ବ୍ରହ୍ମପୁର ଅଫିସ,୧୫ା୧୧: ବିସିସି (ବ୍ରହ୍ମପୁର ସମବାୟ କେନ୍ଦ୍ର) ବ୍ୟାଙ୍କର ନୂଆ ସଭାପତି କିଏ ହେବେ ସେନେଇ ସମ୍ପ୍ରତି ଆରମ୍ଭ ହୋଇଯାଇଛି ରାଜନୈତିକ ଚର୍ଚ୍ଚା। ଗଞ୍ଜାମ ଓ ଗଜପତି ଜିଲାର ଏହି ବୃହତ୍ତମ ସମବାୟ ଅନୁଷ୍ଠାନ ସଭାପତି ନିର୍ବାଚନ ପାଇଁ ଆସନ୍ତା ବୁଧବାର ନାମାଙ୍କନ ଦାଖଲ ହେବ ଏବଂ ଆବଶ୍ୟକ ସ୍ଥଳେ ଶୁକ୍ରବାର ପୂର୍ବାହ୍ନରେ ଭୋଟ ଗ୍ରହଣ କରାଯିବ। ବ୍ୟାଙ୍କର ଦୁଇ ଜିଲାରୁ ୧୫ ଜୋନ ଲାଗି ଇତିମଧ୍ୟରେ ନିର୍ଦ୍ଦେଶକ ନିର୍ବାଚନ ସରିଛି ଓ ଫଳାଫଳ ନିର୍ବାଚନ ଅଧିକାରୀଙ୍କ ପକ୍ଷରୁ ଘୋଷିତ ହୋଇଛି। ଗଜପତି ଜିଲାର ୩ ଜୋନ୍ ମଧ୍ୟରୁ ଦୁଇଟିରେ ଭାଜପା ସମର୍ଥିତ ଏବଂ ଗୋଟିଏ ଜୋନରେ ଶାସକ ବିଜେଡି ସମର୍ଥିତ ନିର୍ଦ୍ଦେଶକ ନିର୍ବାଚିତ ହୋଇଛନ୍ତି।
ସେହିପରି ଗଞ୍ଜାମର ୧୨ ଜୋନ୍ରୁ ୨, ୭, ୮, ୯ ଓ ୧୨ ନଂ ଜୋନ୍ରୁ ବିଜେଡି ସମର୍ଥିତ ପ୍ରାର୍ଥୀମାନେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି। ଅବଶିଷ୍ଟ ଜୋନ୍ରୁ ୧, ୩, ୬, ୧୧ ରୁ ନିର୍ବାଚିତ ନିର୍ଦ୍ଦେଶକ ଶାସକ ଦଳର ବିଦ୍ରୋହୀ। ୫ନଂ ଜୋନ୍ର ନିର୍ଦ୍ଦେଶକ ସିପିଆଇ ସମର୍ଥକ ହୋଇଥିବା ବେଳେ ୧୦ନଂ ଜୋନ୍ରୁ ବ୍ୟାଙ୍କର ଜଣେ ଅବସରପ୍ରାପ୍ତ କର୍ମଚାରୀ ସ୍ବାଧୀନ ପ୍ରାର୍ଥୀ ଭାବେ ଜିତିଛନ୍ତି। ପ୍ରତିଦ୍ୱନ୍ଦ୍ୱିତା ହୋଇଥିବା ୪ନଂ ଜୋନ୍ରୁ ବିଜେଡି ମନୋନୀତ ପ୍ରାର୍ଥୀ ନିର୍ଦ୍ଦେଶକ ଭାବେ ନିର୍ବାଚିତ ହୋଇଛନ୍ତି।
ସୂଚନାଯୋଗ୍ୟ, ଶତାଧିକ ବର୍ଷର ଏହି ସମବାୟ ବ୍ୟାଙ୍କ ନିର୍ଦ୍ଦେଶକ ନିର୍ବାଚନରେ ଶାସକଦଳର ପ୍ରାର୍ଥୀ ଚୟନରେ ବିଭ୍ରାଟ ଯୋଗୁ ବିଦ୍ରୋହ ସୃଷ୍ଟି ହୋଇଥିଲା। ରଙ୍ଗେଇଲୁଣ୍ଡା ବ୍ଲକର ଦୁଇ ଜଣଙ୍କୁ ଖଲ୍ଲିକୋଟ ଓ ଛତ୍ରପୁର ଜୋନ୍ରୁ ପ୍ରାର୍ଥୀ କରାଯାଇଥିବାରୁ ଦୁଇଜଣ ଯାକ ପରାସ୍ତ ହୋଇଥିଲେ। ବ୍ରହ୍ମପୁର ଜୋନ୍ରେ ମଧ୍ୟ ରଙ୍ଗେଇଲୁଣ୍ଡା ବ୍ଲକର ଜଣେ ମହିଳାଙ୍କୁ ଶାସକ ଦଳ ପ୍ରାର୍ଥୀ କରିବାରୁ ବିଦ୍ରୋହୀ ପ୍ରାର୍ଥୀ ନିର୍ବାଚିତ ହୋଇଛନ୍ତି। ଅପରପକ୍ଷରେ ପ୍ରଥମକରି ବିଜେଡିର ବିଦ୍ରୋହୀ ପ୍ରାର୍ଥୀମାନେ ଅଧିକ ସଂଖ୍ୟକ ନିର୍ବାଚିତ ହୋଇଛନ୍ତି। ସଭାପତି ପଦ ପାଇଁ ଅନେକ ଆଶାୟୀ ଅଛନ୍ତି। କାହାକୁ କରାଯିବ ଦଳର ଉପର ମହଲ ନିଷ୍ପତ୍ତି ନେବ ବୋଲି କୁହାଯାଉଛି। ନାମାଙ୍କନ ଦିନ ପ୍ରାର୍ଥୀଙ୍କ ନାମ ଘୋଷଣା ହେବାର ଜିଲା ବିଜେଡି ସଭାପତି ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ସୂଚାଇଛନ୍ତି। ତେବେ ଏହି ଗୁରୁତ୍ୱପୂର୍ଣ୍ଣ ବ୍ୟାଙ୍କ ସଭାପତି ନିମନ୍ତେ ସମବାୟରେ ବିଶେଷ ଅଭିଜ୍ଞତା ଥିବା ନିର୍ଦ୍ଦେଶକଙ୍କୁ ବିଜେଡି ମନୋନୀତ କରିବାକୁ ବିଭିନ୍ନ ମହଲରୁ ଦାବି କରାଯାଇଛି।
