ବରଗଡ଼ ଅଫିସ୍,୯।୧୨: ଆସନ୍ତା ୨୭ତାରିଖ ବରଗଡ଼ ଧନୁଯାତ୍ରା ଆରମ୍ଭ ହେବ। ଏହା ପୂର୍ବରୁ ଅଭିନୟ ପାଇଁ ମନୋନୀତ କଳାକାରଙ୍କ ପୂର୍ବାଭ୍ୟାସ ଆରମ୍ଭ ହୋଇଛି। ଗତ ୫ତାରିଖରୁ ଗୋପପୁର କଳାକାରଙ୍କ ପୂର୍ବାଭ୍ୟାସ ଆରମ୍ଭ ହୋଇଥିଲା। ଶୁକ୍ରବାରରୁ ମଥୁରାନଗରୀ କଳାକାରଙ୍କ ପୂର୍ବାଭ୍ୟାସ କାର୍ଯ୍ୟକ୍ରମ ଆରମ୍ଭ ହୋଇଛି। ବରଗଡ଼ ଗାନ୍ଧିଛକ ନିକଟ କଲ୍ୟାଣ ମଣ୍ଡପ ପରିସରରେ ବାଗ୍ଦେବୀ ସରସ୍ବତୀଙ୍କ ପୂଜାର୍ଚ୍ଚନା ସହିତ ଅତିରିକ୍ତ ଜିଲାପାଳ ମିର୍ଧା ଟପ୍ପୋ କଳାକାରଙ୍କ ପୂର୍ବାଭ୍ୟାସ କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି। ଅନ୍ୟମାନଙ୍କ ମଧ୍ୟରେ ଡେପୁଟି କଲେକ୍ଟର ଅଶ୍ୱିନୀ ଦାଶ, ଧନୁଯାତ୍ରା ମହୋତ୍ସବ ସମିତିର ସମ୍ପାଦକ ସୁରେଶ୍ୱର ଶତପଥୀ, କଳାକାର ସମନ୍ବୟ କମିଟିର ସହ-ଆବାହାକ ଅଶୋକ ବେହେରା, ନାଟ୍ୟ ନିର୍ଦ୍ଦେଶକ ନକୁଳ ବାଦୀ, ଭୁବନ ଭୋଇ, କଂସ ଅଭିନେତା ହୃଷିକେଶ ଭୋଇ ଉପସ୍ଥିତ ଥିଲେ।
କାର୍ଯ୍ୟକ୍ରମ ଶୁଭାରମ୍ଭ ପରେ କଳାକାରଙ୍କ ପୂର୍ବାଭ୍ୟାସ ଚାଲିଥିଲା। କଂସ ଅଭିନେତା ହୃଷିକେଶ ଭୋଇ, ଉଗ୍ରସେନ ଅଭିନେତା ଆର୍ତ୍ତତ୍ରାଣ ମହାପାତ୍ର, ମହାମନ୍ତ୍ରୀ ଅଭିନେତା ଗୋଲାପ ଚନ୍ଦ୍ର ଦାଶ, ବସୁଦେବ ଅଭିନେତା ମନୋଜ କୁମାର ସାହୁ, ଦେବକୀ ଚରିତ୍ର ପାଇଁ ମନୋନୀତ କନକ ଦଣ୍ଡସେନା, ମୁଖ୍ୟ ସେନାପତି ଦୟାନନ୍ଦ ମାଝୀ, ଚାଣୁର ଅଭିନେତା ମୁନେଶ ଚନ୍ଦ୍ର ଆଚାର୍ଯ୍ୟ, ଗର୍ଗମୁନି ଅଭିନେତା ଅଇଁଠୁ ସାହୁ, ସେନାପତି ଚନ୍ଦ୍ରକେତୁ ଅଭିନେତା ସଂଗ୍ରାମ ଦେହୁରୀ ଏବଂ ଅନ୍ୟ ପାର୍ଶ୍ୱ କଳାକାରମାନେ ଉପସ୍ଥିତ ରହି ପୂର୍ବାଭ୍ୟାସ କରିଥିଲେ। ପୂର୍ବାଭ୍ୟାସର ପ୍ରଥମ ଦିବସରେ ଦେବକୀ-ବସୁଦେବଙ୍କ ବିବାହ ଦୃଶ୍ୟଭିନୟ ନେଇ କଳକାରମାନେ ପୂର୍ବାଭ୍ୟାସ କରିଥିଲେ ।
