ବାରିପଦା ଅଫିସ,୨୨ା୭: ମୟୂରଭଞ୍ଜ ଜିଲା ବଡ଼ସାହି ତହସିଲରେ କାର୍ଯ୍ୟରତ ଜଣେ କର୍ମଚାରୀ ବାଲିଖାଦାନ ସବ୍ ଲିଜଧାରୀଙ୍କଠାରୁ ଲକ୍ଷଲକ୍ଷ ଟଙ୍କା ଲାଞ୍ଚ ନେବା ଓ ପରେ ଅଧିକ ଅର୍ଥ ପାଇଁ ମୂଲଚାଲ କରିବା ଘଟଣା ସାମ୍ନାକୁ ଆସିଛି। ଏହାର ଭିଡିଓ ଭାଇରାଲ ହୋଇଛି।
ତହସିଲ କାର୍ଯ୍ୟାଳୟର ସମ୍ପୃକ୍ତ କର୍ମଚାରୀ ଜଣକ ସବ୍ଲିଜଧାରୀଙ୍କଠାରୁ ଟଙ୍କା ଆଦାୟ କରି ବାଲେଶ୍ୱରରେ ରହୁଥିବା ତତ୍କାଳୀନ ତହସିଲଦାରଙ୍କୁ ପ୍ରତିମାସରେ ୪ ଲକ୍ଷ ଟଙ୍କା ଦେଉଥିଲେ। ସେହିପରି ନିଜ ବାବଦରେ ପ୍ରତି ମାସରେ ବାଲିଘାଟ ପିଛା ୧ଲକ୍ଷ ଟଙ୍କା ନେଉଥିଲେ। ତେବେ ତାଙ୍କୁ ପ୍ରତିଶ୍ରୁତି ମୁତାବକ ଟଙ୍କା ନ ମିଳିବାରୁ ବକେୟା ଟଙ୍କା ନେବା ପାଇଁ ଜିଦ୍ କରୁଥିବା ଭାଇରାଲ୍ ଭିଡିଓରୁ ଜଣାପଡ଼ିଛି। ବର୍ତ୍ତମାନ ଉକ୍ତ କର୍ମଚାରୀ ଜଣକ ତହସିଲ କାର୍ଯ୍ୟାଳୟରେ କାର୍ଯ୍ୟରତ ଅଛନ୍ତି। ତହସିଲ ଅଧୀନରେ ଥିବା ବାଲି, ପଥର, ମୋରମ ଆଦି ସମସ୍ତ ଖାଦାନରୁ ସେ ମୋଟା ଅଙ୍କର ବଟି ଆଦାୟ କରୁଥିବା ନେଇ ତାଙ୍କ ନାମରେ ଅଭିଯୋଗ ହୋଇଛି। ତେବେ ଏହି ଭିଡିଓଟି କିଛି ଦିନ ତଳର ହୋଇଥିବା ବେଳେ ତତ୍କାଳୀନ ତହସିଲଦାରଙ୍କୁ ଦିଆଯାଉଥିବା ଟଙ୍କା ଓ କର୍ମଚାରୀ ଜଣକ ନେଇଥିବା ଟଙ୍କା ବାବଦରେ ଉଚ୍ଚସ୍ତରୀୟ ତଦନ୍ତ କରିବାକୁ ଅଞ୍ଚଳବାସୀ ଦାବି କରିଛନ୍ତି ା ଏ ସଂକ୍ରାନ୍ତରେ ବାରିପଦା ଉପ ଜିଲାପାଳ ଅନ୍ୟା ଦାସଙ୍କୁ ପଚାରିବାରୁ ଘଟଣାର ଅନୁଧ୍ୟାନ ପରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।