ମଥୁରାନଗରୀ,୨।୧: ବରଗଡ଼ ଧନୁଯାତ୍ରାର ସୋମବାର ସପ୍ତମ ଦିବସରେ ମଥୁରାଧିପତି କଂସ ମହାରାଜଙ୍କ ପରାକ୍ରମ, ଧନୁଯାତ୍ରା ଆୟୋଜନ ଏବଂ ରାଧାକୃଷ୍ଣଙ୍କ ନାବକେଳି ଦୃଶ୍ୟାଭିନୟ ଦେଖିବାକୁ ମିଳିଥିଲା। ରାଧାକୃଷ୍ଣଙ୍କୁ ନେଇ ଗୋପବାସୀ ଶୋଭାଯାତ୍ରାରେ ମନାବନ୍ଧ ଅଭିମୁଖେ ବାହାରିଥିଲେ। ବାଟରେ ପ୍ରତିଘର ସମ୍ମୁଖରେ ପୂର୍ଣ୍ଣକଳସ ରଖି ରାଧାକୃଷ୍ଣଙ୍କୁ ସ୍ବାଗତ କରାଯାଇଥିଲା। ମନାବନ୍ଧ (ଜଳାଶୟ)ରେ ନାବକେଳି ଦୃଶ୍ୟାଭିନୟ ବେଶ୍ ମନୋରମ ହୋଇଥିଲା। ସୁସଜ୍ଜିତ ଡଙ୍ଗାରେ ରାଧାକୃଷ୍ଣ ବସିଥିବାବେଳେ ନାଉରିଆ ଡଙ୍ଗାକୁ ଜଳାଶୟ ଚାରିପାଖ ବୁଲାଇଥିଲେ। ଏହି ଦୃଶ୍ୟାଭିନୟ ଚାଲିଥିବା ସମୟରେ ମନାବନ୍ଧର ଚତୁଃପାର୍ଶ୍ୱ ଲୋକରଣ୍ୟ ହୋଇପଡ଼ିଥିଲା । ଉପସ୍ଥିତ ମହିଳାଙ୍କ ହୁଲହୁଲି ଏବଂ ପୁରୁଷଙ୍କ ହରିବୋଲରେ ସ୍ଥାନୀୟ ଅଞ୍ଚଳ କମ୍ପି ଉଠିଥିଲା ।
ଅନ୍ୟପକ୍ଷେ ମଥୁରାଧିପତି କଂସ ଅନ୍ୟଦିନ ଭଳି ଅପରାହ୍ନରେ ମଥୁରା ଭ୍ରମଣରେ ବାହାରିଥିଲେ। ଏହି ସମୟରେ ସେ ଷ୍ଟେଟବ୍ୟାଙ୍କ ସମେତ ଅନ୍ୟ ସ୍ଥାନ ପରିଦର୍ଶନ କରି ଲୋକମଣ୍ଡପ ପଡ଼ିଆ ସ୍ଥିତ ରଙ୍ଗମହଲରେ ପହଞ୍ଚତ୍ଥିଲେ। ସେଠାରେ କଂସ ମହାରାଜଙ୍କ ସମ୍ମୁଖରେ ବିଭିନ୍ନ ସାଂସ୍କୃତିକ ଅନୁଷ୍ଠାନର କଳାକାରମାନେ ନୃତ୍ୟଗୀତ ପରିବେଷଣ କରିଥିଲେ। ଏହାପରେ କଂସ ମହାରାଜ ହାଟପଦା ସ୍ଥିତ ରାଜଦରବାରକୁ ଯାଇଥିଲେ। ଗୋପପୁର ପ୍ରେରିତ ରାକ୍ଷସୀ, ରାକ୍ଷସ ନିଧନ ପରଠାରୁ ମର୍ମାହତ କଂସ ଶ୍ରୀକୃଷ୍ଣଙ୍କୁ ହତ୍ୟା କରିବା ପାଇଁ ପୁଣି ଷଡ଼ଯନ୍ତ୍ର ରଚନା କରିଥିଲେ। ଏଥିପାଇଁ ସେ ଧନୁଯାତ୍ରାର ଆୟୋଜନ କରିଥିଲେ। ଏହି କ୍ରମରେ ଧନୁଯାତ୍ରାକୁ କୃଷ୍ଣ ଓ ବଳରାମଙ୍କୁ ନିମନ୍ତ୍ରଣ ପାଇଁ ସେ ମହାମନ୍ତ୍ରୀ ଅକ୍ରୂରଙ୍କୁ ଗୋପପୁର ଯିବାକୁ ନିର୍ଦ୍ଦେଶ ଦେଇଥିଲେ। ତେବେ ମଙ୍ଗଳବାରଠାରୁ ବର୍ତ୍ତମାନ ରଙ୍ଗମହଲ ପାଲଟିଥିବା ଲୋକମଣ୍ଡପ ମଞ୍ଚ ରାଜଦରବାର ଏବଂ ହାଟପଦା ମଞ୍ଚରେ ରଙ୍ଗମହଲ ଦୃଶ୍ୟାଭିନୟ ଦେଖିବାକୁ ମିଳିବ।