ଢେଙ୍କାନାଳ ଅଫିସ,୧।୧୧: ମାତ୍ର ୧୨ବର୍ଷ ବୟସରେ ବ୍ରିଟିଶ ଶାସନ ବିରୋଧରେ ରଣହୁଙ୍କାର ଦେଇ ଗୁଳି ଖାଇ ଶହୀଦ ହୋଇଥିଲେ ବାଜି ରାଉତ। ଏଥିସହିତ ଭାରତୀୟ ସ୍ବାଧୀନତା ସଂଗ୍ରାମର ଇତିହାସରେ ତାଙ୍କ ନାମ ଯୋଡ଼ି ହୋଇଥିଲା ସର୍ବକନିଷ୍ଠ ଶହୀଦ ଭାବରେ। ଆତ୍ମ ବଳିଦାନ ଦେଇ ଦେଶପ୍ରେମର ଉଦାହରଣ ସୃଷ୍ଟି କରିଥିବା ବାଜିଙ୍କ ଜୀବନୀ ଖୁବ୍ଶୀଘ୍ର ଦେଖିବାକୁ ମିଳିବ ରୁପେଲି ପରଦାରେ। ଶହୀଦଙ୍କ ସଂଘର୍ଷମୟ ଜୀବନ କାହାଣୀକୁ ନେଇ ଚାଲିଥିବା ପ୍ରାମାଣିକ ଟେଲି ଚଳଚ୍ଚିତ୍ର ‘ମୁକ୍ତି ସଳିତା’ର ଶୁଟିଂ ରବିବାର ଶେଷ ହୋଇଛି। ଆସନ୍ତା ନଭେମ୍ବର ୧୫ ପୂର୍ବାହ୍ନ ସାଢ଼େ ୧୧ଟାରେ ଏହି ଚଳଚ୍ଚିତ୍ର ପ୍ରଦର୍ଶିତ ହେବ।
ଭୁବନେଶ୍ୱର ଦୂରଦର୍ଶନ କେନ୍ଦ୍ରର ପ୍ରଦୀପ କୁମାର ବେହେରାଙ୍କ ପ୍ରଯୋଜନାରେ ନିର୍ମିତ ଏହି ପ୍ରାମାଣିକ ସିନେମା ବାଜି ରାଉତଙ୍କ ଜନ୍ମମାଟି ଭୁବନ ବ୍ଲକ ନୀଳକଣ୍ଠପୁର, ବ୍ରାହ୍ମଣୀ ନଦୀକୂଳ ଏବଂ ଏହାର ଆଖପାଖ ଅଞ୍ଚଳରେ ଶୁଟିଂ କରାଯାଇଛି। ଗତ ମଙ୍ଗଳବାର ଢେଙ୍କାନାଳର ଆରାଧ୍ୟ ଦେବତା ମହାପ୍ରଭୁ ଶ୍ରୀବଳରାମଙ୍କ ନିକଟରେ ଆନୁଷ୍ଠାନିକ ଭାବେ ପୂଜା ଅନୁଷ୍ଠିତ ହେବା ପରେ ଜିଲାପାଳ ସରୋଜ କୁମାର ସେଠୀ ଏହାର ଶୁଭାରମ୍ଭ କରିଥିଲେ। ଅଲ୍ଟରନେଟିଭ୍ ରିଦିମ ଥିଏଟରର ଅଧ୍ୟକ୍ଷା ଡ. ପୁଷ୍ପଲତା ରଥଙ୍କ ସମେତ ଚଳଚ୍ଚିତ୍ରରେ ଅଭିନୟ କରିଥିବା ସମସ୍ତ କଳାକାର ଉପସ୍ଥିତ ଥିଲ।
ଚଳଚ୍ଚିତ୍ରରେ ବାଜି ରାଉତଙ୍କ ଭୂମିକାରେ ସାଇ ଚନ୍ଦନ ଦାସ ଅଭିନୟ କରିଥିବାବେଳେ ମନୋହର ଶତପଥୀ, କାମାକ୍ଷା ପ୍ରସାଦ ରଣା, ପ୍ରଶାନ୍ତ ମହାପାତ୍ର, ରାଜଲକ୍ଷ୍ମୀ, ମମତା, ହରେକୃଷ୍ଣ ସାହୁ, ମାଧବ ହେମ୍ବ୍ରମ, ଜୟଦେବ ଶତପଥୀ, ଜୟଚନ୍ଦ୍ର ମହାପାତ୍ର, ପ୍ରମୋଦ ଦାସ, ପ୍ରଜ୍ଞା ପଟ୍ଟନାୟକଙ୍କ ସମେତ ନୀଳକଣ୍ଠପୁର ଗ୍ରାମର କେତେଜଣ ଗ୍ରାମବାସୀ ଅନ୍ୟାନ୍ୟ ଭୂମିକାରେ ରହିଛନ୍ତି। ନାଟ୍ୟକାର ଦୀନେଶ ଦାସ ସିନେମାର ଚିତ୍ରନାଟ୍ୟ, ସଂଳାପ ରଚନା କରିଥିବାବେଳେ ଏହାର ନିର୍ଦ୍ଦେଶନା ମଧ୍ୟ ଦେଇଛନ୍ତି ା ସୁରେଶ କୁମାର ନାୟକଙ୍କ ପରିଚାଳନାରେ ସମସ୍ତ ଶୁଟିଂ ଶେଷ ହୋଇଛି।