ନୂଆଦିଲ୍ଲୀ,୩।୮(ପି.ଟି.): କୋଭିଡ୍-୧୯ ସଂକ୍ରମଣକୁ ଦୃଷ୍ଟିରେ ରଖି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡିଓର (ଏସ୍ଓପି) କରିଛି। ଏହା ଦ୍ୱାରା ରାଜ୍ୟ ଆସୋସିଏଶନଗୁଡିକ ୬୦ ବର୍ଷରୁ ଊର୍ଦ୍ଧ୍ୱ ବୟସ୍କ ବ୍ୟକ୍ତିମାନଙ୍କୁ କୋଚ୍ ନିଯୁକ୍ତି ଦେବା ପ୍ରକ୍ରିୟାରୁ ବିରତ ରହିବେ। ଅର୍ଥାତ୍ ୬୦ରୁ ଊର୍ଦ୍ଧ୍ୱ ବ୍ୟକ୍ତିମାନେ ଟ୍ରେନିଂ କ୍ୟାମ୍ପରୁ ଦୂରେଇ ରହିବାକୁ କୁହାଯାଇଛି। ଏହି ଏସ୍ଓପି ଭାରତୀୟ ପୂର୍ବତନ କ୍ରିକେଟର ଅରୁଣ ଲାଲ ଓ ଅଷ୍ଟ୍ରେଲୀୟ ପୂର୍ବତନ କ୍ରିକେଟର ଡେଭ ହ୍ବାଟମୋରଙ୍କୁ ପ୍ରଭାବିତ କରିବ। ଅରୁଣ ଲାଲ ବେଙ୍ଗଲ ଓ ହ୍ବାଟମୋର ବରୋଦାର କୋଚ୍ ରହିଛନ୍ତି। ଫଳରେ ଏମାନେ କୋଚିଂ ଦେବାରୁ ବଞ୍ଚିତ ହେବା ସ୍ପଷ୍ଟ ହୋଇଛି। ହ୍ବାଟମୋରଙ୍କ ବୟସ ୬୬ ହୋଇଥିବା ବେଳେ ଏପ୍ରିଲ୍ରେ ସେ କୋଚ୍ ନିଯୁକ୍ତ ହୋଇଥିଲେ। ସେହିପରି ଅରୁଣ ଲାଲଙ୍କ ବୟସ ୬୫ ହୋଇଥିବା ବେଳେ ସେ ଗତ ମାର୍ଚ୍ଚରେ ବେଙ୍ଗଲକୁ ରଣଜୀ ଟ୍ରଫି ଫାଇନାଲରେ ପହଞ୍ଚାଇଥିଲେ।
ଉଲ୍ଲେଖଥାଉ କି, ଯେଉଁମାନଙ୍କ ବୟସ ୬୦ରୁ ଊର୍ଦ୍ଧ୍ୱ ହୋଇଥିବା ବ୍ୟକ୍ତିମାନେ ଏହି ଭାଇରସ୍ ଦ୍ୱାରା ସଂକ୍ରମିତ ହେବାର ଅଧିକ ସମ୍ଭାବନା ରହିଛି। ସେମାନଙ୍କୁ କୋଚ୍, ସପୋର୍ଟ ଷ୍ଟଫ୍, ଅମ୍ପାୟର୍ସ, ଗ୍ରାଉଣ୍ଡ ଷ୍ଟାଫ୍ ଦାୟିତ୍ୱ ନେବାରୁ ବାରଣ କରାଯାଇଛି। ସେହିପରି ଡାଇବେଟିସ୍ ଓ ଦୁର୍ବଳ ରୋଗ ପ୍ରତିରୋଧକ ଶକ୍ତି ଥିବା ବ୍ୟକ୍ତିମାନେ ମଧ୍ୟ ସଂକ୍ରମିତ ହେବାର ଅଧିକ ସମ୍ଭାବନା ରହିଛି। ବିସିସିଆଇର ୧୦୦ ପୃଷ୍ଠା ସମ୍ବଳିତ ଏସ୍ଓପିରେ ଏମାନଙ୍କୁ ବିଭିନ୍ନ ଦାୟିତ୍ୱ ନେବାରୁ ବାରଣ କରାଯାଇଛି। ଫଳରେ ଅରୁଣ ଓ ହ୍ବାଟମୋର ପ୍ରି- ସେସନ ଟ୍ରେନିଂ କ୍ୟାମ୍ପରେ ଯୋଗ ଦେଇପାରିବେନି। ଏ ସଂକ୍ରାନ୍ତରେ ମତ ଦେବା ପାଇଁ କ୍ରିକେଟ ଆସୋସିଏଶନ ଅଫ୍ ବେଙ୍ଗଲ (ସିଏବି) ଅଧ୍ୟକ୍ଷ ଅଭିଷେକ ଡାଲମିୟା ଉପସ୍ଥିତ ନାହାନ୍ତି। ତେବେ ଏହି ସବୁ ନିୟମ ମାନିବା ଯେକୌଣସି ଦଳ ପାଇଁ କଷ୍ଟକର ବୋଲି ବୋର୍ଡର ଜଣେ ବରିଷ୍ଠ ଅଧିକାରୀ କହିଛନ୍ତି। ଅରୁଣ ଓ ହ୍ବାଟମୋରଙ୍କ ଭଳି କୋଚ୍ ଦାୟିତ୍ୱରୁ ବାଦ୍ ପଡିବା ଦୁର୍ଭାଗ୍ୟଜନକ ବୋଲି ସେ କହିଛନ୍ତି।
