ସିମୁଳିଆ, ୧୩।୧(ସନ୍ତୋଷ ନାୟକ): ବାଲେଶ୍ୱର ଜିଲା ସିମୁଳିଆ ବିଡିଓ ବିଶ୍ୱରଞ୍ଜନ ମହାନ୍ତିଙ୍କ ମୃତ୍ୟୁର ୨୪ଘଣ୍ଟା ପରେ ମଧ୍ୟ ମୃତ୍ୟୁର ରହସ୍ୟ ଉନ୍ମୋଚନ ହୋଇପାରିନାହିଁ। ପୋଲିସ ଏକ ଅପମୃତ୍ୟୁ ମାମଲା (ନଂ. ୨/୨୪) ରୁଜୁ କରିଛି। ପୋଲିସ ଶୁକ୍ରବାର ମଧ୍ୟାହ୍ନରେ ବିଡିଓଙ୍କ କାର୍ଯ୍ୟାଳୟରେ ପହଞ୍ଚି ତଦନ୍ତ କରିବା ସହିତ ବିଭିନ୍ନ ଅଧିକାରୀଙ୍କ ନିକଟରୁ ତଥ୍ୟ ସଂଗ୍ରହ କରିଛି। ତଦନ୍ତ ବେଳେ ବିଡିଓଙ୍କ କାର୍ଯ୍ୟାଳୟରେ ସିସି କ୍ୟାମେରା ଅଚଳ ଥିବା ଜଣାଯାଇଛି। ବ୍ଲକ ଜିପିଇଓ ମୃତ୍ୟୁଞ୍ଜୟ ନାୟକଙ୍କୁ ଥାନାରେ ବସାଇ ପଚରାଉଚରା ଚାଲିଛି। ଅପରପକ୍ଷେ ସ୍ବର୍ଗତଃ ବିଡିଓଙ୍କ ପୁଅ ଉପମନ୍ୟୁ ମହାନ୍ତି ଓ ତାଙ୍କ ଭାଇ ସୁଧାରଞ୍ଜନ ମହାନ୍ତି ଘରେ କୌଣସି କଳହ କିମ୍ବା ମନାନ୍ତର ନ ଥିଲା ା ତେବେ ସେ ଘରକୁ ଯାଇ ନ ପାରିବା ସହିତ ଚାପରେ କାମ କରୁଥିବା କହିଥିଲେ। ବିଡିଓଙ୍କ ମୃତ୍ୟୁ ପରେ ଜିପିଇଓଙ୍କ ମୋବାଇଲ ସୁଇଚ ଅଫ୍ ହୋଇଯିବା, ପୋଲିସ ଓ ବ୍ଲକ କର୍ମଚାରୀମାନେ ବିଡିଓଙ୍କ ସରକାରୀ କ୍ୱାର୍ଟର୍ସର ତାଲା ଭାଙ୍ଗିବା ପାଇଁ ଉଦ୍ୟମ କରୁଥିବା ବେଳେ ଜିପିଇଓ ବାରଣ କରିବା ଓ ବିଡିଓଙ୍କ ଶବ ବ୍ୟବଚ୍ଛେଦ ପାଇଁ ଯିବା ପୂର୍ବରୁ ଜିପଇଓ ଅନ୍ତର୍ଧାନ ହୋଇଯିବା ଘଟଣା ଜିପିଇଓଙ୍କୁ ଅଡୁଆରେ ପକାଇଛି। ଏ ସମ୍ପର୍କରେ ତାଙ୍କୁ ପଚାରିବାରୁ ତାଙ୍କ ଦେହ ଭଲ ନ ଲାଗିବାରୁ ସେ ଚାଲିଯାଇଥିବା କହିଥିଲେ। ଅପରପକ୍ଷେ ବିଡିଓ ଗତ ରାତିରେ ଆତ୍ମହତ୍ୟା ନ କରି ଅଫିସ ସମୟରେ ଆତ୍ମହତ୍ୟା କରିବା ଓ ଜିପିଇଓ ତଦନ୍ତରେ ସହଯୋଗ ନ କରିବା ସମ୍ପର୍କରେ ବ୍ଲକ ଅଧ୍ୟକ୍ଷ ବାବାଜୀ ଚରଣ ମଲିକ ସୂଚନା ଦେଇଛନ୍ତି।
ଏହାକୁ କେନ୍ଦ୍ର କରି ଶୁକ୍ରବାର ମଧ୍ୟାହ୍ନରେ ପୂର୍ବତନ ମନ୍ତ୍ରୀ ତଥା ବିଧାୟକ ପଦ୍ମଲୋଚନ ପଣ୍ଡା ଖବରଦାତା ସମ୍ମିଳନୀରେ ବିଡିଓଙ୍କ ମୃତ୍ୟୁର ତଦନ୍ତ ଉଚ୍ଚସ୍ତରରେ କରା ନ ଗଲେ ସେ ଦଳୀୟ କର୍ମୀଙ୍କୁ ନେଇ ଆନ୍ଦୋଳନକୁ ଓହ୍ଲାଇବେ ବୋଲି କହିଛନ୍ତି। ଅପରପକ୍ଷେ ପାରିପାର୍ଶ୍ୱିକ ସ୍ଥିତିକୁ ନେଇ ଏହା ଆତ୍ମହତ୍ୟା ଓ ଏହାର ତଦନ୍ତ ଚାଲିଥିବା ଥାନା ଆଇଆଇସି ସ୍ବର୍ଣ୍ଣଲତା ମିଞ୍ଜ କହିଛନ୍ତି। ସୂଚନା ଯେ, ବିଡିଓ ମହାନ୍ତି ଗତ ୩ମାସ ପୂର୍ବେ ସିମୁଳିଆ ବିଡିଓ ରୂପେ ନିଯୁକ୍ତି ପାଇଥିଲେ। ତାଙ୍କ ନିଜଘର ସିମୁଳିଆ ବ୍ଲକର ଅଣ୍ଡରାଇ ଅଞ୍ଚଳରେ ହୋଇଥିବା ବେଳେ ତାଙ୍କ ପରିବାର ମୟୂରଭଞ୍ଜ ଜିଲା ବାରିପଦାରେ ସ୍ଥାୟୀ ରୂପେ ବସବାସ କରୁଛନ୍ତି। ଗୁରୁବାର ସେ ଅସୁସ୍ଥ ଥିବାରୁ ନିଜ ସରକାରୀ କ୍ୱାର୍ଟର୍ସକୁ ମଧ୍ୟାହ୍ନରେ ଚାଲିଯିବା ଓ ଅପରାହ୍ନରେ ଭିସି ମିଟିଂକୁ ନ ଆସିବା ଓ ଫ୍ୟାନ୍ରେ ଗାମୁଛା ଲଗାଇ ଝୁଲି ପଡ଼ିବା ଅବସ୍ଥାରେ ଉଦ୍ଧାର କରାଯିବା ଘଟଣା ଚର୍ଚ୍ଚାର ବିଷୟ ହୋଇଛି। ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍, ଏସ୍ଡିପିଓ ଶଶାଙ୍କ ଶେଖର ବେହେରା, ପିଡ଼ି ବିଶ୍ୱରଞ୍ଜନ ନାୟକ ପହଞ୍ଚତ୍ଥିଲେ। ତହସିଲର ଠିକା ଡ୍ରାଇଭର ମୁନା ସିଂଙ୍କ ଅଭିଯୋଗପତ୍ରରେ ଦସ୍ତଖତ ପରେ ରାତିରେ ବିଡିଓଙ୍କ ଶବ ଉଠିଥିଲା ା