ସମ୍ବଲପୁର,୩୦ା୯(ବ୍ୟୁରୋ): ସମ୍ବଲପୁର ଜିଲା ଭାଜପା ସଭାପତି ଗିରୀଶ ପଟେଲଙ୍କ ନେତୃତ୍ୱରେ ଭାଜପା କର୍ମକର୍ତ୍ତା ଭୁବନେଶ୍ୱରଠାରେ ଆୟୋଜିତ କର୍ମୀ ସମ୍ମିଳନୀରେ ଯୋଗଦେବାକୁ ଯାଉଥିଲେ। ଆଠଗଡ଼ ଟୋଲଗେଟରେ ୨ଜଣ ଭାଜପା ନେତାଙ୍କୁ ମାରପିଟ ହୋଇଥିବା ଜଣାପଡ଼ିଛି। ସେମାନଙ୍କ ମଧ୍ୟରେ ଜଣେ ନାକଟିଦେଉଳ ବ୍ଲକ ଓ ଅନ୍ୟ ଜଣେ ଯୁଯୁମୁରା ବ୍ଲକର ନେତା ଅଟନ୍ତି।
ମିଳିଥିବା ସୂଚନା ମୁତାବକ ନାକଟିଦେଉଳରୁ ନେତା ଓ କର୍ମକର୍ତ୍ତା ବସ୍ ଯୋଗେ ଭୁବନେଶ୍ୱର ଯାଉଥିଲେ। ଆଠଗଡ଼ ଟୋଲଗେଟଠାରେ ସେମାନେ ଟିକସ ଦେବାକୁ ମନା କରିଥିଲେ। ଏହି ସମୟରେ ଜଣେ କେନ୍ଦ୍ର ମନ୍ତ୍ରୀଙ୍କ ନାମ ନେଇ ଟୋଲ କର୍ମଚାରୀଙ୍କୁ ଧମକଚମକ ଦେଇଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ପରେ ସୁନ୍ଦରଗଡ଼ ଜିଲାର ଏକ ବସ୍ ମଧ୍ୟ ଅଟକିଥିଲା। ଦୁଇ ବସ୍ରେ ଥିବା କେତେଜଣ ଭାଜପା କର୍ମକର୍ତ୍ତା ଓ ଟୋଲ କର୍ମଚାରୀଙ୍କ ମଧ୍ୟରେ ଗଣ୍ଡଗୋଳ ହୋଇ ମାରପିଟ ହୋଇଥିଲା। ଗଣ୍ଡଗୋଳ ଖବର ପାଇ ପ୍ରାୟ ୫ଟି ଗାଡ଼ିରେ ଟୋଲ ଗେଟ କର୍ମଚାରୀ ପହଞ୍ଚିଥିଲେ। ସେଠାରେ ଉପସ୍ଥିତ ଯୁଯୁମୁରା ଅଞ୍ଚଳର ଜଣେ ନେତାଙ୍କୁ ସଂଘବଦ୍ଧ ଭାବେ ମାଡ଼ ମାରିଥିଲେ। ହେଲେ ଆଗଧାଡିର କେତେଜଣ ନେତା ହସ୍ତକ୍ଷେପ କରିବା ପରେ ପରିସ୍ଥିତି ଶାନ୍ତ ପଡ଼ିଥିଲା। ଏହି ସମ୍ପର୍କରେ ଭାଜପା ଜିଲା ସଭାପତି ପଟେଲ କହିଛନ୍ତି ଯେ, ଟୋଲଗେଟରେ ଗଣ୍ଡଗୋଳ ହୋଇଥିବା ଘଟଣା ସତ। ଭାଜପା କର୍ମୀମାନେ ଟୋଲଗେଟ କର୍ମଚାରୀଙ୍କୁ ଟଙ୍କା ଦେଇଥିଲେ। ହେଲେ କର୍ମଚାରୀ ରସିଦ ଦେବାକୁ ମନା କରିଥିଲେ। ଓଲଟା ଗଣ୍ଡଗୋଳ କରି ହଇରାଣ ହରକତ କରିଥିଲେ। ସମ୍ବଲପୁର ଜିଲାରୁ ଆଶାନୁରୂପକ କର୍ମକର୍ତ୍ତା କାର୍ଯ୍ୟକ୍ରମରେ ଯୋଗଦେଇଥିବା ସେ କହିଥିଲେ।
