ବେତନଟୀ,୬ା୧୧(ଧରଣୀଧର ମହାନ୍ତି):ମୟୂରଭଞ୍ଜ ଜିଲା ବେତନଟୀ ବ୍ଲକ ଅଧୀନ ନଡ଼ପୁର ପଞ୍ଚାୟତରେ ମଙ୍ଗଳବାର ପିଡିଏସ୍ ଚାଉଳ କମ୍ ଦିଆଯିବାକୁ ନେଇ ଉତ୍ତେଜନା ପ୍ରକାଶ ପାଇଥିଲା। ଉତ୍ତ୍ୟକ୍ତ ହିତାଧିକାରୀମାନେ ଯାଞ୍ଚ ପାଇଁ ଆସିଥିବା ବିଡିଓ ଏବଂ ବ୍ଲକ କର୍ମଚାରୀମାନଙ୍କୁ ପଞ୍ଚାୟତ କାର୍ଯ୍ୟାଳୟ ମଧ୍ୟରେ ପୂରାଇ ତାଲା ପକାଇ ଦେଇଥିଲେ। ୪ ଘଣ୍ଟା ଅଟକ ରହିବା ପରେ ପୋଲିସ ସମସ୍ତଙ୍କୁ ଉଦ୍ଧାର କରିଥିଲା। ସୂଚନା ଅନୁଯାୟୀ, ଗତ ଶନିବାର ନଡ଼ପୁର ପଞ୍ଚାୟତରେ ବ୍ଲକ ଯୋଗାଣ ବିଭାଗ ଅଧୀନରେ କାର୍ଯ୍ୟ କରୁଥିବା ପଞ୍ଚାୟତ ଯୋଗାଣ ସହାୟିକା ଜୟସ୍ମିତା କବାଟ ଚାଉଳ ବଣ୍ଟନ କରିଥିଲେ। ଏହି ପଞ୍ଚାୟତ ଅଧୀନ ସିଳିପୁରିଆ ଗ୍ରାମର ରାୟମତ ମାଝୀ ତାଙ୍କ ରାଶନ କାର୍ଡରେ ୧୦୫ କି.ଗ୍ରା. ଚାଉଳ ନେଇଥିବା ବେଳେ ଅନ୍ୟ ଏକ ମେଶିିନରେ ଓଜନ କରିବାରୁ ତାହା ୯୬.୪୦୦ ଗ୍ରାମ ହୋଇଥିଲା। ଏହା ପରେ ୧୦ରୁ ୧୫ ଜଣ ରାଶନ କାର୍ଡ ହିତାଧିକାରୀ ସେମାନଙ୍କ ଚାଉଳ ଓଜନ କରି ୫ରୁ ୧୨ କି.ଗ୍ରା. ପର୍ଯ୍ୟନ୍ତ କମ୍ ରହିଥିବା ଜାଣିବାକୁ ପାଇଥିଲେ। ଫଳରେ ସେଠାରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ଯୋଗାଣ ସହାୟିକା ସନ୍ତୋଷଜନକ ଉତ୍ତର ଦେଇ ପାରି ନ ଥିଲେ। ଅଭିଯୋଗ ପାଇ ବେତନଟୀ ଏବିଡିଓ ଗଗନ ବିହାରୀ ବେହେରା, ଜିପିଓ ସବ୍ୟସାଚୀ ଦାସ ତଦନ୍ତ ପାଇଁ ଯାଇଥିଲେ ମଧ୍ୟ ସମାଧାନର ବାଟ ବାହାରି ପାରି ନ ଥିଲା। ଅଧିକାରୀମାନେ ପଞ୍ଚାୟତ ଅଫିସର ଚାଉଳ ଗୋଦାମକୁ ସିଲ୍ କରି ବିଡିିଓଙ୍କୁ ଅବଗତ କରିବେ କହି ପଳାଇ ଆସିଥିଲେ। ମଙ୍ଗଳବାର ବିଡିଓ ଗୋପୀନାଥ ଖାଖା, ଏବିଡିଓ ବେହେରା, ଜିପିଓ ଦାସ, ବାରିପଦାରୁ ଆସିଥିବା ମାପ ଓ ଓଜନ ବିଭାଗ ଅଧିକାରୀ ଏବଂ ବ୍ଲକ କର୍ମଚାରୀମାନେ ତଦନ୍ତ ପାଇଁ ଯାଇଥିଲେ। ତେବେ ଯାଞ୍ଚ ବେଳେ ଅଭିଯୋଗକାରୀ ଓ ତଦନ୍ତ ଅଧିକାରୀଙ୍କ ମଧ୍ୟରେ କଥା କଟାକଟି ହୋଇଥିଲା। ଅଧିକାରୀମାନେ ଘଟଣାର ସମାଧାନ କରି ନ ପାରିବାରୁ ହିତାଧିକାରୀମାନେ ସେମାନଙ୍କୁ ଅଟକ ରଖି ଅସନ୍ତୋଷ ଜାହିର କରିଥିଲେ।
