ବାରିପଦା ଅଫିସ,୧୬।୪ ବିଶ୍ୱ କଳା ଦିବସ ଅବସରରେ ଅନ୍ଲାଇନ ଆର୍ଟ ସୋ ଉତ୍ସବର ୫ମ ଅନ୍ତର୍ଜାତୀୟ ‘ଧଉଳୀ ଅନ୍ଲାଇନ ଆର୍ଟ ଫେଷ୍ଟ-୨୦୨୨’ ପ୍ରଦର୍ଶନୀରେ ମୟୂରଭଞ୍ଜ ଜିଲାକୁ ସଫଳତା ମିଳିଛି। କୃତୀତ୍ୱ ଅର୍ଜନ କରିଥିବା ଶ୍ରେଷ୍ଠ ୧୦ଜଣଙ୍କ ମଧ୍ୟରୁ ବାରିପଦାର ମାନସ ରଞ୍ଜନ ପତି ପ୍ରଥମ ସ୍ଥାନ ଅଧିକାର କରିଛନ୍ତି। ତାଙ୍କ ତୂଳୀରୁ ସୃଷ୍ଟି ହୋଇଥିବା ଜୀବନ୍ତ ଚିତ୍ରକଳା ଅନ୍ତର୍ଜାତୀୟ ସ୍ତରରେ ପ୍ରସିଦ୍ଧି ଲାଭ କରିଛି। ଚିତ୍ରକଳାର ଟାଇଟଲ୍ ‘ଡେଭଲପ୍ମେଣ୍ଟ ଆଣ୍ଡ ରିକ୍ୱାରମେଣ୍ଟ’ ସମ୍ପର୍କିତ ବିଷୟ ବସ୍ତୁ ସମାଜକୁ ବାର୍ତ୍ତା ଯୋଗାଉଥିବା ଦେଖି ବିଚାରକମାନେ ପ୍ରଶଂସା କରି ପ୍ରଦର୍ଶନୀରେ ସ୍ଥାନିତ କରିଛନ୍ତି। ଏହି ପ୍ରଦର୍ଶନୀ ମେଳା ଭୁବନେଶ୍ୱର ସ୍ଥିତ ଧଉଳୀ କଲେଜର ଆର୍ଟ ଆଣ୍ଡ କ୍ରାଫ୍ଟ ପକ୍ଷରୁ ଆୟୋଜନ କରାଯାଇଛି। ଏହା ଏପ୍ରିଲ ୧୫ରୁ ଆରମ୍ଭ ହୋଇ ୨୦ତାରିଖ ପର୍ଯ୍ୟନ୍ତ ଚାଲିବ। ଅନ୍ତର୍ଜାତୀୟ ସ୍ତରରେ ମୋଟ ୧୨୯ଜଣ ପ୍ରତିେଯୋଗୀଙ୍କ ଚିତ୍ରକଳାକୁ ସଂଗ୍ରହ କରାଯାଇ ଶ୍ରେଷ୍ଠ ୧୦ଜଣଙ୍କୁ ମନୋନୀତ କରାଯାଇଛି। ଦେଶ ବିଦେଶର କଳାକାରମାନେ ଏହି ଚିତ୍ରକଳାକୁ ଦେଖିବା ସହ ଜାତୀୟ ଓ ଅନ୍ତର୍ଜାତୀୟ ସ୍ତରରେ ଏହାକୁ ପ୍ରଦର୍ଶିତ କରାଯିବ। ମୟୂରଭଞ୍ଜର କଳା ଓ ସଂସ୍କୃତି ବିଶ୍ୱ ପ୍ରସିଦ୍ଧ ହୋଇଥିବା ବେଳେ ମାନସଙ୍କ ଚିତ୍ରକଳା ଜିଲାକୁ ବେଶ୍ ପରିଚିତ କରିପାରିଛି ବୋଲି ଅଞ୍ଚଳବାସୀ ପ୍ରକାଶ କରିଛନ୍ତି।