ବରଗଡ଼ ଅଫିସ୍,୧୨।୮: ବରଗଡ଼ରେ କ୍ୟାନସର କେୟାର ସେଣ୍ଟର ସ୍ଥାପନ ପାଇଁ ସରକାରଙ୍କ ପ୍ରଶାସନିକ ଅନୁମୋଦନ ମିଳିଛି । ୧ଲକ୍ଷ ୩୬ ହଜାର ୫୦୮.୭୯ ବର୍ଗଫୁଟରେ ଉକ୍ତ କ୍ୟାନସର କେୟାର ସେଣ୍ଟର ୫ ମହଲା ବିଶିଷ୍ଟ ହେବ। ଏନେଇ ୯୦କୋଟି ୨୭ଲକ୍ଷ ଟଙ୍କା ବ୍ୟୟ ଅଟକଳ ରହିଛି ବୋଲି ରାଜ୍ୟ ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ପତ୍ରସଂଖ୍ୟା- ୨୨୮୧୭ ତା-୧୧।୮।୨୧ରେ ସୂଚନା ଦିଆଯାଇଛି ।
ଉକ୍ତ ହସ୍ପିଟାଲର ତଳ ମହଲାରେ ରେଡ଼ିଏଶନ ଥେରାପି ୟୁନିଟ୍, ପ୍ରଥମ ମହଲାରେ ମେଡ଼ିକାଲ ଅଙ୍କୋଲୋଜି, ସର୍ଜିକାଲ ଅଙ୍କୋଲୋଜି ବହିର୍ବିଭାଗ ସହିତ ୨୦ଟି ଶଯ୍ୟା ରହିବ । ସେହିପରି ଦ୍ୱିତୀୟ ମହଲାରେ ପେଟ୍ ସିଟି, ଗ୍ରାମା ହଟ୍ ଚ୍ୟାମ୍ବର, ତୃତୀୟ ମହଲାରେ ଅନ୍ତର୍ବିଭାଗ ମେଡ଼ିକାଲ ଅଙ୍କୋଲୋଜି, ଚତୁର୍ଥ ମହଲାରେ ଅନ୍ତର୍ବିଭାଗ ସର୍ଜିକାଲ ଅଙ୍କୋଲୋଜି ଏବଂ ପଞ୍ଚମ ମହଲରେ ୨ଟି ଅପରେଶନ ଥିଏଟର(ଓଡ଼ି) ସହିତ ୨୦ଟି ଆଇସିୟୁ ଶଯ୍ୟା ରହିବ ବୋଲି ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଉପରୋକ୍ତ ଚିଠିରେ ଉଲ୍ଲେଖ ରହିଛି ।
ସୂଚନା ଯୋଗ୍ୟ, ବରଗଡ଼ରେ କ୍ୟାନସର ଆକ୍ରାନ୍ତ ଏବଂ ମୃତକଙ୍କ ସଂଖ୍ୟା ବଢ଼ି ଚାଲିଥିବା ଯୋଗୁ ଏଠାରେ ଏକ କ୍ୟାନସର ହସ୍ପିଟାଲ ସ୍ଥାପନ ପାଇଁ ଜିଲାର ବିଭିନ୍ନ ସଂଗଠନ ସମେତ ଜିଲାବାସୀ ଦୀର୍ଘ ଦିନରୁ ଦାବିକରି ଆସୁଥିଲେ । ଜିଲାବାସୀଙ୍କ ଦାବି ପରେ ମୁଖ୍ୟମନ୍ତ୍ରୀ ବରଗଡ଼ରେ କ୍ୟାନସର ହସ୍ପିଟାଲ ନିର୍ମାଣ ନେଇ ଘୋଷଣା କରିଥିଲେ।
ହସ୍ପିଟାଲ ନେଇ ପ୍ରଥମେ ରାଜ୍ୟ ସରକାର ୧୦ କୋଟି ୪୯ଲକ୍ଷ ୨୧ହଜାର ଟଙ୍କା ଅନୁମୋଦନ କରିଥିଲେ । ଏହାକୁ ନେଇ ଜିଲାରେ ଅସନ୍ତୋଷ ଦେଖାଯାଇଥିଲା। ଏପରିକି ଅତ୍ୟାଧୁନିକ କ୍ୟାନସର ହସପିଟାଲ ଦାବି ଉଠିଥିଲା । ଜିଲାର ସମସ୍ତ ୫ ବିଧାୟକ ଅର୍ଥାତ ବରଗଡ଼ ବିଧାୟକ ଦେବେଶ ଆଚାର୍ଯ୍ୟ, ଗ୍ରାମ୍ୟ ଉନ୍ନୟନ ଓ ଶ୍ରମମନ୍ତ୍ରୀ ସୁଶାନ୍ତ ସିଂ, ଅତାବିରା ବିଧାୟିକା ସ୍ନେହାଙ୍ଗିନୀ ଛୁରିଆ, ବିଜେପୁର ବିଧାୟିକା ରୀତା ସାହୁ, ପଦ୍ମପୁର ବିଧାୟକ ବିଜୟ ରଞ୍ଜନ ସିଂ ବରିହା ପ୍ରମୁଖ ଅତ୍ୟାଧୁନିକ କ୍ୟାନସର ହସ୍ପିଟାଲ ନିର୍ମାଣ ପାଇଁ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ। ପରେ ପ୍ରଥମେ ହୋଇଥିବା ବ୍ୟୟ ଅଟକଳର ପ୍ରଶାସନିକ ଅନୁମୋଦନକୁ ବାତିଲ କରି ରାଜ୍ୟ ସରକାର ବରଗଡ଼ କ୍ୟାନସର କେୟାର ହସ୍ପିଟାଲ ପାଇଁ ୯୦କୋଟି ୨୭ଲକ୍ଷ ଟଙ୍କା ଅନୁମୋଦନ କରିଛନ୍ତି।