କୋକସରା,୧୫।୧୨(ଦୁଷ୍ମନ୍ତ କୁମାର ପାଟ୍ଟଯୋଶୀ): କଳାହାଣ୍ଡି ଜିଲା ଧର୍ମଗଡ଼ ରେଞ୍ଜ ଅଧୀନ କୋକସରା ବ୍ଲକ ଆମପାଣି ଫରେଷ୍ଟ ସେକ୍ସନ ସାହାଜଖୋଲ ଜଙ୍ଗଲ ନିକଟବର୍ତ୍ତୀ ଅଞ୍ଚଳରେ ଭାଲୁ ଉପଦ୍ରବ ବୃଦ୍ଧି ପାଉଛି। ଗାଁ ଜନବସତି ଅଞ୍ଚଳକୁ ଅନେକ ସମୟରେ ଖାଦ୍ୟ ଅନ୍ବେଷଣରେ ଆସୁଥିବା ବେଳେ ଭାଲୁ ହାବୁଡ଼ରେ ପଡି ଅନେକ ଧନ ଜୀବନ ଯାଉଛି। ଗତ କିଛି ମାସ ମଧ୍ୟରେ ବରାଡଙ୍ଗା ପଞ୍ଚାୟତର ୨ଜଣ ଭାଲୁ ଆକ୍ରମଣରେ ମୃତ୍ୟୁମୁଖରେ ପଡିଥିବା ବେଳେ ଅନେକ ଲୋକ ଆହତ ହୋଇଛନ୍ତି। ଜଙ୍ଗଲ ନିକଟବର୍ତ୍ତୀ ବରାଡଙ୍ଗା, ପାତ୍ରବସା, କନ୍ଦାଗଡ଼, ନୂଆଗାଁ, ଝୁଲେନବର, ଆମପାଣି ଘାଟି ଅଞ୍ଚଳରେ ଥିବା ଗ୍ରାମବାସୀଙ୍କୁ ସତର୍କ ଓ ସଚେତନ କରିବାକୁ ଆମପାଣି ଫରେଷ୍ଟ ପକ୍ଷରୁ ବିଭିନ୍ନ ଜନବସତି ସ୍ଥାନରେ ବୋର୍ଡ ଲଗାଇ ସୁଚିତ କରାଯାଇଛି। ଆମପାଣି ଫରେଷ୍ଟ ଗାର୍ଡ ନାରାୟଣ ନାଗ, ମହେଶ ମହାପାତ୍ର ଓ ପାରା କର୍ମଚାରୀମାନେ ବିଭିନ୍ନ ସ୍ଥାନରେ ସତର୍କ ଫଳକ ଲଗାଇ ଲୋକଙ୍କୁ ସଚେତନ କରିଛନ୍ତି।