ନୂଆଦିଲ୍ଲୀ,୨୨।୧: ୨୦୦୨ ଗୁଜରାଟ ଦଙ୍ଗା ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ବିବିସି ପ୍ରସ୍ତୁତ କରିଥିବା ଡକ୍ୟୁମେଣ୍ଟାରି ‘ଇଣ୍ଡିଆ: ଦି ମୋଦି କୋଶ୍ଚିନ୍’ ଲିଙ୍କ୍ର ୟୁଟ୍ୟୁବ୍ ଭିଡିଓ ଏବଂ ଟୁଇଟର ପୋଷ୍ଟ ବ୍ଲକ୍ କରିବାକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି। ସୂଚନା ପ୍ରଯୁକ୍ତି ନିୟମାବଳୀ, ୨୦୨୧ରେ ଦିଆଯାଇଥିବା ଜରୁରୀ କ୍ଷମତା ଅନୁଯାୟୀ ସୂଚନା ଓ ପ୍ରସାରଣ ମନ୍ତ୍ରଣାଳୟ ସଚିବ ଅପୂର୍ବ ଚନ୍ଦା ଶୁକ୍ରବାର ୫୦ଟି ଟୁଇଟ୍କୁ ବ୍ଲକ କରିବା ଲାଗି ନିର୍ଦ୍ଦେଶନାମା ଜାରି କରିଛନ୍ତି। ବିବିସିର ଉକ୍ତ ବିବାଦୀୟ ଡକ୍ୟୁମେଣ୍ଟାରିକୁ ଭାରତ ସମାଲୋଚନା କରିବା ପରେ ବ୍ରିଟିଶ ପ୍ରଧାନମନ୍ତ୍ରୀ ଋଷି ସୁନକ ନିଜକୁ ଏଥିରୁ ଦୂରେଇ ରଖିଥିଲେ। ତେବେ ଉକ୍ତ ଡକ୍ୟୁମେଣ୍ଟାରିକୁ ଅନେକ ଟୁଇଟ୍ କରିବା ସହ ୟୁଟ୍ୟୁବ୍ ଭିଡିଓ ଶେୟାର କରିଥିଲେ। ସେମାନଙ୍କ ମଧ୍ୟରେ ତୃଣମୂଳ କଂଗ୍ରେସ ଏମ୍ପି ଡେରେକ୍ ଓ’ବ୍ରିଏନ୍ ଏବଂ କେତେଜଣ ବିରୋଧୀ ଦଳ ନେତା ରହିଛନ୍ତି। କେନ୍ଦ୍ର ସରକାରଙ୍କ ନିର୍ଦ୍ଦେଶ ପରେ ସେହି ଟୁଇଟ୍ ଏବଂ ୟୁଟ୍ୟୁବ୍ ଭିଡିଓଗୁଡ଼ିକୁ ହଟାଇ ଦିଆଯାଇଛି।
ବହିର୍ବ୍ୟାପାର, ସ୍ବରାଷ୍ଟ୍ର ଏବଂ ସୂଚନା ପ୍ରସାରଣ ସମେତ ବିଭିନ୍ନ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ବିବିସି ଡକ୍ୟୁମେଣ୍ଟାରିକୁ ଅନୁଧ୍ୟାନ କରିବା ପରେ ଏହା ସରକାରଙ୍କ ସଚ୍ଚୋଟତା ଏବଂ ସୁପ୍ରିମକୋର୍ଟଙ୍କ ବିଶ୍ୱସନୀୟତା ଉପରେ ଆକ୍ଷେପ ଏବଂ ବିଭିନ୍ନ ସମ୍ପ୍ରଦାୟ ମଧ୍ୟରେ ବିଭେଦର ମଞ୍ଜି ବୁଣିବା ପାଇଁ ଉଦ୍ୟମ ବୋଲି ଜାଣିବାକୁ ପାଇଛନ୍ତି। ଭାରତରେ ବିଦେଶୀ ସରକାରଙ୍କ କାର୍ଯ୍ୟ ନିରାଧାର ଅଭିଯୋଗ ଆଣିଥିବା ସେମାନେ ମତ ଦେଇଛନ୍ତି। ଉକ୍ତ ଡକ୍ୟୁମେଣ୍ଟାରୀ ଭାରତର ସାର୍ବଭୌମତ୍ୱ ଏବଂ ସଂହତିକୁ ଅବମାନନା କରିବା ସହ ବିଦେଶୀ ରାଷ୍ଟ୍ର ସହିତ ବନ୍ଧୁତ୍ୱପୂର୍ଣ୍ଣ ସମ୍ପର୍କକୁ ପ୍ରଭାବିତ କରିବା ପାଇଁ ଉଦ୍ଦିଷ୍ଟ ବୋଲି ସେମାନେ ଅଭିଯୋଗ କରିଛନ୍ତି। ପ୍ରଧାନମନ୍ତ୍ରୀ ମୋଦିଙ୍କ ଉପରେ ବିବିସିର ଡକ୍ୟୁମେଣ୍ଟାରିକୁ ୩୦୨ ଜଣ ପୂର୍ବତନ ବିଚାରପତି, ପୂର୍ବତନ ପ୍ରଶାସନିକ ଅଧିକାରୀ ଏବଂ ବରିଷ୍ଠ ନାଗରିକ ନିନ୍ଦା କରିଛନ୍ତି। ଏହା ଆମ ନେତାଙ୍କ ବିରୋଧରେ ଏକ ଅଭିପ୍ରେରିତ ଅଭିଯୋଗ ଫର୍ଦ୍ଦ ବୋଲି ସେମାନେ କହିଛନ୍ତି।