ପୁରୀ ଅଫିସ,୩୧।୭: କରୋନା କଟକଣା ପାଇଁ ଶ୍ରୀମନ୍ଦିରରେ ଭକ୍ତଙ୍କ ଦର୍ଶନ ବନ୍ଦ ରହିଛି। କେବଳ ସେବାୟତମାନେ ମହାପ୍ରଭୁଙ୍କ ନୀତିକାନ୍ତି କରୁଛନ୍ତି। ତେବେ ପୂର୍ବଭଳି ମହାପ୍ରସାଦ ସେବା ଜାରି ରହିଛି। ଭକ୍ତଙ୍କୁ ମହାପ୍ରସାଦ ମିଳୁଛି। ମାତ୍ର ପର୍ବପର୍ବାଣିରେ ଅବଢା ନେବାକୁ ଶ୍ରୀମନ୍ଦିର ଭତ୍ତର ଦ୍ୱାରରେ ପ୍ରବଳ ଭିଡ଼ ଜମୁଛି। ସାମାଜିକ ଦୂରତ୍ୱ ରକ୍ଷା କରାଯାଉ ନାହିଁ। ତେଣୁ ଏହାର ସମାଧାନ ପାଇଁ ଉତ୍ତର ଓ ଦକ୍ଷିଣ ଦ୍ୱାରରେ ଅସ୍ଥାୟୀ ଟେଣ୍ଟ ତିଆରି କରାଯିବାକୁ ଶ୍ରୀମନ୍ଦିର ପ୍ରଶାସନକୁ ସୁଆର ମହାସୁଆର ନିଯୋଗ ପ୍ରସ୍ତାବ ଦେଇଛି। ନିଯୋଗ ପକ୍ଷରୁ ପ୍ରେସ୍ ବିଜ୍ଞପ୍ତିରେ କୁହାଯାଇଛି ଯେ, ଶ୍ରୀମହାପ୍ରସାଦ ତଥା ଆଡ଼ପ ଅବଢା ଯୋଗାଇବା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଗୁଣ୍ଡିଚା ମନ୍ଦିର ପାଖ ବସ୍ଷ୍ଟାଣ୍ଡରେ ଅସ୍ଥାୟୀ ଟେଣ୍ଟ କରାଯାଇଥିଲା। କୋଭିଡ୍-୧୯ କଟକଣା ମାନି ସାମାଜିକ ଦୂରତ୍ୱ ରକ୍ଷା କରି ଭକ୍ତମାନେ ମହାପ୍ରସାଦ ପାଇଥିଲେ। ମାତ୍ର ରଥଯାତ୍ରା ପରେ ଶ୍ରୀମନ୍ଦିର ବାହାରେ ଭକ୍ତମାନେ ମହାପ୍ରସାଦ ପାଇବା ପାଇଁ ଅସୁବିଧା ଭୋଗୁଛନ୍ତି। ଏଥିପାଇଁ ମନ୍ଦିର ପ୍ରଶାସନ କୋଭିଡ୍ କଟକଣା ମାନି ଶ୍ରୀମନ୍ଦିର ବାହାରେ କୌଣସି ସ୍ଥାନରେ ମହାପ୍ରସାଦ ବିତରଣ କରିବାକୁ ସୁଆର ମହାସୁଆର ନିଯୋଗକୁ ଚିଠି କରିଥିଲେ। ମାତ୍ର ଏହା ପରମ୍ପରା ବିରୋଧୀ ଜାଣି ସୁଆର ସେବକମାନେ ଅରାଜି ହୋଇଛନ୍ତି। ଉତ୍ତର ଦ୍ୱାର ଓ ଦକ୍ଷିଣ ଦ୍ୱାର ପାଖରେ ଅସ୍ଥାୟୀ ଟେଣ୍ଟ ନିର୍ମାଣ କରିବା ଲାଗି ମନ୍ଦିର ପ୍ରଶାସନକୁ ପ୍ରସ୍ତାବ ଦେଇଛନ୍ତି। ସେଠାରେ ନିଯୋଗ ପକ୍ଷରୁ ଏକ ଟୋକନ କାଉଣ୍ଟର ହେବ। ଭକ୍ତମାନେ କାଉଣ୍ଟରରେ ନିଜର ଚାହିଦା ଅନୁଯାୟୀ ଭୋଗ ବରାଦି କରି ଟୋକନ ନେବେ। ନିଯୋଗ କର୍ମଚାରୀ ଅନ୍ୟ ଏକ ଟୋକନ ନେଇ ଶ୍ରୀମନ୍ଦିରକୁ ଯାଇ ଆନନ୍ଦ ବଜାରରୁ ବୋଝିଆଙ୍କ ମାଧ୍ୟମରେ ମହାପ୍ରସାଦ ଆଣି ଭକ୍ତଙ୍କୁ ଦେବେ ବୋଲି ପ୍ରସ୍ତାବ ଦିଆଯାଇଛି।
