ସିଡ୍ନୀ, ୧୮।୫ : ଆଇପିଏଲରେ ଭାଗ ନେଇଥିବା ଅଷ୍ଟ୍ରେଲିଆନ ଖେଳାଳି ସ୍ବଦେଶ ପହଞ୍ଚିବା ପରେ ୧୪ ଦିନିଆ କ୍ୱାରେଣ୍ଟିନରେ ରହିଛନ୍ତି। ଏଥି ଲାଗି ସମ୍ପୂର୍ଣ୍ଣ ଖର୍ଚ୍ଚ ବହନ କରୁଛି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)। ଏହା ମଙ୍ଗଳବାର ସ୍ପଷ୍ଟ କରିଛନ୍ତି କ୍ରିକେଟ ଅଷ୍ଟ୍ରେଲିଆ ଆନ୍ତରିଣ ସିଇଓ ନିକ ହକଲେ।
ଷ୍ଟିଭ ସ୍ମିଥ, ପାଟ କୁମିନ୍ସଙ୍କ ଭଳି ଷ୍ଟାର ଖେଳାଳି, ଭାଷ୍ୟକାର ଓ ମ୍ୟାଚ୍ ଅଫିସିଆଲଙ୍କ ସମେତ ମୋଟ ୩୮ ଜଣ ମାଳଦ୍ୱୀପରୁ ସୋମବାର ସିଡ୍ନୀ ବିମାନ ବନ୍ଦରରେ ପହଞ୍ଚିଥିଲେ। ଭାରତୀୟ ବିମାନ ସେବା ଉପରେ ଅଷ୍ଟ୍ରେଲିଆ ସରକାରଙ୍କ କଟକଣା ଯୋଗୁ ଖେଳାଳିଙ୍କୁ ମାଳଦ୍ୱୀପରେ ୧୦ ଦିନ ରହିବାକୁ ପଡ଼ିଥିଲା।
ସିଡ୍ନୀ ମର୍ନିଂ ହେରାଲ୍ଡକୁ ହକଲେ କହିଛନ୍ତି, ବିସିସିଆଇ ତା’ର ପ୍ରତିଶ୍ରୁତି ରକ୍ଷା କରିବା ସହ କ୍ୱାରେଣ୍ଟିନ ଲାଗି ସମସ୍ତ ଖର୍ଚ୍ଚ ବହନ କରୁଛି। ଖେଳାଳିଙ୍କୁ ସୁରକ୍ଷିତ ଭାବେ ଯଥା ଶୀଘ୍ର ଘରେ ପହଞ୍ଚାଇବାକୁ ଆଶ୍ୱସନା ଦେଇଥିଲା ସୌରଭ ଗାଙ୍ଗୁଲିଙ୍କ ନେତୃତ୍ୱାଧୀନ ବୋର୍ଡ। ଆମେ ତାଙ୍କ ସହ କାର୍ଯ୍ୟ କରୁଛୁ। ସେମାନେ ପ୍ରତିଶ୍ରୁତି ରକ୍ଷା କରିଛନ୍ତି।
ଉଲ୍ଲେଖଯୋଗ୍ୟ, ବିଭିନ୍ନ ଫ୍ରାଞ୍ଚାଇଜର ୪ ଖେଳାଳି ପଜିଟିଭ ଚିହ୍ନଟ ହେବା ପରେ ଆଇପିଏଲ-୧୪କୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ କରିଦିଆଯାଇଛି। କିନ୍ତୁ ଭାରତୀୟ ବିମାନ ସେବା ଉପରେ କଟକଣା ଯୋଗୁ ଅଷ୍ଟ୍ରେଲିଆନ ଖେଳାଳିମାନେ ତୁରନ୍ତ ସ୍ବଦେଶ ଫେରି ପାରି ନ ଥିଲେ। ଏଣୁ ସେମାନଙ୍କୁ ସ୍ବତନ୍ତ୍ର ଫାଇଟ୍ରେ ମାଳଦ୍ୱୀପ ନିଆଯାଇଥିଲା।