ଭୁବନେଶ୍ୱର,୨।୬(ବ୍ୟୁରୋ): ସାରା ଦେଶରେ ବାଓ୍ବରିଆ ଗ୍ୟାଙ୍ଗ୍ର ନେଟ୍ଓ୍ବର୍କ ରହିଛି। ଓଡିଶା ସମେତ ବିଭିନ୍ନ ରାଜ୍ୟରେ ଆତଙ୍କ ଖେଳାଇ ଲୁଟ୍ପଟ୍ କରୁଥିବା ଏହି ଗ୍ୟାଙ୍ଗ୍ର ୪ଜଣଙ୍କୁ ଗିରଫ ପରେ କମିଶନରେଟ ପୋଲିସ୍ ଦିନକୁ ଦିନ ନୂଆ ତଥ୍ୟ ପାଉଛି। ଗ୍ୟାଙ୍ଗର ସହଯୋଗୀମାନେ ବିଭିନ୍ନ ରାଜ୍ୟରେ ଆଡ୍ଡା ଜମାଇ ଅପରାଧ ଜାରି ରଖିନ୍ତି। ଗ୍ୟାଙ୍ଗର ସମସ୍ତ ସଦସ୍ୟଙ୍କୁ ଧରିବାକୁ କମିଶନରେଟ ପୋଲିସ ପ୍ରୟାସ ଚଳାଇଛି। ଏଥିପାଇଁ ସ୍ବତନ୍ତ୍ର ଟିମ୍ ଗଠନ କରାଯାଇ ସେମାନଙ୍କୁ ଚିହ୍ନଟ କରିବା ସହ ଗତିବିଧିକୁ ନଜର ରଖିଛି। ଏନେଇ ଦିଲ୍ଲୀ କ୍ରାଇମବ୍ରାଞ୍ଚ ଓ ବିଭିନ୍ନ ରାଜ୍ୟର ପୋଲିସ ସହ ଯୋଗାଯୋଗ ରହିଛି। ସେମାନେ ବହୁ ସାହାଯ୍ୟ କରୁଥିବା ଡିସିପି ପ୍ରତୀକ ସିଂ କହିଛନ୍ତି। ତାଙ୍କ ସୂଚନାନୁସାରେ, କମିଶନରେଟ ପୋଲିସ ଗିରଫ କରିଥିବା ଉତ୍ତରପ୍ରଦେଶ ସାମ୍ଲି ଜିଲା ଝିଂଝାଣା ଥାନା ଅଞ୍ଚଳର ପ୍ରଦୀପ କୁମାର, ବିକାଶ, ରବି କୁମାର ଓ ବାବୁ ରାମ୍ଙ୍କ ନାମରେ ଏଯାବତ୍ ଶତାଧିକ ମାମଲା ରହିଥିବା ଜଣାପଡିଛି। ବିଶେଷକରି ଅଭିଯୁକ୍ତ ପ୍ରଦୀପ ଓ ରବିଙ୍କ ପୂର୍ବ ଆପରାଧିକ ରେକର୍ଡ ସଂକ୍ରାନ୍ତ ଅଧିକ ତଥ୍ୟ କମିଶନରେଟ ପୋଲିସ୍ର ହସ୍ତଗତ ହୋଇଛି। ରାଜସ୍ଥାନ, ଉତ୍ତରପ୍ରଦେଶ, ମଧ୍ୟପ୍ରଦେଶ, ବେଙ୍ଗାଲୁରୁ, ହରିୟାନା, ହାଇଦ୍ରାବାଦ ଆଦି ରାଜ୍ୟରେ ସେମାନଙ୍କ ନାମରେ ୧୦୦ରୁ ଅଧିକ ମାମଲା ରହିଛି। କେଉଁ ରାଜ୍ୟରେ ଏମାନେ ମୋଷ୍ଟ ୱାଣ୍ଟେଡ୍ ଅଛନ୍ତି ତାହାର ତଥ୍ୟ ପାଇଁ ବିଭିନ୍ନ ରାଜ୍ୟର ପୋଲିସ ସହ ଯୋଗାଯୋଗ ଜାରି ରହିଥିବା ଡିସିପି ସିଂ କହିଛନ୍ତି। ଅନ୍ୟପଟେ ଝାରପଡା ଜେଲରେ ଥିବା ୪ଅଭିଯୁକ୍ତଙ୍କ ଟିଆଇ ପରେଡ କରାଯାଉଛି। ୪ଟି ମାମଲାରେ ଅଭିଯୋଗାକାରୀମାନେ ଅଭିଯୁକ୍ତଙ୍କୁ ଚିହ୍ନଟ କରିଥିବା ସେ ସୂଚନା ଦେଇଛନ୍ତି।
ଭୁବନେଶ୍ୱର ସମେତ ରାଜ୍ୟର ବିଭିନ୍ନ ଜିଲାରେ ଏହି ଗ୍ୟାଙ୍ଗ୍ ସଦସ୍ୟମାନେ ସକ୍ରିୟ ଥିଲେ। ଛିନତାଇ, ଚୋରି କରି ଫେରାର ହୋଇଯାଇଥିଲେ। ଏନେଇ ବିଭିନ୍ନ ଥାନାରେ ଅଭିଯୋଗ ପରେ ଏଥିରେ ଗୋଟିଏ ଗ୍ୟାଙ୍ଗ କାମ କରୁଥିବା କମିଶନରେଟ ପୋଲିସ ସନ୍ଦେହ କରିବା ସହ ଧରିବାକୁ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଥିଲା। ପରେ ଗ୍ୟାଙ୍ଗର ୪ଜଣଙ୍କୁ ପୁରୀରୁ ଗିରଫ କରାଯିବା ସହ ସେମାନଙ୍କଠାରୁ ୧୬ଟି ସୁନାଚେନ୍, ୨ଟି ବାଇକ, ୨ଟି ମୋବାଇଲ ଓ ଅନ୍ୟାନ୍ୟ କାଗଜପତ୍ର ଜବତ ହୋଇଥିଲା। ସେମାନଙ୍କ ନାମରେ ବିଭିନ୍ନ ଜିଲାରେ ୨୭ରୁ ଅଧିକ ମାମଲା ଥିବା ତଦନ୍ତବେଳେ ପୋଲିସ ଜାଣିବାକୁ ପାଇଛି।
