ନୂଆଦିଲ୍ଲୀ,୨୮।୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ବିବିସିର ବିବାଦୀୟ ଡକ୍ୟୁମେଣ୍ଟାରି ଦିଲ୍ଲୀ ୟୁନିଭର୍ସିଟି (ଡିୟୁ)ରେ ପ୍ରଦର୍ଶନ ଲାଗି ଯୋଜନା ହୋଇଥିବାବେଳେ ଏହା ପୂର୍ବରୁ ଶୁକ୍ରବାର କଳା ବିଭାଗରେ ୧୪୪ ଧାରା ଲାଗୁ କରାଯାଇଛି। ଅଧିକ ସଂଖ୍ୟାରେ ପିଲା ଏକାଠି ହେବା ଉପରେ ନିଷେଧାଦେଶ ଲଗାଯାଇଛି। ଏନ୍ଏସ୍ୟୁଆଇ-କେଏସ୍ୟୁ ପକ୍ଷରୁ ଡକ୍ୟୁମେଣ୍ଟାରି ପ୍ରଦର୍ଶନର ବ୍ୟବସ୍ଥା ହୋଇଥିଲା। ଉକ୍ତ ଡକ୍ୟୁମେଣ୍ଟାରିକୁ ସରକାର ବେଆଇନ ଘୋଷଣା କରିଥିବାରୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ପ୍ରଦର୍ଶନ ପାଇଁ ଅନୁମତି ଦେବେ ନାହିଁ ଏବଂ ଏନେଇ ପୋଲିସକୁ ଜଣାଇ ଦିଆଯାଇଛି ବୋଲି ଡିୟୁ ପ୍ରୋକ୍ଟର ରଜନୀ ଆବ୍ବି କହିଥିଲେ। ସେ କହିଛନ୍ତି, ଡକ୍ୟୁମେଣ୍ଟାରି ପ୍ରଦର୍ଶନ ଲାଗି ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ଅନୁମତି ଲୋଡ଼ାଯାଇ ନାହିଁ। ତେବେ ଏନ୍ଏସ୍ୟୁଆଇ ଆର୍ଟ ଫାକଲ୍ଟିରେ ପ୍ରଦର୍ଶନ ଲାଗି ଯୋଜନା କରିଥିବାରୁ ସୂଚନା ମିଳିଥିବା ସେ କହିଛନ୍ତି।
ବିବିସି ଡକ୍ୟୁମେଣ୍ଟାରି ପ୍ରଦର୍ଶନ ଲାଗି ଶୁକ୍ରବାର ଅପରାହ୍ନ ୪ଟାରେ ଆର୍ଟ ଫାକଲ୍ଟି ଗେଟ୍ ବାହାରେ କେତେଜଣ ପହଞ୍ଚତ୍ଥିଲେ। ଏହି ଘଟଣା ଉକ୍ତ ଅଞ୍ଚଳରେ ଶାନ୍ତି ବ୍ୟାହତ କରିବା ଆଶଙ୍କା ଥିବାରୁ ସେମାନଙ୍କୁ ସେଠାରୁ ପଳାଇଯିବାକୁ କୁହାଯାଇଥିଲା। ସେମାନେ ନ ଯିବାରୁ ଶାନ୍ତିପୂର୍ଣ୍ଣ ଭାବେ ଅଟକ ରଖାଯାଇଥିବା ଉତ୍ତର ଦିଲ୍ଲୀ ଡିସିପି କହିଛନ୍ତି। କ୍ୟାମ୍ପସ୍ରୁ ମୋଟ ୨୪ ଜଣଙ୍କୁ ଅଟକ ରଖାଯାଇଛି। ବିବିସି ଡକ୍ୟୁମେଣ୍ଟାରି ପ୍ରଦର୍ଶନକୁ ନେଇ ଜବାହରଲାଲ୍ ନେହେରୁ ବିଶ୍ୱବିଦ୍ୟାଳୟ (ଜେଏନ୍ୟୁ) ସମେତ ବିଭିନ୍ନ ୟୁନିଭର୍ସିଟିରେ ଅଶାନ୍ତି ଦେଖାଦେଇଛି। ଡକ୍ୟୁମେଣ୍ଟାରି ପ୍ରଦର୍ଶନ ବନ୍ଦ କରିବା ଲାଗି କର୍ତ୍ତୃପକ୍ଷ ମଙ୍ଗଳବାର କ୍ୟାମ୍ପସ୍କୁ ବିଜୁଳି ଯୋଗାଣ ବନ୍ଦ କରିଦେବାରୁ ଉତ୍ତେଜନା ପ୍ରକାଶ ପାଇବା ସହ ଟେକାମାଡ଼ ହୋଇଥିଲା। ଗୁରୁବାର କୋଲକାତାର ଯାଦବପୁର ବିଶ୍ୱବିଦ୍ୟାଳୟରେ ବିବାଦୀୟ ଡକ୍ୟୁମେଣ୍ଟାରି ପ୍ରଦର୍ଶନ କରାଯାଇଥିଲା।