ଦୁବାଇ, ୧୨ା୯ (ପି.ଟି.):ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ଠାରୁ ଆବଶ୍ୟକ କ୍ଲିୟରାନ୍ସ ହାସଲ କରିବା ପରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ପେସ୍ ବୋଲର ଦୀପକ ଚହର ଶୁକ୍ରବାରଠାରୁ ତାଙ୍କ ଟ୍ରେନିଂ ଆରମ୍ଭ କରିଛନ୍ତି। ଦୀପକ କୋଭିଡ୍-୧୯ ପଜିଟିଭ ଥିଲେ। ଦୁଇଥର ନେଗେଟିଭ୍ ଟେଷ୍ଟ ପରେ ବୁଧବାର ସେ ସିଏସ୍କେର ବାୟୋ ବବଲରେ ପ୍ରବେଶ କରିଥିଲେ। ନେଟ୍ସ ପୂର୍ବରୁ ବିସିସିଆଇର ପ୍ରୋଟୋକଲ ଅନୁସାରେ ତାଙ୍କର ଏକ କାଡିଓ ଭାସ୍କୁଲାର ଟେଷ୍ଟ ହୋଇଥିଲା। ଏଥିରେ ଉତ୍ତୀର୍ଣ୍ଣ ହେବାପରେ ସେ ଶୁକ୍ରବାରଠାରୁ ଅଭ୍ୟାସ ଆରମ୍ଭ କରିଛନ୍ତି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଉଦ୍ଘାଟନୀ ମ୍ୟାଚ ସେପ୍ଟେମ୍ବର ୧୯ରେ ଖେଳାଯିବ। ଏଥିରେ ଗତବର୍ଷରୁ ରନର୍ସଅପ୍ ସିଏସ୍କେ ଗତଥରର ଚାମ୍ପିୟନ ମୁମ୍ବାଇ ଇଣ୍ଡିଆନ୍ସକୁ ଭେଟିବ। ୧୯ଜଣ ସଦସ୍ୟ କରୋନା ପଜିଟିଭ ଜଣାପଡ଼ିବାରୁ ଚେନ୍ନାଇ ସୁପର କିଙ୍ଗ୍ସ ଶେଷରେ ଟ୍ରେନିଂ ଆରମ୍ଭ କରିଛି। ପଜିଟିଭ ଥିବା ଦଳର ଅନ୍ୟ ଜଣେ ବ୍ୟାଟ୍ସମ୍ୟାନଙ୍କର ଶନିବାର ଟେଷ୍ଟ ହେବ।
ସୁରେଶ ରାଇନା ଓ ହରଭଜନ ସିଂ ବ୍ୟକ୍ତିଗତ କାରଣ ଦର୍ଶାଇ ଟୁର୍ନାମେଣ୍ଟରୁ ଓହରିଯାଇଥିବାରୁ ଦଳ ପାଇଁ ଏହା ଧକ୍କା ସଦୃଶ ହୋଇଛି। ସିଏସ୍କେ ସିଇଓ କାଶି ବିଶ୍ୱନାଥନ କହିଛନ୍ତି, ଆମେ ସିନିୟର ଖେଳାଳିଙ୍କ ଅନୁପସ୍ଥିତି ଅନୁଭବ ନିଶ୍ଚୟ କରିବୁ। କିନ୍ତୁ ଅନ୍ୟମାନଙ୍କୁ ସେମାନଙ୍କ ଦକ୍ଷତା ପ୍ରତିପାଦନ କରିବା ଲାଗି ସୁଯୋଗ ରହିବ।