ନୂଆପଡ଼ା,୨୧।୧୨(ମକାରୁ ବେମାଲ): ନୂଆପଡ଼ା ସଦର ମହକୁମା ୱାର୍ଡ଼ ନଂ. ୧୩ ମହୁଲଭଟା ଗାଁର ଏକ କୂଅରୁ ଗୁରୁବାର ଏକ ଭାଲୁର ମୃତଦେହ ଜବତ କରାଯାଇଛି। ସୂଚନା ମୁତାବଳ ମହୁଲଭଟା ଗ୍ରାମର ମୋହନ ରଣାଙ୍କ ବିଲରେ ଥିବା କୂଅ ଭିତରେ ଭାଲୁ ମରିପଡିଥିବା ପରିବାର ଲୋକେ ଦେଖି ବନ ବିଭାଗକୁ ଖବର ଦେଇଥିଲେ। ନୂଆପଡା ସଦର ରେଞ୍ଜର ଅଲୋକ ମାଝି, ଫରେଷ୍ଟର ଖଗେଶ୍ବର ମାଝି ପ୍ରମୁଖ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ରେଞ୍ଜ କାର୍ଯ୍ୟାଳୟକୁ ଆଣିଥିଲେ। ସେଠାରେ ଶବ ବ୍ୟବଚ୍ଛେଦ କରାଯାଇଥିଲା। ରେଞ୍ଜ କାର୍ଯ୍ୟାଳୟ ସୂତ୍ରରୁ ମିଳିଥିବା ଖବର ଅନୁଯାୟୀ ଏହା ଏକ ମାଇଁ ଭାଲୁ ଏବଂ ବୟସ ୨୦ ବର୍ଷ ଉପରେ ହେବ ବୋଲି ବିଭାଗ ଅନୁମାନ କରିଛି। ଭାଲୁ ବୃଦ୍ଧାବସ୍ଥାରେ ଥିବାରୁ ଅଧିକ ଚାଲି ପାରୁ ନ ଥିଲା। ନିକଟସ୍ଥ ପିଜୁଳି ଗଛରେ ଚଢିଥିବା ବେଳେ କୂଅରେ ପଡିଯାଇଥିଲା। ଅତ୍ୟଧିକ ଶୀତ କାରଣରୁ ଭାଲୁଟିର ମୃତ୍ୟୁ ହୋଇଥାଇପାରେ ବୋଲି ଜଣାଯାଇଛି।
ବନବିଭାଗ ଏସ୍ସିଏଫ ମହମ୍ମଦ ସାଲେମ ପହଞ୍ଚି ଘଟଣା ସମ୍ପର୍କରେ ଅନୁଧ୍ୟାନ କରୁଛନ୍ତି। ପ୍ରକୃତରେ ଭାଲୁ ନିଜେ କୁଅରେ ପଡ଼ି ମରି ଯାଇଛି, କିଏ ମାରି ଫିଙ୍ଗି ଦେଇଛନ୍ତି, ତଦନ୍ତ ପରେ ଜଣାପଡ଼ିବ ବୋଲି ବିଭାଗ ପକ୍ଷରୁ ସୂଚନା ମିଳିଛି।
