ଚଣ୍ଡିଖୋଲ,୨୩ା୫(ପ୍ରଦୀପ୍ତ କୁମାର ପୃଷ୍ଟି): ଯାଜପୁର ଜିଲା ବାଲିଚନ୍ଦ୍ରପୁର ଥାନା ଅନ୍ତର୍ଗତ ମଝିପଡ଼ା ଗ୍ରାମରେ ନିର୍ବାଚନୀ ହିଂସା ଦେଖିବାକୁ ମିଳିଛି। ବୁଧବାର ମଝିପଡ଼ା ଗ୍ରାମ ମିଶନ ଶକ୍ତି ସଂଘର ମହିଳା ଶକୁନ୍ତଳା ବେହେରା ବିଜେଡି ପୁସିଂ କାର୍ଡ ଧରି ଯାଉଥିବାବେଳେ ତାଙ୍କୁ ମାଡ଼ ମରାଯାଇଛି। ସେହି ଗ୍ରାମର କେତେଜଣ ଭାଜପା କର୍ମୀ ତାଙ୍କୁ ଅଟକାଇ ଏକ ଘରେ ପୁରାଇ ମାଡ଼ ମାରିଛନ୍ତି। ଏନେଇ ଥାନାରେ ଅଭିଯୋଗ ହେବାପରେ ପୋଲିସ ପହଞ୍ଚି ଶକୁନ୍ତଳାଙ୍କୁ ଉଦ୍ଧାର କରି ଘଟଣାର ତଦନ୍ତ ଚଳାଇଛି।
ଅଭିଯୋଗ ଅନୁଯାୟୀ, ଶକୁନ୍ତଳା ପୁସିଂ କାର୍ଡ ଧରି ଗ୍ରାମରେ ଚାଲିଚାଲି ଯାଉଥିବାବେଳେ ତାଙ୍କୁ ସେହି ଗ୍ରାମର ବିକ୍ରମ ବଳ ଓ କୁମାର ରଞ୍ଜନ ବଳ ଅଟକାଇ କାହିଁକି ଗ୍ରାମରେ ମହିଳାମାନଙ୍କୁ ପୁସିଂ କାର୍ଡ ବାଣ୍ଟିବାକୁ ଯାଉଛ କହି ଅଟକାଇଥିଲେ। ଏହାପରେ ଗ୍ରାମର ବିଶ୍ୱଜିତ ବଳ, ବିଷ୍ଣୁପ୍ରସାଦ ବଳ ପହଞ୍ଚି ଶକୁନ୍ତଳାଙ୍କୁ ଗାଳିଗୁଲଜ କରିବା ସହ ବିଷ୍ଣୁଙ୍କ ଏକ ଘରେ ପୁରାଇ ବାହାରୁ ତାଲା ପକାଇ ଦେଇଥିଲେ। ପରେ ତାଙ୍କୁ ମାଡ଼ ମାରିଥିଲେ। ଗ୍ରାମର ଟୁନା ବଳ ଓ ବିଜୟ ବଳ ଶକୁନ୍ତଳାଙ୍କୁ ଜୀବନରୁ ମାରିଦେବାକୁ ଧମକ ଦେଇଥିଲେ। ଏହି ଘଟଣା ଦେଖି ସ୍ଥାନୀୟ ଲୋକେ ବାଲିଚନ୍ଦ୍ରପୁର ପୋଲିସକୁ ଫୋନ କରି ଜଣାଇଥିଲେ। ପୋଲିସ ଆସି ବନ୍ଦ ଘରୁ ଶକୁନ୍ତଳାଙ୍କୁ ବାହାର କରି ମେଡିକାଲ ପଠାଇଥିଲା। ଖବର ପାଇ ମିଶନ ଶକ୍ତି ମହାସଂଘ ସଭାନେତ୍ରୀ ପ୍ରମିଳା ଜେନାଙ୍କ ନେତୃତ୍ୱରେ ଶତାଧିକ ମହିଳା ବାଲିଚନ୍ଦ୍ରପୁର ଥାନାକୁ ଆସି ଗଣ୍ଡଗୋଳକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ। ଥାନା ଅଧିକାରୀ ପ୍ରମୋଦିନୀ ସାହୁ ମାମଲା ରୁଜୁ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରତିଶ୍ରୁତି ଦେବାପରେ ମହିଳାମାନେ ଫେରି ଯାଇଥିଲେ। ଏନେଇ ଥାନାରେ ଏକ ମାମଲା ନଂ.୨୬୧ା୨୪ ରୁଜୁ ହୋଇଛି। ଅନ୍ୟପକ୍ଷରେ ଏନେଇ ବିକ୍ରମ ବଳଙ୍କ ସ୍ତ୍ରୀ ମଧୁସ୍ମିତା ବଳ ପାଲଟା ଅଭିଯୋଗ କରିଛନ୍ତି। ତାଙ୍କ ଅଭିଯୋଗ ଆଧାରରେ ପୋଲିସ ନଂ.୨୬୨ା୨୪ରେ ଏକ ମାମଲା ରୁଜୁ କରିଛି।