ନୂଆଦିଲ୍ଲୀ,୧୭।୮: କିଛି ଦିନ ହେବ ଦିଲୀପ ଟ୍ରଫିର ଆଗାମୀ ସିଜିନଏକ ଚର୍ଚ୍ଚାର ବିଷୟ ପାଲଟିଛି। ଏହି ଟୁର୍ନାମେଣ୍ଟ ୫-୨୨ସେପ୍ଟେମ୍ବର ପର୍ଯ୍ୟନ୍ତ ଖେଳାଯିବ, ଯେଉଁଥିରେ ଭାରତୀୟ ଜାତୀୟ କ୍ରିକେଟ ଦଳ ପାଇଁ ଖେଳୁଥିବା ଖେଳାଳିଙ୍କୁ ମଧ୍ୟ ଅନ୍ତର୍ଭୁକ୍ତ କରାଯାଇଛି। ଜାତୀୟ ଦଳ ପାଇଁ ଖେଳୁଥିବା ଖେଳାଳିମାନେ ମଧ୍ୟ ଘରୋଇ କ୍ରିକେଟ ଖେଳିବା ଉଚିତ ବୋଲି ଅନେକ ଦାବି କରାଯାଇଛି। ଏହି ସମୟରେ ବିସିସିଆଇ ସଚିବ ଜୟ ଶାହା ବଡ ରହସ୍ୟ ଖୋଲି କହିଛନ୍ତି , ଯଦି ଜଣେ ଖେଳାଳି ଆହତ ହୁଅନ୍ତି ତେବେ ସେ କିପରି ଟିମ ଇଣ୍ଡିଆରେ ପ୍ରତ୍ୟାବର୍ତ୍ତନ କରିପାରିବେ?
ଜୟ ଶାହା ଏକ ପୁରୁଣା ଘଟଣାକୁ ମନେ ପକାଇ କହିଛନ୍ତି, ୨୦୨୨ ଏସିଆ କପ ସମୟରେ ରବିନ୍ଦ୍ର ଜାଡେଜାଙ୍କ ଆଣ୍ଠୁରେ ଆଘାତ ଲାଗିଥିଲା। ଶାହା ସେହି ସମୟରେ ଜାଡେଜାଙ୍କୁ ଫୋନ କରି ତାଙ୍କୁ ଘରୋଇ କ୍ରିକେଟ ଖେଳିବାକୁ କହିଥିଲେ। ଏହି କାରଣରୁ, ଜାଡେଜା ସେହି ସମୟରେ ରଣଜୀ ସିଜିନରେ ସୌରାଷ୍ଟ୍ର ପାଇଁ ଖେଳିଥିଲେ ଏବଂ ପରେ ବର୍ଡର -ଗାଭାସ୍କର ଟ୍ରଫି ୨୦୨୨ପାଇଁ ଭାରତୀୟ ଦଳକୁ ଫେରିଥିଲେ।
ଜୟ ଶାହା କହିଛନ୍ତି, ଆମେ କିଛି କଠୋର ନିୟମ କରିଛୁ। ଯେତେବେଳେ ରବିନ୍ଦ୍ର ଜାଡେଜା ଆହତ ହୋଇଥିଲେ, ମୁଁ ତାଙ୍କୁ ଫୋନ କରି ଘରୋଇ କ୍ରିକେଟ ଖେଳିବାକୁ କହିଥିଲି। ବର୍ତ୍ତମାନ ଏକ ନିୟମ ହୋଇଛି ଯେ କୌଣସି ଖେଳାଳି ଆହତ କାରଣରୁ ବାହାରକୁ ଯିବେ, ସେ ସେବେ ଟିମ ଇଣ୍ଡିଆକୁ ଫେରିବେ, ଯେବେ ଘରୋଇ କ୍ରିକେଟରେ ନିଜର ଫିଟନେସ ପ୍ରମାଣ କରିବେ।
ନିକଟରେ ବିରାଟ କୋହଲି ଏବଂ ରୋହିତ ଶର୍ମା ଦିଲୀପ ଟ୍ରଫିରେ ଖେଳିବାର ଖବର ଚର୍ଚ୍ଚାରେ ଥିଲା, କିନ୍ତୁ ରିପୋର୍ଟ ଅନୁଯାୟୀ ଏହି ଦୁଇ ବରିଷ୍ଠ ଭାରତୀୟ ଖେଳାଳି ଆଗାମୀ ଟୁର୍ନାମେଣ୍ଟରେ ଖେଳିବେ ନାହିଁ। ଏହା ଉପରେ ଜୟ ଶାହା କହିଛନ୍ତି ଯେ ବିରାଟ ଏବଂ ରୋହିତ ଆଘାତ ହେବାର ଆଶଙ୍କା ରହିଛି ଏବଂ ଅଷ୍ଟ୍ରେଲିଆ ଏବଂ ଇଂଲଣ୍ଡ ବିପକ୍ଷ ଆଗାମୀ ସିରିଜକୁ ମଧ୍ୟ ମ୍ୟନେଜମେଣ୍ଟକୁ ଧ୍ୟାନରେ ରଖିବାକୁ ପଡ଼ିବ।