ପରଜଙ୍ଗ, ୨୦ା୮(ଡି.ଏନ୍.ଏ.): ଢେଙ୍କାନାଳ ଜିଲା ପରଜଙ୍ଗ ଅଞ୍ଚଳବାସୀଙ୍କ ଦୁଃଖ ପାଲଟିଛି ବାରଘରିଆ ନାଳ। ବର୍ଷାଦିନେ ନାଳ ପାଣି ଉଛୁଳି ପୁରୁଣା ସେତୁ ବୁଡ଼ିଯାଉଛି। ନୂତନ ବ୍ରିଜ୍ ନିର୍ମାଣ ଶେଷ ହୋଇଯାଇଥିବାବେଳେ ଆପ୍ରୋଚ୍ ରୋଡ୍ ପାଇଁ ଟେଣ୍ଡର ହୋଇପାରୁ ନ ଥିବାରୁ ଏହା କାର୍ଯ୍ୟକ୍ଷମ ହୋଇପାରୁନାହିଁ। ଏଥିସହ ପୋଲ ସଂଲଗ୍ନ ରାସ୍ତା କାଦୁଅରେ ଭର୍ତ୍ତି ହୋଇଛି। ସଡ଼କର ଏଭଳି ଦୁରାବସ୍ଥାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ତୀବ୍ର ହେବାରେ ଲାଗିଛି।
ସୂଚନାଯୋଗ୍ୟ, ଭାଲୁମୁଣ୍ଡା-ଆଲୁଅଝରଣ ପୂର୍ତ୍ତ ବିଭାଗ ରାସ୍ତାକୁ ଭାଲୁମୁଣ୍ଡାଠାରୁ ଦେଢ଼ କିମି ଦୂରରେ ଅତିକ୍ରମ କରିଛି ବାରଘରିଆ ନାଳ। ଏହା ଉପରେ ନିର୍ମିତ ପୁରାତନ ଅଣଓସାରିଆ ପୋଲ ବିପଦସଙ୍କୁଳ ହୋଇପଡ଼ିଛି। ନିର୍ଦ୍ଧାରିତ ଉଚ୍ଚତାରୁ ତଳେ ନିର୍ମାଣ ହୋଇଥିବାରୁ ସାମାନ୍ୟ ବର୍ଷା ହେଲେ ପାଣିରେ ବୁଡ଼ିଯାଉଛି। ମରଣଯନ୍ତା ପାଲଟିଥିବା ଏହି ସେତୁରେ ଦୁର୍ଘଟଣା ଘଟି ଧନଜୀବନ ହାନି ହେଉଛି। ଏପରି କି ଗତଦିନରେ ଯାତ୍ରୀଙ୍କ ଗାଡ଼ି ମଧ୍ୟ ଭାସିଯାଇଥିବା ନଜିର ରହିଛି। ଯାତ୍ରୀ ଭୋଗୁଥିବା ଦୁର୍ଦ୍ଦଶାକୁ ନଜରରେ ରଖି ପୂର୍ତ୍ତ ବିଭାଗ ପକ୍ଷରୁ ଉକ୍ତ ନାଳର ଉପରପାର୍ଶ୍ୱରେ ନୂତନ ପୋଲ ନିର୍ମାଣ କରାଯାଇଛି। ଏହାର କାମ ସମ୍ପୂର୍ଣ୍ଣ ମଧ୍ୟ ହୋଇସାରିଛି। ତେବେ ପୋଲ ସଂଲଗ୍ନ ଆପ୍ରୋଚ ରୋଡ୍ ଟେଣ୍ଡର ପ୍ରକ୍ରିୟା ସରୁ ନ ଥିବାରୁ ଏହା କାର୍ଯ୍ୟକ୍ଷମ ହୋଇପାରୁନାହିଁ।
ଶୁକ୍ରବାର ଲଗାଣ ବର୍ଷା ଯୋଗୁ ପୁରୁଣା ପୋଲ ଉପରେ ୩ ଫୁଟର ପାଣି ପ୍ରବାହିତ ହୋଇଥିଲା। ନୂତନ ପୋଲ ରାସ୍ତା କାଦୁଅରେ ପରିପୂର୍ଣ୍ଣ ହୋଇପଡ଼ିଥିଲା। ତେବେ ବିକଳ୍ପ ନ ଥିବାରୁ ଯାତ୍ରୀମାନେ କାଦୁଅ ପଚପଚ ରାସ୍ତାରେ ଯାତାୟାତ କରିବାକୁ ବାଧ୍ୟ ହୋଇଥିଲେ।
ବ୍ରିଜ୍ ଓ ଆପ୍ରୋଚ୍ ରୋଡ୍ ପାଇଁ ପୃଥକ୍ ଟେଣ୍ଡର ହୋଇଛି। ବ୍ରିଜ୍ ନିର୍ମାଣ ଶେଷ ହୋଇଥିବାବେଳେ ଅଳ୍ପ କିଛି କାମ ବାକି ରହିଛି। ତେଣୁ ପୋଲ ସଂଲଗ୍ନ ଦୁଇପାର୍ଶ୍ୱରେ ପ୍ରସ୍ତାବିତ ଆପ୍ରୋଚ୍ ରାସ୍ତା ପାଇଁ ଟେଣ୍ଡର ହୋଇ ପାରୁନାହିଁ। ତଥାପି ବର୍ଷାଦିନେ ଯେପରି ଯାତାୟାତରେ ସମସ୍ୟା ନ ଉପୁଜେ ସେଥିଲାଗି ଉଦ୍ୟମ କରାଯିବ ବୋଲି ନିକଟରେ ପୂର୍ତ୍ତ ବିଭାଗ ଯନ୍ତ୍ରୀ ନିବେଶ କୁମାର ମାଝି, ଏସ୍ଡିଓ ପ୍ରତାପ କୁମାର ହରିପାଲ ସୂଚନାଦେଇଥିଲେ। ତେବେ ଅଦ୍ୟାବଧି ଏ ଦିଗରେ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଇନାହିଁ। ତେଣୁ ଯାତ୍ରୀମାନେ ହନ୍ତସନ୍ତ ହେଉଥିବା ଅଭିଯୋଗ କରିଛନ୍ତି। ଯଥାସମ୍ଭବ ନୂତନ ବ୍ରିଜ୍ କାର୍ଯ୍ୟକ୍ଷମ କରା ନ ଗଲେ ଆନ୍ଦୋଳନକୁ ଓହ୍ଲାଇବାକୁ ସେମାନେ ଚେତାବନୀ ଦେଇଛନ୍ତି।
