ବରଗଡ଼ ଅଫିସ୍,୧।୫: କରୋନା ସଂକ୍ରମଣକୁ ପ୍ରତିହତ କରିବା ପାଇଁ ବରଗଡ଼ ଜିଲାର ସହରାଞ୍ଚଳ ଗୁଡ଼ିକରେ ପ୍ରତି ସପ୍ତାହର ଶନିବାର, ରବିବାର ଦୁଇଦିନ ସପ୍ତାହାନ୍ତ ଶଟ୍ ଡାଉନ କଟକଣା ଲାଗୁ ହୋଇଛି । ସପ୍ତାହାନ୍ତ ଶଟ୍ ଡାଉନରେ ଶନିବାର ଜିଲାର ସମସ୍ତ ସହରାଞ୍ଚଳ ଶୂନଶାନ ହୋଇ ପଡ଼ିଛି । ରାସ୍ତାଘାଟ ଠପ୍ ପଡ଼ିଯାଇ ଥିବାବେଳେ ଦୋକାନ, ବଜାର ବନ୍ଦ ରହିଛି। ସେହିପରି ଯାତ୍ରୀବାହୀ ବସ୍ ଚଳାଚଳ ମଧ୍ୟ ଠପ୍ ପଡ଼ି ଯାଇଥିଲା । ଅଳ୍ପ କେତେକ ସରକାରୀ ଯାତ୍ରୀବାହୀ ବସକୁ ଛାଡ଼ି ଦେଲେ ଅନ୍ୟ ବସ୍ଗୁଡ଼ିକ ବସଷ୍ଟାଣ୍ଡରେ ଅଟକି ରହିଛି। ସେହିପରି ଦୁଗ୍ଧ, ଫଳ ଷ୍ଟଲ ସମେତ ଔଷଧ ଦୋକାନକୁ ଛାଡ଼ି ଦେଲେ ଅନ୍ୟ ଦୋକାନ ଗୁଡ଼ିକ ବନ୍ଦ ରହିଛି। ଜିଲାର ବରଗଡ଼ ପୌରାଞ୍ଚଳ ସମେତ ଅତାବିରା, ବରପାଲି, ବିଜେପୁର, ପଦ୍ମପୁର ବିଜ୍ଞାପିତ ଅଞ୍ଚଳ ପରିଷଦରେ ଏହି କଟକଣା ଲାଗୁ ହୋଇଛି।
