ନୂଆଦିଲ୍ଲୀ,୨।୨ : ଭାରତରେ ବିବିସିକୁ ନିଷିଦ୍ଧ କରିବାକୁ ଆବେଦନ ଉପରେ ପ୍ରଧାନବିଚାରପତି(ସିଜେଆଇ) ଡି.ଓ୍ବାଇ ଚନ୍ଦ୍ରଚୂଡ଼ ଶୁକ୍ରବାର ପୁଣି ଶୀଘ୍ର ଶୁଣାଣି କରିବା ନେଇ ଆବେଦନ ପାଇଁ ଆବେଦନକାରୀଙ୍କୁ କହିଛନ୍ତି। ହିନ୍ଦୁ ସେନା ଅଧ୍ୟକ୍ଷ ବିଷ୍ଣୁ ଗୁପ୍ତା ଏହି ଆବେଦନ କରିଛନ୍ତି।
୨୦୦୨ ଗୁଜରାଟ ଦଙ୍ଗା ସହ ଜଡିତ ବ୍ରିଟିଶ ବ୍ରୋଡକାଷ୍ଟିଂ କର୍ପୋରେଶନ (ବିବିସି) ର ଡକ୍ୟୁମେଣ୍ଟାରୀ ଇଣ୍ଡିଆ: ଦ ମୋଦି କୋଶ୍ଚିନର ପ୍ରସାରଣ ଉପରେ ସମ୍ପୂର୍ଣ୍ଣ ପ୍ରତିବନ୍ଧକ ଲଗାଇବାକୁ ସୁପ୍ରିମକୋର୍ଟରେ ଏକ ଜନସ୍ବାର୍ଥ ମାମଲା ଦାଖଲ କରାଯାଇଛି। ଏହି ଆବେଦନରେ ଭାରତରେ ବ୍ରିଟିଶ ବ୍ରୋଡକାଷ୍ଟିଂ କର୍ପୋରେଶନ ଉପରେ ପ୍ରତିବନ୍ଧକ ଲଗାଇବାକୁ ଦାବି ହୋଇଛି। ଭାରତର ଏକତା ଏବଂ ଅଖଣ୍ଡତାକୁ ଭାଙ୍ଗିବା ପାଇଁ ବିବିସିର ଷଡ଼ଯନ୍ତ୍ରକୁ ଏନଆଇଏ ଦ୍ୱାରା ଯାଞ୍ଚ୍ କରାଯାଉ ବୋଲି ପିଟିଶନରେ ଦାବି କରାଯାଇଛି।
ଏହି ଆବେଦନରେ ଦର୍ଶାଯାଇଛି ଯେ ଏହି ଡକ୍ୟୁମେଣ୍ଟାରି କେବଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାବମୂର୍ତ୍ତିକୁ ଖରାପ କରିବା ପାଇଁ ଉଦ୍ଦିଷ୍ଟ ନୁହେଁ, ବରଂ ଭାରତର ସାମାଜିକ୍ୟବସ୍ଥାକୁ ନଷ୍ଟ କରିବା ପାଇଁ ବିବିସି ଦ୍ୱାରା ହିନ୍ଦୁ ବିରୋଧୀ ପ୍ରଚାର ମଧ୍ୟ ହୋଇଛି। ଭାରତୀୟ ସ୍ବାଧୀନତା ସମୟରୁ ବିବିସି ଭାରତ ବିରୋଧୀ ଭାବେ ଛିଡା ହୋଇଛି। ସ୍ବାଧୀନ ଭାରତରେ ବିବିସି ଭାରତ ବିରୋଧୀ ପ୍ରଚାର କାର୍ଯ୍ୟ କରୁଛି।
ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ନେତୃତ୍ୱରେ କେନ୍ଦ୍ର ସରକାର ଦୁଇ ବର୍ଷ ଧରି ଭାରତରେ ବିବିସି ଉପରେ ପ୍ରତିବନ୍ଧକ ଲଗାଇଥିଲେ। ଭାରତରେ ପୋଷ୍ଟ ହୋଇଥିବା ବ୍ରିଟିଶ ବିବିସି କର୍ମଚାରୀଙ୍କୁ ଦେଶ ଛାଡିବାକୁ କୁହାଯାଇଥିଲା। ଭାରତୀୟ କର୍ମଚାରୀଙ୍କୁ କମ୍ପାନୀ ଛାଡିବାକୁ କୁହାଯାଇଥିଲା।