ଲଣ୍ଡନ,୨୧।୫: ଚଳିତ ବର୍ଷ ସେପ୍ଟେମ୍ବରରେ ଆଇପିଏଲ-୧୪’ର ଅବଶିଷ୍ଟ ମ୍ୟାଚ୍ ଆୟୋଜନ କରିବା ପାଇଁ ମାଷ୍ଟର ପ୍ଲାନ ପ୍ରସ୍ତୁତ କରିଛି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)। ଇଂଲଣ୍ଡ ଓ ଭାରତ ମଧ୍ୟରେ ଖେଳାଯିବାକୁ ଥିବା ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ର କାର୍ଯ୍ୟସୂଚୀରେ ପରିବର୍ତ୍ତନ ହୋଇପାରେ। ଏଥି ଲାଗି ଇଂଲଣ୍ଡ ବୋର୍ଡ ଇସିବି ନିକଟରେ ବିସିସିଆଇ ଅନୁରୋଧ କରିଛି।
ସିରିଜ୍କୁ ଧାର୍ଯ୍ୟ ତାରିଖର କିଛି ସପ୍ତାହ ପୂର୍ବରୁ ଆରମ୍ଭ କରିବାକୁ ପ୍ରସ୍ତାବ ଦେଇଛି ସୌରଭ ଗାଙ୍ଗୁଲିଙ୍କ ନେତୃତ୍ୱାଧୀନ ବିସିସିଆଇ। ଯାହା ଫଳରେ ଆଇପିଏଲର ବଳକା ୩୧ ମ୍ୟାଚ୍ ଆୟୋଜନ ଲାଗି ଅଧିକ ସମୟ ମିଳିପାରିବ।
କାର୍ଯ୍ୟସୂଚୀ ଅନୁଯାୟୀ, ଭାରତ-ଇଂଲଣ୍ଡର ଟେଷ୍ଟ ସିରିଜ୍ର ପ୍ରଥମ ମ୍ୟାଚ୍ ଅଗଷ୍ଟ ୪ରେ ଖେଳାଯିବାକୁ ଥିବାବେଳେ ଅନ୍ତିମ ତଥା ୫ମ ଟେଷ୍ଟ ସେପ୍ଟେମ୍ବର ୧୦ରେ ଖେଳାଯିବ। ତେବେ ଏହି ସିରିଜ୍କୁ ଜୁଲାଇର ଶେଷ ସପ୍ତାହ ମଧ୍ୟରେ ସମାପ୍ତ କରିବାକୁ ବିସିସିଆଇ ଅନୁରୋଧ କରିଛି। ମ୍ୟାଚ୍ ମଧ୍ୟରେ ଥିବା ବ୍ୟବଧାନକୁ କମ୍ କରାଗଲେ ସିରିଜ୍ ଶୀଘ୍ର ଶେଷ ହୋଇପାରିବ। ଏହାଦ୍ୱାରା ଆଇପିଏଲର ଦ୍ୱିତୀୟ ପର୍ଯ୍ୟାୟ ପାଇଁ ପୂରା ଫାଙ୍କା ପଡ଼ିବ ସେପ୍ଟେମ୍ବର ମାସ। ତେବେ ଏହା ଉପରେ ଉଭୟ ବୋର୍ଡ ପକ୍ଷରୁ କୌଣସି ପତିକ୍ରିୟା ଦିଆଯାଇ ନାହିଁ।