ସୋନପୁର/ବିନିକା,୧୭।୧୦(ମୃତ୍ୟୁଞ୍ଜୟ ଶତପଥୀ/ ରାମଗୋପାଳ ବାଘ): ଚୋରି ଅଭିଯୋଗରେ ୩ ନାବାଳକଙ୍କୁ ଗ୍ରାମବାସୀ ମଙ୍ଗଳବାର ରାତି ସାରା କ୍ଲବ୍ ଘରେ ରଖିଲେ। ସୂଚନା ପାଇ ବୁଧବାର ପୋଲିସ ଅଭିଯୁକ୍ତମାନଙ୍କୁ ନିଜ ହେପାଜତକୁ ଆଣିବା ସମୟରେ ତୁମୁଳକାଣ୍ଡ ଘଟିଛି। ବିଳମ୍ବରେ ପୋଲିସ ପହଞ୍ଚତ୍ବାରୁ ଉତ୍ତ୍ୟକ୍ତ ଗ୍ରାମବାସୀ ପୋଲିସ ଟିମ୍କୁ ମାଡ଼ ମାରିବା ସହ ପୋଲିସ ଗାଡ଼ିକୁ ଭଙ୍ଗାରୁଜା କରିଛନ୍ତି। ସୁବର୍ଣ୍ଣପୁର ଜିଲା ବିନିକା ଥାନା ପାପି(ଆନନ୍ଦନଗର)ରେ ଏହି ଘଟଣା ଘଟିଛି। ଆନନ୍ଦନଗର ଅଞ୍ଚଳର କେତେଜଣ ଚାଷୀ ମଙ୍ଗଳବାର ରାତିରେ ସିଂଘିଯୁବା-ଖଇରମାଳ ରାସ୍ତା ପାର୍ଶ୍ୱ ଧାନବିଲରେ ପାଣି ମଡ଼ାଉଥିଲେ। ଏହି ସମୟରେ ଚାଷକାମରେ ନିୟୋଜିତ ଜଣେ ଚାଷୀଙ୍କ ନିକଟରୁ ରାମପୁର ଥାନା ଅଞ୍ଚଳର ୩ଜଣ ନାବାଳକ ମୋବାଇଲ ଓ ବାଇକ୍ ଲୁଟ୍ ଉଦ୍ୟମ କରିଥିଲେ। ସମ୍ପୃକ୍ତ ଚାଷୀ ପାଟି କରିବାରୁ ନିକଟରେ ଥିବା ଅନ୍ୟ ଚାଷୀମାନେ ଦୌଡ଼ି ଆସିଥିଲେ। ଫଳରେ ଅଭିଯୁକ୍ତମାନେ ଭୟରେ ଆନନ୍ଦନଗର କ୍ଲବ୍ ଘରେ ଲୁଚିଯାଇଥିଲେ। ସେମାନଙ୍କୁ ଚାଷୀ ଓ ଗ୍ରାମବାସୀ କାବୁକରିବା ସହ କ୍ଲବ୍ ଘରେ ତାଲା ପକାଇ ବିନିକା ଥାନା ପୋଲିସକୁ ଖବର ଦେଇଥିଲେ। କିନ୍ତୁ ପୋଲିସ ରାତିରେ ଘଟଣାସ୍ଥଳକୁ ନ ଯାଇ ବୁଧବାର ସକାଳେ ଯାଇଥିଲା। ପୋଲିସ ବିଳମ୍ବରେ ପହଞ୍ଚତ୍ ଲୁଟେରାମାନଙ୍କୁ ନିଜ ହେପାଜତକୁ ନେବାକୁ ଉଦ୍ୟମ କରୁଥିବାବେଳେ ଗ୍ରାମବାସୀ ବିରୋଧ କରିଥିଲେ। ଘଟଣାସ୍ଥଳର ସ୍ଥିତି ଦେଖି ବିନିକା ପୋଲିସ ରାମପୁର ପୋଲିସର ସହାୟତା ନେବା ସହ କ୍ଲବଘର ସମ୍ମୁଖରେ ଏକ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରିଥିଲା। ଗ୍ରାମବାସୀଙ୍କ ସହ ଆଲୋଚନା ଚାଲିଥିବା ବେଳେ ପୋଲିସ ଅଭିଯୁକ୍ତମାନଙ୍କୁ କ୍ଳବ୍ ଘରୁ ବାହାର କରିଥିଲେ। ଏଥିରେ ଗ୍ରାମବାସୀ ଉତ୍ତେଜିତ ହୋଇ ଅଭିଯୁକ୍ତଙ୍କ ସମେତ ପୋଲିସ ଟିମ୍ ଉପରେ ଆକ୍ରମଣ ଆରମ୍ଭ କରିଥିଲେ। ଏହି ଆକ୍ରମଣରେ ଏସ୍ଆଇ ସୁଜାତା ବୁଡେକ୍, ଏଏସ୍ଆଇ ତ୍ରିନାଥ ସାହୁ ଓ କନ୍ଷ୍ଟେବଲ ଗୋପୀନାଥ ସାହୁ ଆହତ ହୋଇଛନ୍ତି। ଉତ୍ତ୍ୟକ୍ତ ଲୋକଙ୍କ ଆକ୍ରମଣରେ ପୋଲିସ ଗାଡ଼ି ମଧ୍ୟ ଭାଙ୍ଗିଛି। ଏପରିକି ଲୋକେ ପୋଲିସ ଗାଡ଼ିର ଟାୟାରରୁ ପ୍ରେସର ଖୋଲି ଦେଇଥିଲେ। ପରେ ଅଧିକ ପୋଲିସ ଘଟଣାସ୍ଥଳରେ ପହଞ୍ଚତ୍ବା ପରେ ଅଭିଯୁକ୍ତଙ୍କୁ ନିଜ ହେପାଜତକୁ ଆଣିବାରେ ସକ୍ଷମ ହୋଇଛନ୍ତି।
ପ୍ରାଥମିକ ଚିକିତ୍ସା ପରେ ସେମାନଙ୍କୁ ବିନିକା ଥାନାରେ ରଖି ପଚରାଉଚରା କରାଯାଇଥିଲା। ଗ୍ରାମବାସୀଙ୍କ ଲିଖିତ ଅଭିଯୋଗ କ୍ରମେ ୩ ନାବାଳକଙ୍କ ନାମରେ ମାମଲା ରୁଜୁ ହୋଇଛି। ସେହିପରି ପୋଲିସ ଉପରେ ଆକ୍ରମଣ ଓ ଗାଡ଼ି ଭଙ୍ଗାରୁଜା ଅଭିଯୋଗରେ ଏସ୍ଆଇ ସୁଜାତା ବୁଡେକ୍ଙ୍କ ଲିଖିତ ଅଭିଯୋଗକ୍ରମେ ଗ୍ରାମର କେତେଜଣଙ୍କ ନାମରେ ଅନ୍ୟ ଏକ ମାମଲା(୩୫୭/୨୪)ରୁଜୁ ହୋଇଛି। ଏହି ଘଟଣାରେ ବିନିକା ପୋଲିସ ମୋଟ ୨୨ଜଣଙ୍କୁ ଗିରଫକରି କୋର୍ଟଚାଲାଣ କରିଛି। ଅନ୍ୟପକ୍ଷେ ସିଂଘିଯୁବା, ପାପି ଓ ଆନନ୍ଦନଗର ଅଞ୍ଚଳର ଶତାଧିକ ଲୋକ ବିନିକା ଥାନା ସମ୍ମୁଖରେ ଏକାଠି ହୋଇଛନ୍ତି। ଉତ୍ତରାଞ୍ଚଳ ଆଇଜି ହିମାଂଶୁ ଲାଲ ଥାନାରେ ପହଞ୍ଚତ୍ ଘଟଣା ସମ୍ପର୍କରେ ଅନୁଧ୍ୟାନ କରିଛନ୍ତି। ସୁବର୍ଣ୍ଣପୁର ଏସ୍ପି ରାମପ୍ରସାଦ ସାହୁ, ସୋନପୁର ଏସ୍ଡିପିଓ ପ୍ରତାପ ତ୍ରିପାଠୀ ଓ ଆଇଆଇସି ସାରଙ୍ଗଧର ପାଣିଗ୍ରାହୀ ପୋଲିସ ଟିମ୍କୁ ନେଇ ଘଟଣାସ୍ଥଳରେ ତଦନ୍ତ ଆରମ୍ଭ କରିଛନ୍ତି।
