ନୂଆଦିଲ୍ଲୀ,୧୯।୫: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପୁରୁଷ ଓ ମହିଳା ଦଳର ଖେଳାଳିଙ୍କୁ ମୁମ୍ବାଇରେ ଏକତ୍ରିତ କରିବା ପାଇଁ ୩ଟି ସହରରେ ଚାଟାର୍ଡ ଫ୍ଲାଇଟ୍ ବ୍ୟବସ୍ଥା କରିଛି। ଉଭୟ ପୁରୁଷ ଓ ମହିଳା ଦଳର ଖେଳାଳିମାନେ ଜୁନ ୨ରେ ଗୋଟିଏ ଫ୍ଲାଇଟ୍ରେ ଇଂଲଣ୍ଡ ଗସ୍ତ କରିବେ। ଏଥି ପୂର୍ବରୁ ସେମାନେ ମୁମ୍ବାଇରେ ଦୁଇ ସପ୍ତାହ ପାଇଁ କ୍ୱାରେଣ୍ଟିନରେ ରହିବେ।
ଭାରତୀୟ ଖେଳାଳିଙ୍କ ପାଇଁ ଇଂଲଣ୍ଡରେ ସହଜ କ୍ୱାରେଣ୍ଟିନ ବ୍ୟବସ୍ଥା କରିବାକୁ ବିସିସିଆଇ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ଏବଂ ୟୁକେ ସରକାରଙ୍କ ସହ ଆଲୋଚନା କରୁଛି। ୟୁକେରେ ଖେଳାଳିଙ୍କୁ କିଛି ଦିନ କଠିନ କ୍ୱାରେଣ୍ଟିନରେ ରହିବାକୁ ପଡ଼ିବ। ଏହାପରେ ଟ୍ରେନିଂ ପାଇଁ ଅନୁମତି ଦିଆଯାଇପାରେ। ଗତ ନଭେମ୍ବରରେ ଭାରତୀୟ ଦଳ ଅଷ୍ଟ୍ରେଲିଆ ଗସ୍ତ କରିଥିଲା। ସେଠାରେ ୩ ଦିନିଆ କଠିନ କ୍ୱାରେଣ୍ଟିନରେ ରଖାଯିବା ପରେ ଖେଳାଳିଙ୍କୁ ମିଳିଥିଲା ଅଭ୍ୟାସ ପାଇଁ ଅନୁମତି। କିନ୍ତୁ ପ୍ରାକ୍ଟିସ ପରେ ଖେଳାଳିଙ୍କୁ ହୋଟେଲ ରୁମ୍ ବାହାରକୁ ଯିବାକୁ ମନା କରାଯାଇଥିଲା। କିଛି ଏଭଳି ବ୍ୟବସ୍ଥା ୟୁକେ ଗସ୍ତରେ ହୋଇପାରେ ବୋଲି ଜଣେ ବିସିସିଆଇ ଅଧିକାରୀ କହିଛନ୍ତି। ବିସିସିଆଇର ଯୋଜନା ଅନୁଯାୟୀ, ଖେଳାଳିଙ୍କୁ ଡବ୍ଲ୍ୟୁଟିସି ଫାଇନାଲ ପୂର୍ବରୁ ଅଭ୍ୟାସ ଲାଗି ୧୦ ଦିନ ମିଳିପାରିବ।
ଜୁନ ୧୮ ତାରିଖରୁ ଆରମ୍ଭ ହେବାକୁ ଥିବା ନ୍ୟୁଜିଲାଣ୍ଡ ବିପକ୍ଷ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ଲାଗି ଭାରତୀୟ ପୁରୁଷ ଦଳ ସାଉଥାମ୍ପଟନ ଗସ୍ତ କରିବ। ମୁମ୍ବାଇ ବବ୍ଲରେ ପ୍ରବେଶ କରିବା ପୂର୍ବରୁ ଖେଳାଳିଙ୍କୁ ନେଗେଟିଭ ଆରଟି-ପିସିଆର ରିପୋର୍ଟ ଦରକାର। କେନ୍ଦ୍ରୀୟ ସଂସ୍ଥା ଦ୍ୱାରା ଏହି ଟେଷ୍ଟ କରାଯିବ ବୋଲି ବିସିସିଆଇ ପକ୍ଷରୁ ଖେଳାଳିଙ୍କୁ କୁହାଯାଇଛି।