ନୂଆଦିଲ୍ଲୀ,୨୫।୩: ପୁରୁଷ ଭଳି ମହିଳା ଆଇପିଏଲ୍ ଆୟୋଜନ କରିବାକୁ ସବୁଜ ସଙ୍କେତ ଦେଇଛି ବିସିସିଆଇ। ୨୦୨୨ ଆଇପିଏଲ୍ ଆରମ୍ଭ ପୂର୍ବରୁ ଆୟୋଜିତ ପରିଚାଳନା ପରିଷଦ ବୈଠକରେ ଏନେଇ ବିସ୍ତୃତ ଭାବେ ଆଲୋଚନା କରାଯାଇଛି। ଏଣୁ ଆସନ୍ତା ବର୍ଷ ଅର୍ଥାତ ୨୦୨୩ରେ ଏହା ଆରମ୍ଭ ହୋଇପାରେ। ୬ଟି ଦଳରୁ ଏହା ଆରମ୍ଭ ହେବାର ସମ୍ଭାବନା ରହିଛି।
ଆଇପିଏଲ୍ ପରିଚାଳନା ପରିଷଦ ବୈଠକରେ ଆଲୋଚନା ହେବା ପରେ ଏଜିଏମ୍ ବୈଠକରେ ମହିଳା ଆଇପିଏଲ୍ ନେଇ ଆଲୋଚନା ହେବ। ୨୦୨୩ରେ ୬ଟିମ୍ ସହ ଲିଗ୍ ଖେଳାଯିବା ନେଇ ସହମତି ପ୍ରକାଶ ପାଇଛି। ବର୍ତ୍ତମାନର ଫ୍ରାଞ୍ଚାଇଜ୍ଙ୍କୁ ଦଳ କିଣିବାର ସୁଯୋଗ ଦିଆଯିବ ବୋଲି ଜଣାପଡ଼ିଛି।
ତେବେ ମହିଳା ଆଇପିଏଲ୍ ଆରମ୍ଭ ପୂର୍ବରୁ ଚଳିତ ବର୍ଷ ମହିଳା ଚ୍ୟାଲେଞ୍ଜର୍ସ ଟୁର୍ନାମେଣ୍ଟ ଆୟୋଜନ କରାଯିବ। ପୁଣେରେ ଏହା ଅନୁଷ୍ଠିତ ହେବ। କରୋନା ଯୋଗୁ ୨୦୨୦,୨୧ରେ ଦେଶରେ ଏହା ଆୟୋଜନ କରାଯାଇପାରି ନ ଥିଲା। ଏଭଳି ପରିସ୍ଥିତିରେ ଦୁଇବର୍ଷ ପରେ ପୁଣିଥରେ ଭାରତ ଏବଂ ବିଦେଶର ମହିଳା ଖେଳାଳିମାନେ ଟି-୨୦ ଫର୍ମାଟରେ ପରସ୍ପରକୁ ଚ୍ୟାଲେଞ୍ଜ କରୁଥିବା ନଜର ଆସିବେ। ବର୍ତ୍ତମାନ ତାରିଖ ବିଷୟରେ କୌଣସି ଘୋଷଣା ହୋଇନାହିଁ। ହେଲେ ମେ’ରେ ଏହି ଟୁର୍ନାମେଣ୍ଟ ହେବ ବୋଲି ଅନୁମାନ କରାଯାଉଛି।
