ବାରିପଦା ଅଫିସ,୨୫ା୨: ମୟୂରଭଞ୍ଜ ଜିଲାକୁ ପର୍ଯ୍ୟଟକଙ୍କ ଗମନାଗମନ ନିମନ୍ତେ ସିଧାସଳଖ ବାଙ୍ଗରିପୋଷିରୁ ପୁରୀ ଶ୍ରୀକ୍ଷେତ୍ର ପର୍ଯ୍ୟନ୍ତ ନିୟମିତ ରେଳ ଚଳାଚଳ କରିବାକୁ ଜିଲାବାସୀ ବାରମ୍ବାର ଦାବି କରିଆସୁଛନ୍ତି। ମାତ୍ର କେନ୍ଦ୍ର ସରକାରଙ୍କ ରେଳ ବିଭାଗ ଏଥିପ୍ରତି କୌଣସି ପଦକ୍ଷେପ ଗ୍ରହଣ କରୁ ନ ଥିବାରୁ ମୟୂରଭଞ୍ଜକୁ ଅବହେଳା କରାଯାଉଥିବା ନେଇ ବିଜେଡି ପକ୍ଷରୁ ଅଭିଯୋଗ ହେଉଛି। ଏହାକୁ ନେଇ ପ୍ରାକ୍ତନମନ୍ତ୍ରୀ ସରୋଜିନୀ ହେମ୍ବ୍ରମ ମୟୂରଭଞ୍ଜ ଜିଲା ବାରିପଦାରୁ ପୁରୀଧାମକୁ ଓଏସ୍ଆର୍ଟିସି ବସ୍ ନିୟମିତ ଭାବେ ଚଳାଚଳ କରାଇବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନିବେଦନ କରିଛନ୍ତି ।
ପର୍ଯ୍ୟଟନ ମାନଚିତ୍ରରେ ମୟୂରଭଞ୍ଜ ଓ ପୁରୀର ସ୍ବାତନ୍ତ୍ରତା ରହିଛି। ପ୍ରସ୍ତାବିତ ଜାତୀୟ ଉଦ୍ୟାନ ଶିମିଳିପାଳ ଅଭୟାରଣ୍ୟ ସହିତ ଚତୁଃପାର୍ଶ୍ୱରେ ରହିଥିବା ପର୍ଯ୍ୟଟନସ୍ଥଳୀ ଏବଂ ରାଜାରାଜୁଡ଼ାଙ୍କ ଐତିହ୍ୟ ପର୍ଯ୍ୟଟକଙ୍କୁ ଆକୃଷ୍ଟ କରିଥାଏ। ଏହାକୁ ଦେଖି ଆଗନ୍ତୁକ ମନଭରି ଆନନ୍ଦିତ ହେଉଥିବା ବେଳେ ଜିଲାର କଳା, ସଂସ୍କୃତି ଓ ପରମ୍ପରାକୁ ଉପଭୋଗ କରିଥାନ୍ତି। ମାତ୍ର ଜିଲାରୁ ପୁରୀ ପର୍ଯ୍ୟନ୍ତ କୌଣସି ଘରୋଇ ଯାନବାହାନ ଚଳାଚଳ କରୁ ନ ଥିବାରୁ ଯାତ୍ରୀମାନେ ବହୁ ହଇରାଣ ହରକତ ଯାଉଛନ୍ତି। ବାରିପଦାରୁ ଭୁବନେଶ୍ୱର ଚଳାଚଳ କରୁଥିବା ଓଏସ୍ଆର୍ଟିସି ବସ୍କୁ ସମ୍ପ୍ରସାରଣ କରି ପୁରୀ ପର୍ଯ୍ୟନ୍ତ ଚଳାଇଲେ ବହୁ ଲୋକ ଉପକୃତ ହୋଇପାରନ୍ତେ ବୋଲି ସେ ପତ୍ର ମାଧ୍ୟମରେ ନିବେଦନ କରିଛନ୍ତି। ଏହାର ଏକକିତା ନକଲ ପରିବହନ ମନ୍ତ୍ରୀ ଓ ବିଭାଗୀୟ ଶାସନ ସଚିବଙ୍କୁ ମଧ୍ୟ ପ୍ରଦାନ କରିଛନ୍ତି ।