଗଢ଼ି ତୋଳିବା ପାଇଁ ପ୍ରକ୍ରିୟା ଆରମ୍ଭ ହୋଇଯାଇଛି। ଏଥିପାଇଁ ବରଗଡ଼ ବିଧାୟକ ଅଶ୍ୱିନୀ କୁମାର ଷଡ଼ଙ୍ଗୀ ବିଭାଗୀୟ ଅଧିକାରୀଙ୍କ ସହିତ ପ୍ରସ୍ତାବିତ ଜାଗା ପରିଦର୍ଶନ କରିଛନ୍ତି। ସରକାରଙ୍କ ପାଖରେ ଏହି ଦାବି ପୂର୍ବରୁ ସେ ରଖି ଆସିଛନ୍ତି ଏବଂ ସହରବାସୀ ଓ ଯାତ୍ରୀମାନଙ୍କ ସୁବିଧାକୁ ଦୃଷ୍ଟିରେ ରଖି ସେଭଳି ପଦକ୍ଷେପ ନିଆଯାଉଥିବା ବିଧାୟକ କହିଛନ୍ତି।
ଅନ୍ୟପଟେ ବର୍ତ୍ତମାନ ସହର ମଧ୍ୟରେ ରହିଥିବା ସରକାରୀ ବସଷ୍ଟାଣ୍ଡ୍‌ ସ୍ଥାନାନ୍ତରଣ ହେଲେ ସେଠାରେ ବୃହତ୍‌ ମୁକ୍ତାକାଶ ଧନୁଯାତ୍ରା ମଞ୍ଚ, ରାଜମହଲ ନିର୍ମାଣର ପରିକଳ୍ପନା କରାଯାଇଥିବା ସାଧାରଣରେ ଆଲୋଚନା ହେଉଛି। ଧନୁଯାତ୍ରା ମହୋତ୍ସବରେ ଦର୍ଶକଙ୍କ ଗହଳି ଦୃଷ୍ଟିରୁ ମଞ୍ଚ ସମ୍ମୁଖ ପର୍ଯ୍ୟାପ୍ତ ହେଉ ନାହିଁ। ସେହିପରି ନୂଆ ସରକାର ଏଥର ଧନୁଯାତ୍ରା ମହୋତ୍ସବକୁ ବିଗତବର୍ଷ ଅପେକ୍ଷା ଅଧିକ ଗୁରୁତ୍ୱ ଦେବା ସହିତ ଧନୁଯାତ୍ରା ଅନୁଦାନ ରାଶି କୋଟିଏ ଟଙ୍କାକୁ ବୃଦ୍ଧି କରିବା ସହିତ ମହୋତ୍ସବରେ ନୂତନତା ଆଣିଛି। ଏହି ଦୃଷ୍ଟିରୁ ସରକାରୀ ବସଷ୍ଟାଣ୍ଡକୁ ଘରୋଇ ବସଷ୍ଟାଣ୍ଡ ନିକଟକୁ ସ୍ଥାନାନ୍ତରଣ ପଦକ୍ଷେପକୁ ବିଭିନ୍ନ ମହଲରେ ସ୍ବାଗତ ମଧ୍ୟ କରାଯାଉଛି। ବରଗଡ଼ ସରକାରୀ ବସଷ୍ଟାଣ୍ଡ୍‌ ୧୯୫୨ରେ ପ୍ରତିଷ୍ଠା ହୋଇଥିଲା। ଉକ୍ତ ବସଷ୍ଟାଣ୍ଡରୁ ବର୍ତ୍ତମାନ ୭ଟି ରୁଟ୍‌ ସମ୍ବଲପୁର, ଗୋଲାମୁଣ୍ଡା, ନବରଙ୍ଗପୁର, କଟକ, ବ୍ରହ୍ମପୁର, ସୁନାବେଡ଼ା, ମାଲକାନଗିରିକୁ ଓଏସଆରଟିସିର ସମୁଦାୟ ୧୩ ଯାତ୍ରୀବାହୀ ବସ ଯତାୟାତ କରୁଛି। ମାଲକାନଗିରି, ବ୍ରହ୍ମପୁର ଓ କଟକକୁ ନାଇଟ୍‌ ବସ୍‌ ଯାଉଥିବାବେଳେ ଏହି ବସଷ୍ଟାଣ୍ଡ୍‌ ଦେଇ ପୁରୀକୁ ୨ଟି ଭଲଭୋ ବସ୍‌ ଯାତାୟାତ କରୁଛି। ସେହିପରି ବରଗଡ଼-ସମ୍ବଲପୁର ମଧ୍ୟରେ ନିୟମିତ ବ୍ୟବଧାନରେ ୮ଟି ସିଟିବସ୍‌ ଯିବା ଆସିବା କରୁଥିବାବେଳେ ବରଗଡ଼ର ବ୍ଲକର ବିଭିନ୍ନ ପଞ୍ଚାୟତକୁ ୭ଟି ଏବଂ ଗାଇସିଲେଟକୁ ଗୋଟିଏ ଲକ୍ଷ୍ମୀ ବସ୍‌ ଏହି ବସଷ୍ଟାଣ୍ଡ ଦେଇ ଯାତାୟାତ ହେଉଛି। ଉପରୋକ୍ତ ସବୁ ଯାତ୍ରୀବାହୀ ବସର ରହଣୀ ଏହି ବସଷ୍ଟାଣ୍ଡରେ ଥିବା ଯୋଗୁ ଯାତ୍ରୀଙ୍କ ସଂଖ୍ୟା ମଧ୍ୟ ଦିନକୁ ଦିନ ବଢ଼ି ଚାଲିଛି। ଅପରପକ୍ଷେ ବରଗଡ଼ ବସଷ୍ଟାଣ୍ଡରୁ ପ୍ରୟାଗରାଜକୁ ଯାତାୟାତ ପାଇଁ ୨ନୂତନ ଯାତ୍ରୀବାହୀ ବସ୍‌(ଏସି) ଦୀର୍ଘମାସ ଏହି ବସଷ୍ଟାଣ୍ଡରେ ପଡ଼ି ରହିଥିଲା, ମାତ୍ର ପରମିଟ୍‌ ନ ମିଳିବା ଆଳ ଦେଖାଇ ତାକୁ ମଧ୍ୟ ଏଠାରୁ ଅନ୍ୟ ଜିଲାକୁ କାଢ଼ି ନିଆଯାଇଥିଲା।
ତେବେ ନିର୍ମାଣ ସମୟରେ ବସ୍‌ଷ୍ଟାଣ୍ଡ୍‌ ପରିସରରେ ସେତେବେଳେ ବିଭିନ୍ନ ବିଭାଗ ପାଇଁ ୨ମହଲା ବିଶିଷ୍ଟ କୋଠାଘର ହୋଇଥିଲା। ତଳ ମହଲାରେ ୬ ଏବଂ ଉପର ମହଲାରେ ୪କୋଠରୀ ପୂର୍ବରୁ ବ୍ୟବହୃତ ହେଉଥିଲା। କିନ୍ତୁ ଦୀର୍ଘବର୍ଷ ହେଲା କେବଳ ତଳ ମହଲା କୋଠରୀ ଗୁଡ଼ିକ ବ୍ୟବହୃତ ହେଉଥିବାବେଳେ ଉପର ମହଲା କୋଠରୀ ଗୁଡ଼ିକ ଭୂତକୋଠିଭାବେ ପଡ଼ି ରହିଛି। ସେହିପରି ବସଷ୍ଟାଣ୍ଡ୍‌ ପରିସରରେ ରହିଥିବା ପେଟ୍ରୋଲ ପମ୍ପ, ଗ୍ୟାରେଜ, କ୍ୟାଣ୍ଟିନ୍‌ ବି କେବେଠାରୁ ଅସ୍ତିତ୍ୱ ହଜାଇ ସାରିଲାଣି। ସରକାରୀ ବସଷ୍ଟାଣ୍ଡର ଏଭଳି ଦୁରାବସ୍ଥାକୁ ନେଇ ବର୍ଷବର୍ଷ ଧରି ସହରବାସୀଙ୍କ ମଧ୍ୟରେ ଅସନ୍ତୋଷ କୁହୁଳି ଆସୁଛି। ଏହାସତ୍ତ୍ୱେ ଏ ଯାଏ ସେଥିପ୍ରତି ଦୃଷ୍ଟି ଦିଆଯାଇ ନଥିବାବେଳେ ନୂଆ ସରକାର ନେଉଥିବା ପଦକ୍ଷେପ କେତେଶୀଘ୍ର କାର୍ଯ୍ୟକାରୀ ହୋଇ ପାରିବ, ତାକୁ ସହରବାସୀ ଚାହିଁ ବସିଛନ୍ତି।