ଆନନ୍ଦପୁର,୧୧ା୫(ଉମେଶ ଚନ୍ଦ୍ର ପାଢ଼ୀ/ସୁଶାନ୍ତ କୁମାର ସାହ): କେନ୍ଦୁଝର ଜିଲା ଆନନ୍ଦପୁରର ବୈତରଣୀ ସେତୁ ବିପଦସଙ୍କୁଳ ଅବସ୍ଥାରେ ରହିଛି। ପୂର୍ବରୁ ସେତୁର ୫ ନଂ. ସ୍ପାନ୍ ବେରିଂ ଖସିଥିଲା। ଏବେ ପୁଣି ୭ ନଂ. ବେରିଂ ଖସିବାରୁ ଭାରିଯାନ ଚଳାଚଳ ଉପରେ ରୋକ ଲାଗିଛି। କେବେଳ ବାଇକ୍ ଓ ଚାରିଚକିଆ ଯାନକୁ ଅନୁମତି ମିଳିଛି। ସେତୁର ସ୍ଥାୟୀ ମରାମତି ହେଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ଉକ୍ତ ସେତୁ ଯାଜପୁର, କେନ୍ଦୁଝର, ଭଦ୍ରକ, ମୟୂରଭଞ୍ଜକୁ ସଂଯୋଗ କରିଛି। ଚଳିତ ବର୍ଷ ସେତୁର ୫ ନଂ. ସ୍ପାନ୍ ବେରିଂ ଦବିଯାଇଥିବା ବେଳେ ପୂର୍ତ୍ତ ବିଭାଗ ପକ୍ଷରୁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ଏହାର ମରାମତି କରାଯାଇଥିଲା। କିନ୍ତୁ ଶୁକ୍ରବାର ସକାଳ ୮ ଘଟିକା ସମୟ ପୁନର୍ବାର ବ୍ରିଜ୍ର ୭ ନଂ. ସ୍ପାନ୍ର ବେରିଂ ଖସିଯାଇଥିବା ଦେଖିବାକୁ ମିଳିଥିଲା। ପୂର୍ତ୍ତ ବିଭାଗ ଓ ଆନନ୍ଦପୁର, ଘସିପୁରା ପୋଲିସ ପହଞ୍ଚି ଉଭୟ ଘସିପୁରା ଓ ଆନନ୍ଦପୁର ବ୍ରିଜ ପ୍ରବେଶ ସ୍ଥଳକୁ ବ୍ୟାରିକେଡ୍ ଦେଇ ଭାରିଯାନ ଚଳାଚଳ ସମ୍ପୂର୍ଣ୍ଣ ବନ୍ଦ କରାଯାଇଥିଲା।
ପୂର୍ତ୍ତ ବିଭାଗର ସହକାରୀ ଯନ୍ତ୍ରୀ କେଳୁଚରଣ ଦଳେଇଙ୍କ କହିବା ଅନୁଯାୟୀ, ଚଳିତ ବର୍ଷ ୫ ନଂ. ସ୍ପାନ ବେରିଂ ଖସିଯାଇଥିଲା। ତାହା ମରାମତି ପରେ ଯାତାୟାତ ସ୍ବାଭାବିକ ଚାଲିଥିଲା। ଏଥର ୭ ନଂ. ସ୍ପାନ୍ ବେରିଂ ଖସି ଯାଇଛି। ବାହାରୁ ଟେକ୍ନିକାଲ ଟିମ୍ ଆସି ପହଞ୍ଚତ୍ବା ପରେ ୧୫ ଦିନ ମଧ୍ୟରେ ମରାମତି କାର୍ଯ୍ୟ ଶେଷ ହେବ। ଏ ନେଇ ଭାରିଯାନ ଚଳାଚଳ ସମ୍ପୂର୍ଣ୍ଣ ବନ୍ଦ କରାଯିବା ପାଇଁ ନିର୍ଦ୍ଦେଶନାମା ଜାରି ହୋଇଛି। ଜନସାଧାରଣଙ୍କ ସହଯୋଗ ପାଇଁ ନିବେଦନ କରିଛନ୍ତି।