ଭୁବନେଶ୍ୱର,୧୬।୧୨(ବ୍ୟୁରୋ): ଏମ୍ପି ଅନୁଭବ ମହାନ୍ତି ଓ ତାଙ୍କ ସ୍ତ୍ରୀ ତଥା ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କ ପାରିବାରିକ ବିବାଦ ଏବେ ଚରମ ସୀମାରେ ପହଞ୍ଚତ୍ଛି। ମଙ୍ଗଳବାର ଅନୁଭବଙ୍କ ବିରୋଧରେ ରାଜ୍ୟ ମହିଳା କମିଶନର ଦ୍ୱାରସ୍ଥ ହୋଇଛନ୍ତି ବର୍ଷା। ତେବେ ସେ କ’ଣ ଅଭିଯୋଗ ରଖିଛନ୍ତି ତାହା ଜଣାପଡି ନ ଥିଲେ ମଧ୍ୟ ମାମଲା କୋର୍ଟରେ ବିଚାରାଧୀନ ଥାଇ ମଧ୍ୟ ସେ ଘରୋଇ ହିଂସାର ଶିକାର ହେଉଥିବା ନେଇ କମିଶନଙ୍କୁ ଜଣାଇଥିବା କୁହାଯାଉଛି। ବର୍ଷା ସୋମବାର ଦିନ ପ୍ରାୟ ଗୋଟାଏବେଳେ ମହିଳା କମିଶନରଙ୍କ ନିକଟକୁ ଯାଇ ଅଧଘଣ୍ଟା କାଳ ଆଲୋଚନା କରି ବାହାରିଥିଲେ। ଅଭିଯୋଗ ସଂକ୍ରାନ୍ତରେ ମହିଳା କମିଶନର ଅଧ୍ୟକ୍ଷା ମିନତୀ ବେହେରା ଓ ବର୍ଷାଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେମାନଙ୍କ ପ୍ରତିକ୍ରିୟା ମିଳିପାରିନି।
ସୂଚନାଯୋଗ୍ୟ, ପୂର୍ବରୁ ଅନୁଭବଙ୍କ ବିରୋଧରେ ବର୍ଷା ଘରୋଇ ହିଂସା ଅଭିଯୋଗ ନେଇ ଅଦାଲତଙ୍କ ଆଶ୍ରୟ ନେଇଥିଲେ। ଅନୁଭବ ମଧ୍ୟ ବର୍ଷାଙ୍କ ବିରୋଧରେ ପଟିଆଲା କୋର୍ଟରେ ଅଭିଯୋଗ କରିଥିଲେ। କୋର୍ଟରେ ଉଭୟଙ୍କ ମାମଲା ବିଚାରାଧୀନ ଥିବାବେଳେ ଉଭୟଙ୍କ ଆରୋପ ପ୍ରତ୍ୟାରୋପ ଲାଗି ରହିଛି। ଅନୁଭବଙ୍କ ଫ୍ୟାନ୍ ଜାଣିଶୁଣି ସୋସିଆଲ ମିଡିଆରେ ତାଙ୍କ ପ୍ରତି ଅଶାଳୀନ ମନ୍ତବ୍ୟ ଦେଉଥିବା ନେଇ ବର୍ଷା ପୁରୀଘାଟ ଥାନାରେ ଅଭିଯୋଗ କରିଥିଲେ। ଅନୁଭବ ମଧ୍ୟ ସୋସିଆଲ୍ ମିଡିଆରେ ବର୍ଷାଙ୍କ ବିରୋଧରେ ଭିଡିଓ ମାଧ୍ୟମରେ ମନ୍ତବ୍ୟ ଦେଇଥିଲେ। ଏହା ଭିତରେ ଅନୁଭବଙ୍କ ନାଁ ସହ ସାମ୍ବାଦିକା ଜାଗୃତିଙ୍କ ନାଁକୁ ଯୋଡ଼ି ଚର୍ଚ୍ଚା ହେଉଥିବାରୁ ଦୁଇଦିନ ପୂର୍ବେ ଜାଗୃତି ସ୍ପଷ୍ଟୀକରଣ ରଖିଥିଲେ। ଏବେ ବର୍ଷା ମହିଳା କମିଶନରେ ଅଭିଯୋଗ କରିବା ବିବାଦର ଆଉଏକ ନୂଆ ମୋଡ଼ ଆଣିଛି।
