ସମଗ୍ର ବିଶ୍ୱ ଏକ ବଡ଼ ପରିବାର ସଦୃଶ। ତେଣୁ ବସୁଧୈବ କୁଟୁମ୍ବକମ୍ ଭାବେ ଏହାକୁ ବିବେଚନା କରାଯାଇଥାଏ। ଧର୍ମ, ବର୍ଣ୍ଣ, ଜାତି ନିର୍ବିଶେଷରେ ବିଶ୍ୱର ପ୍ରତିଟି ଲୋକଙ୍କ ମଧ୍ୟରେ ସମନ୍ବୟ ଏକତାର ସଂକଳ୍ପ ସୃଷ୍ଟି ଦ୍ୱାରା ଏହା ସମ୍ଭବ ହୋଇପାରିଥାଏ। ଏହାର ଗୁରୁତ୍ୱକୁ ଉପଲବ୍ଧି କରି ପ୍ରତିବର୍ଷ ଜାନୁୟାରୀ ୧ ରେ ପାଳନ କରାଯାଉଥିବା ବିଶ୍ୱ ପରିବାର ଦିବସ (ଗ୍ଲୋବାଲ ଫ୍ୟାମିଲି ଡେ) ବିଶ୍ୱକୁ ଏକତାର ସକାରାତ୍ମକ ବାର୍ତ୍ତା ଦେଇଥାଏ।
ଏହି ଦିବସ ଅବସରରେ ସମସ୍ତେ ଏକ ବୋଲି ସଚେତନତା ସୃଷ୍ଟି କରାଯାଇଥାଏ। ସମଗ୍ର ବିଶ୍ୱରେ ସଂସ୍କୃତି, ଧର୍ମ, ଚାଲିଚଳଣ ଆଦି ଭିନ୍ନ ହୋଇପାରେ କିନ୍ତୁ, ସତ୍ୟ ହେଉଛି, ସମସ୍ତ ମାନବଜାତି ଏକ ବୃହତ ପରିବାର ଯାହା ଏକଜୁଟ ହେଲେ ହିଁ ବଞ୍ଚିପାରିବ ଏବଂ ସଫଳ ହୋଇପାରିବ। ଏହି ଲକ୍ଷ୍ୟ ହାସଲ କରିବା ପାଇଁ କେବଳ ଶାନ୍ତି ଏବଂ ଏକତାର ବାର୍ତ୍ତା ବିସ୍ତାର କରିବା ଆବଶ୍ୟକ ବୋଲି ବିଶ୍ୱ ପରିବାର ଦିବସ ଅବସରରେ ବିଭିନ୍ନ କାର୍ଯ୍ୟକ୍ରମ ମାଧ୍ୟମରେ ଅବଗତ କରାଯାଇଥାଏ।
୧୯୯୯ରେ ମିଳିତ ଜାତିସଂଘର ସାଧାରଣ ସଭା ବିଶ୍ୱ ଶାନ୍ତି ପାଇଁ ନିଷ୍ପତ୍ତି ଗ୍ରହଣ କରାଯାଇଥିଲା। ସଦସ୍ୟ ରାଷ୍ଟ୍ରମାନେ ବର୍ଷର ଗୋଟିଏ ନିର୍ଦ୍ଦିଷ୍ଟ ଦିନକୁ ଆନୁଷ୍ଠାନିକ ଭାବରେ ବିଶ୍ୱ ଶାନ୍ତି ପାଇଁ ଉତ୍ସର୍ଗ କରିବାକୁ ଚୂଡ଼ାନ୍ତ ଯୋଜନା ପ୍ରସ୍ତୁତ ହୋଇଥିଲା। ଏହାର ସକରାତ୍ମକ ପ୍ରଭାବ ଦେଖି ଗ୍ଲୋବାଲ ଫ୍ୟାମିଲି ଡେକୁ ଜାତିସଂଘ ଦ୍ୱାରା ୨୦୦୧ରେ ବାର୍ଷିକ କାର୍ଯ୍ୟକ୍ରମ ଘୋଷିତ କରାଯାଇଥିଲା।