ବରଗଡ଼ ଅଫିସ,୧୯ା୭: ବରଗଡ଼ ଜିଲା ଭଟଲି ବ୍ଲକ ଅନ୍ତର୍ଗତ ଟୁକୁର୍ଲା (ଖେଦାପାଲି)ଠାରେ ରହିଥିବା ଜିଲା ମୁଖ୍ୟ ଡାକ୍ତରଖାନାକୁ ରବିବାରରୁ ୫ଦିନ ପାଇଁ ଶଟ୍ଡାଉନ୍ କରାଯାଇଛି। ଏହା ଆସନ୍ତା ୨୩ ତାରିଖ ପର୍ଯ୍ୟନ୍ତ ବଳବତ୍ତର ରହିବ। ଉକ୍ତ ଡାକ୍ତରଖାନାରେ କାର୍ଯ୍ୟରତ ଜଣେ କରୋନା ଯୋଦ୍ଧା କରୋନା (କୋଭିଡ୍-୧୯)ରେ ଆକ୍ରାନ୍ତ ରହିଥିବା ଜଣାପଡ଼ିବା ପରେ ଏଭଳି ନିଷ୍ପତ୍ତି ନିଆଯାଇଥିବା ଜିଲା ମୁଖ୍ୟ ଚିକିତ୍ସାଧିକାରୀ ଡା. ବିଭୁତି ଭୂଷଣ ମେହେର ସୂଚନା ଦେଇଛନ୍ତି। ସେହିପରି ଜିଲାପାଳ ଜ୍ୟୋତିରଞ୍ଜନ ପ୍ରଧାନ ସୂଚନା ଦେଇ କହିଛନ୍ତି, ମୁଖ୍ୟ ଡାକ୍ତରଖାନାକୁ ସାନିଟାଇଜ୍ କରାଯାଇଛି। ଡାକ୍ତରଖାନାରେ ଭର୍ତ୍ତି ହୋଇଥିବା ଗୁରୁତର ଅସୁସ୍ଥମାନଙ୍କୁ ଭୀମସାର,ବୁର୍ଲା ସ୍ଥାନାନ୍ତର କରାଯିବା ସହିତ ଯେଉଁ ଅସୁସ୍ଥମାନଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିଛି। ସେମାନଙ୍କୁ ଡିସ୍ଚାର୍ଜ କରିବା ପାଇଁ ନିଷ୍ପତ୍ତି ନିଆଯାଇଛି । ସେହିପରି ମୁଖ୍ୟ ଡାକ୍ତରଖାନାକୁ ଚିକିତ୍ସା ପାଇଁ କୌଣସି ରୋଗୀ ଆସିଲେ ଆବଶ୍ୟକ ସ୍ଥଳେ ପଦକ୍ଷେପ ନିଆଯିବ ବୋଲି ଜିଲାପାଳ କହିଛନ୍ତି। ଅନ୍ୟପକ୍ଷରେ ଆକ୍ରାନ୍ତ କରୋନା ଯୋଦ୍ଧା ସଂସ୍ପର୍ଶରେ ଆସିଥିବା ଯୋଗୁ ବରଗଡ଼ର ମୁକେଶ ପଲି କ୍ଲିନିକ ଏବଂ ମୁକେଶ ମେଡିକାଲ ଷ୍ଟୋର୍କୁ ମଧ୍ୟ ୫ଦିନ ଶଟ୍ଡାଉନ୍ କରାଯାଇ ଥିବାବେଳେ ତାଙ୍କ ସଂସ୍ପର୍ଶରେ ଆସିଥିବା ଲୋକଙ୍କୁ ଚିହ୍ନଟ କରି ହୋମ୍ କ୍ବାରାଣ୍ଟାଇନ୍, ଆଇସୋଲେଶନରେ ରହିବାକୁ ପରାମର୍ଶ ଦିଆଯାଇଛି ବୋଲି ଜିଲା ମୁଖ୍ୟ ଚିକିତ୍ସାଧିକାରୀ ଡା. ମେହେର ସୂଚନା ଦେଇଛନ୍ତି।
ପ୍ରକାଶ ଥାଉକି, ରବିବାର ବରଗଡ଼ ଜିଲାରୁ ୩ ନୂଆ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରେ କଟାପାଲି ଗ୍ରାମର ୨ଜଣ ମହିଳା ରହିଥିବା ବେଳେ ବରଗଡ଼ ସହରର ପ୍ରଧାନପାଲି ନିକଟ ଗଣପତି ଭିଲ୍ଲାର ଜଣେ ରହିଛନ୍ତି। ଗଣପତି ଭିଲ୍ଲାର ଆକ୍ରାନ୍ତ ଜଣକ ବିକାଶ ହସ୍ପିଟାଲର ଆଇସୋଲେଶନ ଓ୍ବାର୍ଡ ଥିବାବେଳେ ସେ କରୋନା ଆକ୍ରାନ୍ତ ରହିଥିବା ଜଣାପଡ଼ିଥିଲା। ତେବେ କଟାପାଲିରୁ ଚିହ୍ନଟ ୨ଆକ୍ରାନ୍ତଙ୍କୁ ବରଗଡ଼ କୋଭିଡ୍ ହସ୍ପିଟାଲ ଏବଂ ଗଣପତିଭିଲ୍ଲାର ଆକ୍ରାନ୍ତଙ୍କୁ ଭୁବନେଶ୍ବରର କିମ୍ସ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଥିବା ସୂଚନା ଦିଆଯାଇଛି।