କାଏମା,୨୬ା୮(ଶିବପ୍ରସାଦ ମହାନ୍ତି): ଧର୍ମଶାଳା ବ୍ଲକ୍ ଅଧୀନ ବଡ଼କାଏମା ପଞ୍ଚାୟତର ଅନେକ ଗାଁ ପାଇପ୍ ଯୋଗେ ପାନୀୟ ଜଳ ପାଇବାରୁ ବଞ୍ଚତ୍ତ ହୋଇଥିବା ଅଭିଯୋଗ ହୋଇଛି। ପାନୀୟ ଜଳ ନ ମିଳିବାରୁ ଲୋକେ ହନ୍ତସନ୍ତ ହେଉଥିବାବେଳେ ପ୍ରଶାସନ ନୀରବ ଦ୍ରଷ୍ଟା ସାଜିଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ଏହି ପଞ୍ଚାୟତକୁ ବସୁଧା ଯୋଜନାରେ ପାନୀୟ ଜଳ ଯୋଗାଇ ଦେବାକୁ ବ୍ୟବସ୍ଥା କରାଯାଇଛି। ଉକ୍ତ ପ୍ରକଳ୍ପରୁ ୪ ହାଜରରୁ ଅଧିକ ଲୋକ ପାଣି ପାଉଥିଲେ। କିନ୍ତୁ ଏବେ ପ୍ରାୟ ୧ ହଜାର ଲୋକ ପାଣି ପାଉ ନ ଥିବା ଅଭିଯୋଗ କରିଛନ୍ତି। ପଞ୍ଚାୟତର ସେରପୁର, ସେରପୁର ଦଳିତସାହି, ଡିଗିରିପଡ଼ିଆ, ଗୋଗଳ, କାଏମା ବଜାର, ବେହେରା ସାହି, ମହଲା ସାହି, ଲକ୍ଷ୍ମୀ ସାହି, ଜାନକୀ ନଗର, ଖର୍ଦାସାହି ଆଦି ଅନେକ ଗାଁରେ ଏହି ପାନୀୟ ଜଳ ବ୍ୟବସ୍ଥା ପହଞ୍ଚି ପାରିନାହିଁ। କିଛି ସ୍ଥାନରେ ଟ୍ୟାପ୍ ଆଦିର ଚିହ୍ନବର୍ଣ୍ଣ ଦେଖିବାକୁ ମିଳୁନାହିଁ। ଠିକାଦାର ନିମ୍ନମାନର ଉପକରଣ ବ୍ୟବହାର କରିଥିବାରୁ ଅଳ୍ପ ଦିନମଧ୍ୟରେ ଅନେକ ସ୍ଥାନରେ ପାଇପଗୁଡ଼ିକ ଫାଟି ଯାଇଥିଲା। ନିମ୍ନମାନର ପାଇପ୍ ଦୁର୍ନୀତିକୁ ଢାଙ୍କିବାକୁ ବିଭିନ୍ନ ସ୍ଥାନାରେ ଫଟା ପାଇପକୁ ବଦଳାଇ ଦିଆଯାଇଥିଲା। କିନ୍ତୁ ପରେ ଅନେକ ସ୍ଥାନରୁ ପାଇପ୍ ଚୋରି ହେଇଯାଇଛି। ତେଣୁ ଲୋକଙ୍କ ନିକଟରେ ପାଣି ପହଞ୍ଚତ୍ ପାରୁନାହିଁ।
ସେହିପରି ଏହି ବ୍ଲକ ପୁରୁଣା ବଉଳମାଳ ପଞ୍ଚାୟତର ସୁକୁଟିଝର ନିକଟରେ ନିର୍ମିତ ବସୁଧା ଟାଙ୍କିରୁ ଲୋକେ ପାଣି ପାଉ ନ ଥିବା ଅଭିଯୋଗ କରିଛନ୍ତି। ପ୍ରକଳ୍ପଟି ୩ ଗାଁକୁ ପାଣି ଦେବାକୁ ନିର୍ମିତ ହୋଇଥିଲେ ମଧ୍ୟ ତାହା ଗୋଟିଏ ସାହିକୁ ଦେବାକୁ ଅକ୍ଷମ। ପାଣି ପମ୍ପ ଚଳାଇବାକୁ ନିଯୁକ୍ତ କର୍ମଚାରୀ ଠିକ ରୁପେ କାର୍ଯ୍ୟ କରୁ ନ ଥିବାରୁ ଟାଙ୍କିକୁ ପାଣି ଉଠୁନାହିଁ। ଫଳରେ ଗାଁ ମଝିରେ ବାସ କରୁଥିବା ଲୋକଙ୍କ ପାଖରେ ପାଣି ପହଞ୍ଚତ୍ ପାରୁନାହିଁ। ଉକ୍ତ ବ୍ଲକରେ ପାଖାପାଖି ୪୦ଟି ସ୍ଥାନରେ ଏହି ପ୍ରକଳ୍ପର କାମ ଆରମ୍ଭ ହୋଇଥିଲେ ବି କୋଉଠି ଶେଷ ହୋଇଛି ତ ଆଉ କେଉଁଠି ଅସମ୍ପୂର୍ଣ୍ଣ ରହିଛି।
ଯେଉଁ ସ୍ଥାନରେ ପାଇପ ଲଗାଯାଇଥିଲା ସେ ସବୁ ପାଣି ଆସିବା ପୂର୍ବରୁ ଅନେକ ସ୍ଥାନରେ ଫୁଟିଗଲାଣି। ଘରକୁ ଘର ପାଣି ପାଇପ ସଂଯୋଗ କରିବାର ବ୍ୟବସ୍ଥା ଥିଲେ ବି ସେ ସବୁ ସମ୍ପୂର୍ଣ୍ଣ ରୁପେ ସଂଯୋଗ କରାଯାଇନାହିଁ। କିଛି କର୍ମଚାରୀ ଏଠାରେ ବହୁ ବର୍ଷ ଧରି କାର୍ଯ୍ୟରତ ଥିବାରୁ କାର୍ଯ୍ୟରେ ଆଉ ସ୍ବଚ୍ଛତା ରହୁନାହିଁ। ତେଣୁ ଜିଲାପାଳ ଏହା ଉପରେ ତୁରନ୍ତ ଦୃଷ୍ଟିଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଏ ସମ୍ପର୍କରେ ବ୍ଲକ୍ ଆର୍ଡବ୍ଲ୍ୟୁଏସ୍ଏସ୍ର ସହକାରୀ ଯନ୍ତ୍ରୀ ରୁଦ୍ରକେଶରୀ ସେଠୀଙ୍କୁ ପଚାରିବାରେ ସେ କହିଛନ୍ତି, ଡିସେମ୍ବର ୨୩ରେ ମେଗା ପ୍ରୋଜେକ୍ଟ କାମ ଶେଷ କରାଯାଇ ସମସ୍ତଙ୍କୁ ଜଳଯୋଗାଣ କରାଯିବା କଥା। କିନ୍ତୁ ସରିବା ଭଳି ଲାଗୁନି ଓ କେବେ ଶେଷ ହେବ କହିହେବନି। ଉପରିସ୍ଥ ଅଧିକାରୀ ଏ ବିଷୟରେ କହିପାରିବେ।