ଦାରିଙ୍ଗବାଡ଼ି,୩୧ା୧୦(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକର ଦୁର୍ଗମ ପଞ୍ଚାୟତ ସରାମୁଳି, ହାତୀମୁଣ୍ଡା, ଝିଞ୍ଜିରୀଗୁଡ଼ା, ଗଦାପୁର, ବ୍ରାହ୍ମଣୀଗାଁ ପଞ୍ଚାୟତ ଅଞ୍ଚଳରେ ଚାଲିଥିବା ବିଭିନ୍ନ ପ୍ରକଳ୍ପର କାର୍ଯ୍ୟକୁ ଦାରିଙ୍ଗବାଡ଼ି ବିଡିଓ ପ୍ରୀତିରଞ୍ଜନ ରଥ ଗୁରୁବାର ପରିଦର୍ଶନ କରିଛନ୍ତି। ଏହି ସମୟରେ ହାତୀମୁଣ୍ଡା ପଞ୍ଚାୟତ ତାମାଙ୍ଗି ଗାଁ ବିଦ୍ୟାଳୟରେ ଅତିରିକ୍ତ ଶ୍ରେଣୀକୋଠା କାର୍ଯ୍ୟ ଅଧାପନ୍ତରିଆ ରହିଛି। ତାକୁ ଶୀଘ୍ର ସାରିବାକୁ ନିର୍ଦ୍ଦେଶ ଦେବା ସହ ଝିଞ୍ଜିରୀଗୁଡ଼ା ପଞ୍ଚାୟତରେ ବ୍ୟାଙ୍କ ଗୃହ ନିର୍ମାଣ, ଋଷିମାଳ ପାହାଡ଼ରେ ୭୮ ଲକ୍ଷ ଟଙ୍କା ବିନିମୟରେ ଚାଲିଥିବା କାର୍ଯ୍ୟ ସମେତ କାଶବସା ବିଦ୍ୟାଳୟର କୋଠା କାର୍ଯ୍ୟ ସହ ଅଞ୍ଚଳରେ ଚାଲିଥିବା ବିଭିନ୍ନ ପ୍ରକଳ୍ପ ବୁଲି ଦେଖିବା ସହ ଶୀଘ୍ର କାର୍ଯ୍ୟ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି।
ସେହିପରି ସରାମୁଳି ପଞ୍ଚାୟତ ଅଞ୍ଚଳରେ ଐତିହାସିକ ଓ ପାରମ୍ପରିକ ତଥ୍ୟ ରହିଥିବା ଯୋଗୀ ମଠକୁ ବିକାଶ କରାଯିବ। ମଠକୁ ପର୍ଯ୍ୟଟକ ଯାତାୟାତ କରିବା ପାଇଁ ରାସ୍ତା, ପୋଲ ସହ ପର୍ଯ୍ୟଟକଙ୍କ ମୌଳିକ ସୁବିଧା ପାଇଁ ଅନୁସଙ୍ଗିକ ବ୍ୟବସ୍ଥା କରାଯିବା ପାଇଁ ବ୍ଲକ ପ୍ରଶାସନ ପଦକ୍ଷେପ ନେବ ବୋଲି ବିଡିଓ ରଥ କହିଛନ୍ତି। ସେ କହିଛନ୍ତି, ସେ ଏବେ ଦାରିଙ୍ଗବାଡି ବିଡିଓ ଭାବେ କାର୍ଯ୍ୟଭାର ସମ୍ଭାଳିଛନ୍ତି। ସେ ସମସ୍ତ ଅଞ୍ଚଳ ବୁଲି ଦେଖିବା ସହ ଏହାର ସାମଗ୍ରିକ ବିକାଶ ପାଇଁ ଯୋଜନା ପ୍ରସ୍ତୁତ କରି କାର୍ଯ୍ୟ କରାଯିବ ବୋଲି ସେ କହିଛନ୍ତି। ବିଡିଓଙ୍କ ସହ ସହକାରୀ ନିର୍ବାହୀ ଯନ୍ତ୍ରୀ ଶିଶିର ପାତ୍ର ଓ କାର୍ଯ୍ୟରତ କନିଷ୍ଠ ଯନ୍ତ୍ରୀ କମଳ ପାତ୍ର ଉପସ୍ଥିତ ଥିଲେ।