ଜଗତର ନାଥ ଲୀଳାମୟଙ୍କ ଆଶୀର୍ବାଦରୁ ହିଁ ମୁଁ ଗତ ୪୫ ବର୍ଷ ଧରି ଚୂନରା ସେବକ କାମ ଠିକ୍ ଭାବରେ ତୁଲାଇ ଆସୁଛି। କେବଳ ପତାକା ବନ୍ଧା କାମ ନୁହେଁ, ବିବାହ କରି ଶାଢ଼ି ବନ୍ଧାଇଲା ପରେ ଗରୁଡ଼ଙ୍କୁ ସେବା, ରତ୍ନ ସିଂହାସନରେ ଚାନ୍ଦୁଆ ବନ୍ଧା, ପ୍ରତ୍ୟେକ ଏକାଦଶୀରେ ମହାଦୀପ ଜାଳିବା, ମାର୍ଗଶୀର ଦେବ ଦୀପାବଳିରେ ମହାପ୍ରଭୁଙ୍କ ଶ୍ରାଦ୍ଧ ଉପଲକ୍ଷେ ତିନି ଦେଉଳରେ ଦୀପ ଜାଳିବା କାର୍ଯ୍ୟ ଚୂନରା ସେବକଙ୍କ ଦ୍ୱାରା ସମ୍ପନ୍ନ ହୋଇଥାଏ। ପତାକା ବାନ୍ଧିବାର ଏକ ନିର୍ଦ୍ଦିଷ୍ଟ ସମୟ ନିର୍ଘଣ୍ଟ ରହିଛି। ପ୍ରତିଦିନ ଅପରାହ୍ନ ୫ଟାରେ ହିଁ ପତାକା ବନ୍ଧା କାର୍ଯ୍ୟ ହୁଏ। ପୂର୍ବରୁ ଏହାର କୌଣସି ନିର୍ଦ୍ଦିଷ୍ଟ ସମୟ ନ ଥିଲା। କିନ୍ତୁ ଏବେ ସ୍ଥିରୀକୃତ ସମୟକୁ ଅନୁସରଣ କରିବାକୁ ପଡୁଛି। ପ୍ରତ୍ୟେକ ଦିନ ଭକ୍ତମାନେ ବାନା ବାନ୍ଧିବାକୁ ମାନସିକ କରିଥାଆନ୍ତି। ସେମାନେ ବାନାଗୁଡ଼ିକୁ ଆଣି ମନ୍ଦିର ଶାଖା କାର୍ଯ୍ୟାଳୟରେ ଡିପୋଜିଟ୍ କରନ୍ତି। ତା’ପରେ ଜଣେ ପିଲା ଦ୍ୱାରା ଲଟେରି କାମ ସମ୍ପାଦିତ ହୁଏ। ପ୍ରଥମ ନମ୍ବରରେ ଉଠିଥିବା ୧୪ ହାତିଆ ବାନାକୁ ହିଁ ପ୍ରଥମେ ବନ୍ଧାଯାଏ। ପ୍ରତିଦିନ କେବଳ ଗୋଟିଏ ୧୪ ହାତିଆ ମୁଖ୍ୟ ବାନା ବନ୍ଧାଯାଇଥାଏ। ବାନା ବାନ୍ଧିବା ପୂର୍ବରୁ ଘରକୁ ଯାଇ ସ୍ନାନକରୁ। ତା’ପରେ ମଠା ପାଲଟି, ମୁକୁଟା ପିନ୍ଧି, ତୁଳସୀ ମାଳି ପିନ୍ଧି ଶୁଚିମନ୍ତ ଭାବରେ ପତାକା ବାନ୍ଧିବାକୁ ଆସିଥାଉ। ପ୍ରତ୍ୟେକ ଦିନ ମହାପ୍ରଭୁଙ୍କର ଏହି କାମ ମୁଁ ନିରବଚ୍ଛିନ୍ନ ଭାବରେ କରିଆସୁଛୁ। କୌଣସି ପ୍ରକାର ଝଡ଼ଝଞ୍ଜାକୁ ଖାତିର ନ କରି ଏହି କାମ ଚାଲିଛି। ଏହାଠାରୁ ଆଉ ବଡ଼ ଅନୁଭୂତି କିଛି ନାହିଁ।