କୁଚିଣ୍ଡା,୭ା୪(ଡି.ଏନ.ଏ.): କୁଚିଣ୍ଡା ବ୍ଲକ ଗୋଛରା ପଞ୍ଚାୟତ ଜନକଡ଼ିହିଠାରେ ଭେଡେନ ନଦୀ ଉପରେ ଏକ ବ୍ୟାରେଜ ନିର୍ମାଣ କାମ ଚାଲୁରହିଛି। ହେଲେ ଠିକା ସଂସ୍ଥାର ବେଆଇନ କାମ ନେଇ ଜନ ଅସନ୍ତୋଷ ବଢିବାରେ ଲାଗିଛି। ଏ ନେଇ ଗୋଛରା ଗ୍ରାମବାସୀଙ୍କ ପକ୍ଷରୁ ମୁଖ୍ୟମନ୍ତ୍ରୀ, ୫-ଟି ସଚିବ, ସମ୍ବଲପୁର ଜିଲାପାଳ, ପ୍ରଦୂଷଣ ନିୟନ୍ତ୍ରଣ ବିଭାଗକୁ ଲିଖିତ ଅଭିଯୋଗ କରାଯାଇଛି।
ସୂଚନା ଅନୁଯାୟୀ, ଅଣଜଳସେଚିତ ଗୋଛରା ଅଞ୍ଚଳରେ ଚାଷ ଜମିକୁ ଜଳସେଚନ ନିମନ୍ତେ ସରକାର ଗୋଛରା ନିକଟସ୍ଥ ଜନକଡ଼ିହି ଭେଡେନ ନଦୀ ଉପରେ ବ୍ୟାରେଜ ନିର୍ମାଣ ପାଇଁ ମଞ୍ଜୁରୀ ଦେଇଥିଲେ। ରାଜ୍ୟ ସରକାରଙ୍କ ଜଳସମ୍ପଦ ବିଭାଗ ଏଥିପାଇଁ ଟେଣ୍ଡର ଆହ୍ବାନ କରିଥିଲା ଓ ଛତିଶଗଡ଼ର ଏକ ଠିକା କମ୍ପାନୀ ଏହି ନିର୍ମାଣ କାମ କରିବା ପାଇଁ ଟେଣ୍ଡର ପାଇଥିଲା। ୫୫କୋଟି ବ୍ୟୟ ଅଟକଳରେ ଏହି ଠିକା ସଂସ୍ଥା ଗତ ନଭେମ୍ବର ମାସରୁ କାମ ଆରମ୍ଭ କରିଥିଲା। ମାତ୍ର ଠିକା କମ୍ପାନୀ ବେଆଇନ କାମ କରୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ନିୟମକୁ ବେଖାତିର କରାଯାଇ ନଦୀ ଭିତରେ ପଥର ବ୍ଲାଷ୍ଟିଂ କରାଯାଉଛି। ପଥର ଫଟାଇବା ପରେ ଏହାକୁ ସରକାରଙ୍କଠାରେ ଜମା ନ କରି ନିର୍ମାଣ କାମରେ ବ୍ୟବହାର କରାଯାଉଛି। ସେହିପରି ବିନା ଅନୁମତିରେ ନଦୀ ବାଲିକୁ ନିଜ ଠିକା କାମରେ ବ୍ୟବହାର କରାଯାଉଛି। ବ୍ଲାଷ୍ଟିଂ ପାଇଁ ଗ୍ରାମସଭାର ଅନୁମତି ଆବଶ୍ୟକ ଥିବାବେଳେ ଠିକା କମ୍ପାନୀ ଏହାକୁ ପାଳନ କରୁନାହିଁ। ଏହି ଠିକା ସଂସ୍ଥା ଏକ ଭ୍ରାମ୍ୟମାଣ କ୍ରଶର ମେସିନ ଦ୍ବାରା ପଥର ଫଟାଇ ଗେଟି ତିଆରି କରୁଛି। ଫଳରେ ପଥର ଗୁଣ୍ଡ ଉଡ଼ି ଚାଷୀଙ୍କ ଜମି ନଷ୍ଟ ହେଉଥିବାର ଗ୍ରାମବାସୀ ଅଭିଯୋଗ କରିଛନ୍ତି। ତେଣୁ ତୁରନ୍ତ ପଥର ବ୍ଲାଷ୍ଟିଂ ଓ କ୍ରଶରକୁ ବନ୍ଦ କରିବାକୁ ଅଞ୍ଚଳବାସୀଙ୍କ ପକ୍ଷରୁ ଦାବି ହେଉଛି। ଏ ସମ୍ପର୍କରେ କୁଚିଣ୍ଡା ତହସିଲଦାର ପ୍ରସନ୍ନ ଟେଟେଙ୍କୁ ପଚାରିବାରେ ପଥର ବ୍ଲାଷ୍ଟିଂ, କ୍ରଶର ଆଦି ପାଇଁ ଠିକା ସଂସ୍ଥାର ଅନୁମତି ରହିଛି ଓ ବାଲି ପାଇଁ ରାଜସ୍ବ ଜମା କରିଥିବା କହିଛନ୍ତି।
