ଯାଞ୍ଚ ଶେଷ ହେବା ପର୍ଯ୍ୟନ୍ତ ଧୈର୍ଯ୍ୟ ଧରନ୍ତୁ କୁସ୍ତିଯୋଦ୍ଧା: ଅନୁରାଗ ଠାକୁର…

ନୂଆଦିଲ୍ଲୀ,୧।୬ : କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର ବିରୋଧୀ କୁସ୍ତିଯୋଦ୍ଧାମାନଙ୍କୁ ଧୈର୍ଯ୍ୟ ଧରିବାକୁ ଏବଂ ପୂର୍ବତନ ରେସଲିଂ ଫେଡେରେଶନ ଅଫ ଇଣ୍ଡିଆର ମୁଖ୍ୟ ବ୍ରିଜଭୂଷଣ ଶରଣ ସିଂଙ୍କ ବିରୋଧରେ ଚାଲିଥିବା ଅଭିଯୋଗର ତଦନ୍ତ ଉପରେ ବିଶ୍ୱାସ କରିବାକୁ କହିଛନ୍ତି। ସେ କହିଛନ୍ତି ବର୍ତ୍ତମାନ ପର୍ଯ୍ୟନ୍ତ କେବଳ କୁସ୍ତିଯୋଦ୍ଧାଙ୍କ ଅନୁରୋଧ କ୍ରମେ ସମସ୍ତ ପଦକ୍ଷେପ ନିଆଯାଇଛି। ଏଭଳି ପରିସ୍ଥିତିରେ କୁସ୍ତିଯୋଦ୍ଧାମାନେ ଯାଞ୍ଚ ଶେଷ ହେବା ପର୍ଯ୍ୟନ୍ତ ଅପେକ୍ଷା କରିବା ଉଚିତ। ଭାରତର ନିୟମ ସମସ୍ତଙ୍କ ପାଇଁ ସମାନ। ପ୍ରକୃତରେ, ରେସଲିଂ ଫେଡେରେଶନ ଅଫ ଇଣ୍ଡିଆର ମୁଖ୍ୟ ବ୍ରିଜ ଭୂଷଣ ଶରଣ ସିଂଙ୍କ ବିରୋଧରେ ସରକାର ଆରମ୍ଭ କରିଥିବା ପୋଲିସର ତଦନ୍ତକୁ ବିଶ୍ୱାସ କରିବାକୁ ପ୍ରତିଶ୍ରୁତି ଦେବା ସତ୍ତ୍ୱେ ଅନେକ କୁସ୍ତିଯୋଦ୍ଧା ବିରୋଧ ପ୍ରଦର୍ଶନ ଜାରି ରଖିଛନ୍ତି। ଏହି କୁସ୍ତିଯୋଦ୍ଧାମାନେ ଏପ୍ରିଲ ୨୩ ତାରିଖରୁ ଜନ୍ତର ମନ୍ତରରେ ବିରୋଧ କରି ବ୍ରିଜ ଭୂଷଣଙ୍କୁ ଗିରଫ କରିବାକୁ ଦାବି କରିଥିଲେ।

ଅନୁରାଗ ଠାକୁର କହିଛନ୍ତି,ଆମେ ଏହି ପ୍ରସଙ୍ଗକୁ ଅତି ସମ୍ବେଦନଶୀଳ ଭାବରେ ଗ୍ରହଣ କରୁଛୁ। ଖେଳାଳିଙ୍କ ଦାବି ଏକ କମିଟି ଗଠନ କରିବା। ଆମେ ଏହା ଗଠନ କରିଛୁ। ଦିଲ୍ଲୀ ପୋଲିସରେ ଏଫଆଇଆର ପଞ୍ଜିକରଣ କରିବାକୁ ଚାହୁଁଥିଲୁ, ତାହା ମଧ୍ୟ ଘଟିଛି। ଖେଳାଳି ସୁପ୍ରିମକୋର୍ଟ ଯାଇଥିଲେ କୋର୍ଟ, ସେମାନଙ୍କୁ ମାଜିଷ୍ଟ୍ରେଟଙ୍କ କୋର୍ଟକୁ ଯିବାକୁ କହିଥିଲେ। ସେମାନେ ରେସଲିଂ ଫେଡେରେଶନ ଅଫ ଇଣ୍ଡିଆର ଅଧିକାରୀମାନଙ୍କୁ କାମ କରିବାକୁ ଅନୁମତି ଦେବାକୁ ଚାହୁଁ ନ ଥିଲେ, ଆମେ ମଧ୍ୟ ଏହାକୁ ଗ୍ରହଣ କରିଥିଲୁ। ବର୍ତ୍ତମାନ ବିରୋଧୀ କୁସ୍ତିଯୋଦ୍ଧାମାନେ ଯାହା କହିଛନ୍ତି ତାହା ଗ୍ରହଣ କରିଛୁ।

ବର୍ତ୍ତମାନ ଏହି ପ୍ରସଙ୍ଗରେ ଗଠିତ କମିଟି ମଧ୍ୟ ତଦନ୍ତ କରୁଛି। ଏଠାରେ ଦିଲ୍ଲୀ ପୋଲିସ ମଧ୍ୟ ମାମଲାର ତଦନ୍ତରେ ନିୟୋଜିତ ଅଛନ୍ତି। ଖେଳାଳିମାନେ ଯାହା କହିଛନ୍ତି, ତାହା ଘଟିଛି । ମୁଁ କହିବାକୁ ଚାହେଁ ଯଦି ଦେଶର କୌଣସି ନାଗରିକଙ୍କଠାରୁ ଏପରି ଅଭିଯୋଗ ଆସେ ତେବେ ପୋଲିସ ଏହାର ତଦନ୍ତ କରିବ। ପୋଲିସର ତଦନ୍ତ ପରେ ହିଁ କୌଣସି କାର୍ଯ୍ୟାନୁଷ୍ଠାନ ନିଆଯାଏ। ଏହି ମାମଲାରେ ମଧ୍ୟ ସମ୍ପୂର୍ଣ୍ଣ ଗମ୍ଭୀରତାର ସହ ଅନୁସନ୍ଧାନ କରାଯାଉଛି। ଅନେକ ଲୋକଙ୍କ ବିବୃତ୍ତି ରେକର୍ଡ କରାଯାଇଛି। ଯେତେବେଳେ ପୋଲିସ ଏହି ମାମଲାରେ ଚାର୍ଜଶିଟ ଦାଖଲ କରିବ, ସେତେବେଳେ ମଧ୍ୟ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଆମ ପାଇଁ ଉଭୟ କ୍ରୀଡ଼ାବିତ ଏବଂ ଖେଳାଳି ଗୁରୁତ୍ୱପୂର୍ଣ୍ଣ ।