ଅହମ୍ମଦାବାଦ,୨୪।୧୨: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ର ୨୦୨୨ ସଂସ୍କରଣରେ ଦୁଇଟି ନୂଆ ଦଳ ସହ ମୋଟ ୧୦ ଟିମ୍ ଅଂଶଗ୍ରହଣ କରିବେ। ଏ ନେଇ ଗୁରୁବାର ବସିଥିବା ବିସିସିଆଇର ବାର୍ଷିକ ସାଧାରଣ ବୈଠକ (ଏଜିଏମ୍)ରେ ନିଷ୍ପତ୍ତି ନିଆଯାଇଛି। ୨୦୨୨ ଆଇପିଏଲରେ ଦୁଇଟି ନୂଆ ଦଳ ଖେଳିବେ ବୋଲି ଜଣେ ବୋର୍ଡ ଅଫିସିଆଲ କହିଛନ୍ତି।
ଏଜିଏମ୍ରେ ଆଉ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ତାହା ହେଲା କ୍ରିକେଟର ଟି୨୦ ଫର୍ମାଟକୁ ୨୦୨୮ ଲସ୍ ଏଞ୍ଜେଲ୍ସ ଅଲିମ୍ପିକ୍ସରେ ସାମିଲ କରିବାକୁ ବିଡ୍ ଦାଖଲ କରିଛି ଆଇସିସି। ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ସ୍ପଷ୍ଟିକରଣ ଦେବା ପରେ ଆଇସିସିକୁ ସମର୍ଥନ କରିବାକୁ ନିଷ୍ପତ୍ତି ନେଇଛି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)। ଆଉ ପୁରୁଷ ଓ ମହିଳା ପ୍ରଥମ ଶ୍ରେଣୀ କ୍ରିକେଟରଙ୍କୁ କୋଭିଡ୍-୧୯ କାରଣରୁ ଖେଳାଯାଇ ନ ଥିବା ଘରୋଇ ସିଜିନ ପାଇଁ କ୍ଷତିପୂରଣ ପ୍ରଦାନ କରାଯିବ। ଏଥିସହ ଭେଟେରାନ କଂଗ୍ରେସ ନେତା ରାଜିବ ଶୁକ୍ଲାଙ୍କୁ ବିସିସିଆଇର ଉପ ସଭାପତି ପଦରେ ନିଯୁକ୍ତ କରାଯାଇଛି।