ନୂଆଦିଲ୍ଲୀ, ୭।୬: ଅଧାରୁ ବନ୍ଦ ରହିଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ଫାଇନାଲ ଅକ୍ଟୋବର ୧୫କୁ ଘୁଞ୍ଚିପାରେ। ପ୍ରତିଯୋଗିତା ସ୍ଥଳ ୟୁନାଇଟେଡ୍ ଆରବ ଏମିରେଟ୍ସ (ୟୁଏଇ)ରେ ତାପମାତ୍ରା ବୃଦ୍ଧିକୁ ଦୃଷ୍ଟିରେ ରଖି ଡବଲ ହେଡର (ଦିନକୁ ୨ ମ୍ୟାଚ) ସଂଖ୍ୟା କମାଇ ଦିଆଯିବାକୁ ଥିବାରୁ ଏହି ପରିସ୍ଥିତି ଉପୁଜିଛି। ପୂର୍ବରୁ ପ୍ରକାଶିତ ରିପୋର୍ଟ ଅନୁସାରେ ଟୁର୍ନାମେଣ୍ଟ ସେପ୍ଟେମ୍ବର ୧୯ରେ ଆରମ୍ଭ ହୋଇ ଅକ୍ଟୋବର ୧୦ରେ ଶେଷ କରାଯିବାକୁ ଯୋଜନା ରହିଥିଲା। ମାତ୍ର ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଓ ଏମିରେଟ୍ସ କ୍ରିକେଟ ବୋର୍ଡ (ଇସିବି) ଆକର୍ଷକ ଟି୨୦ ଇଭେଣ୍ଟକୁ ଅକ୍ଟୋବର ୧୫ ପର୍ଯ୍ୟନ୍ତ ବଢ଼ାଇବାକୁ ଚିନ୍ତା କରୁଛନ୍ତି। ପ୍ରାରମ୍ଭିକ ପର୍ଯ୍ୟାୟରେ ସେପ୍ଟେମ୍ବର ୧୫ରୁ ଅକ୍ଟୋବର ୧୫ ପର୍ଯ୍ୟନ୍ତ ଓ୍ବିଣ୍ଡୋ ବାହାର କରାଯାଇଛି। ବିସିସିଆଇ ୧୦ ଡବଲ ହେଡର(ଦିନକୁ ୨ ମ୍ୟାଚ) କରିବାକୁ ଚିନ୍ତା କରୁଥିଲା। ମାତ୍ର ସେପ୍ଟେମ୍ବର ତୃତୀୟ ଏବଂ ୪ର୍ଥ ସପ୍ତାହରେ ଅଳ୍ପଦିନରେ ଅଧିକ ଅପରାହ୍ନ ମ୍ୟାଚ ଖେଳାଳିଙ୍କୁ ଶାରୀରିକଭାବେ କ୍ଷତି ପହଞ୍ଚାଇପାରେ। ତେଣୁ ଡବଲ ହେଡର ସଂଖ୍ୟାକୁ ୫ କିମ୍ବା ୬କୁ କମାଇ ଫାଇନାଲ ଅକ୍ଟୋବର ୧୫ରେ କରାଇବାକୁ ଯୋଜନା ହେଉଛି। ୧୫ ତାରିଖ ଶୁକ୍ରବାର ଭାରତରେ ସପ୍ତାହାନ୍ତ ଏବଂ ଦୁବାଇରେ ଛୁଟିଦିନ ପଡ଼ୁଥିବାରୁ ଅଧିକରୁ ଅଧିକ ଦର୍ଶକ ଏହାକୁ ଉପଭୋଗ କରିପାରିବେ ବୋଲି ବିସିସିଆଇର ଏକ ସୂତ୍ରରୁ ପ୍ରକାଶ କରାଯାଇଛି।