ମୁମ୍ବାଇ,୩୦।୧୨: ଭାରତୀୟ କ୍ରିକେଟ ଦଳର ଉଇକେଟ କିପର ବ୍ୟାଟ୍ସମ୍ୟାନ୍ ଋଷଭ ପନ୍ତ ଶୁକ୍ରବାର ସକାଳେ ଏକ ସଡ଼କ ଦୁର୍ଘଟଣାରେ ଗୁରୁତର ଆହତ ହୋଇଛନ୍ତି। ଦିଲ୍ଲୀରୁ ନିଜ ସହର ରୁର୍କି ଯାଉଥିବା ପନ୍ତଙ୍କ କାର ସକାଳ ୫.୩୦ରେ ଡିଭାଇଡରକୁ ଧକ୍କା ଦେଇଥିଲା। ପନ୍ତଙ୍କ କାର୍ରେ ନିଆଁ ଲାଗି ଯାଇଥିଲା। ହେଲେ ସୌଭାଗ୍ୟବଶତଃ ତାଙ୍କୁ ଉଦ୍ଧାର କରାଯାଇ ଜିଲା ଡାକ୍ତରଖାନାରେ ପହଞ୍ଚା ଯାଇଥିଲା। ପରେ ତାଙ୍କୁ ଡେରାଡୁନର ମ୍ୟାକ୍ସ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ସେଠାରେ ତାଙ୍କର ଚିକିତ୍ସା ଚାଲିଛି। ଏଭଳି ପରିସ୍ଥିତିରେ ବିସିସିଆଇ ପକ୍ଷରୁ ପନ୍ତଙ୍କ ସ୍ବାସ୍ଥ୍ୟାବସ୍ଥା ଏବଂ ଆଘାତ ସମ୍ପର୍କରେ ଏକ ଅପ୍ଡେଟ୍ ଜାରି କରାଯାଇଛି।
ପନ୍ତଙ୍କ ଦୁର୍ଘଟଣା ସମ୍ପର୍କରେ ବିସିସିଆଇ ଏକ ପ୍ରେସ ବିଜ୍ଞପ୍ତି ଜାରି କରି କହିଛି, ଶୁକ୍ରବାର ସକାଳେ ରୁର୍କିରେ ଏକ ସଡ଼କ ଦୁର୍ଘଟଣାରେ ପନ୍ତ ଆହତ ହୋଇଛନ୍ତି। ଦୁର୍ଘଟଣା ପରେ ତାଙ୍କୁ ସକ୍ଷମ ମଲ୍ଟି ସ୍ପେସିଆଲିଟି ହସ୍ପିଟାଲ ଏବଂ ଟ୍ରମା ସେଣ୍ଟରରେ ଭର୍ତ୍ତି କରାଯାଇଥିଲା। ସେଠାରେ ଦୁର୍ଘଟଣା ପରେ ଆହତ ଅବସ୍ଥାରେ ତାଙ୍କୁ ଚିକିତ୍ସା କରାଯାଇଥିଲା।
ସେହିଭଳି ବିସିସିଆଇ ଆଘାତର ବିଷୟରେ ସୂଚନା ଦେଇ କହିଛି, ପନ୍ତଙ୍କ କପାଳର ଦୁଇଟି ସ୍ଥାନରେ ଆଘାତ ଲାଗିଛି। ତାଙ୍କ ଡାହାଣ ଆଣ୍ଠୁରେ ଏକ ଲିଗାମେଣ୍ଟ ଚିରି ହୋଇଯାଇଛି। ତାଙ୍କ ଡାହାଣ ହାତ ପାପୁଲି ଏବଂ ଗୋଇଠିରେ ମଧ୍ୟ ଆଘାତ ଲାଗିଛି। ସେହିଭଳି ତାଙ୍କ ପିଠିରେ ଅନେକ କ୍ଷତ ଚିହ୍ନ ମଧ୍ୟ ଅଛି। ବର୍ତ୍ତମାନ ତାଙ୍କ ଅବସ୍ଥା ସ୍ଥିର ରହିଛି ଏବଂ ତାଙ୍କୁ ଡେରାଡୁନର ମ୍ୟାକ୍ସ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଆହତ ହେବାର ଗମ୍ଭୀରତାକୁ ଆକଳନ କରିବା ପାଇଁ ପନ୍ତଙ୍କ ଏମଆରଆଇ ପରୀକ୍ଷା କରାଯାଇଛି, ଯାହାର ରିପୋର୍ଟ ଆସିବା ପରେ ତାଙ୍କର ପରବର୍ତ୍ତୀ ଚିକିତ୍ସା ଲାଗି ନିଷ୍ପତ୍ତି ନିଆଯିବ।
ଚିକିତ୍ସା କରୁଥିବା ଡାକ୍ତରୀ ଦଳ ସହିତ ବିସିସିଆଇ ଡାକ୍ତରୀ ଦଳ ଯୋଗାଯୋଗରେ ଅଛନ୍ତି। ଏଥିସହ ତାଙ୍କ ପରିବାର ସହିତ ବିସିସିଆଇ ନିରନ୍ତର ଯୋଗାଯୋଗରେ ଅଛି। ପନ୍ତଙ୍କୁ ସର୍ବୋତ୍ତମ ସମ୍ଭାବ୍ୟ ଚିକିତ୍ସା ସେବା ମିଳିବା ନେଇ ସୁନିଶ୍ଚିତ କରୁଛି ବୋଲି ବୋର୍ଡ କହିଛି।