ରସୁଲପୁର,୧୯।୩(ଡି.ଏନ.ଏ.): କୁଆଖିଆ ଥାନା ଅନ୍ତର୍ଗତ ରସୁଲପୁର ପଞ୍ଚାୟତ ଖଣ୍ଡିତର ଗ୍ରାମରେ ଶୁକ୍ରବାର ରାତି ପ୍ରାୟ ସାଢ଼େ ୯ଟାରେ ପୂର୍ବ ଶତ୍ରୁତାକୁ କେନ୍ଦ୍ରକରି ୨ ପରିବାର ମଧ୍ୟରେ ଗଣ୍ଡଗୋଳ ଘଟିଛି। ଏଥିରେ ଗୋଟିଏ ପରିବାରର ସୁଶାନ୍ତ ପଣ୍ଡାଙ୍କ ବଡ଼ ଭାଇ ଅରୁଣ ପଣ୍ଡା ଓ ସମ୍ପର୍କୀୟ ଟିଟିଲ ଓରଫ୍ ଆଦିତ୍ୟ ନାରାୟଣ ପଣ୍ଡା ଗୁରୁତର ହୋଇ ସ୍ଥାନୀୟ ଡାକ୍ତରଖାନାରେ ଚିକିତ୍ସିତ ହୋଇଛନ୍ତି। ଏ ନେଇ ଉଭୟ ପକ୍ଷରୁ ଥାନାରେ ୨ଟି ଅଭିଯୋଗ ହୋଇଛି। ପୋଲିସ ନଂ.୯୧/୨୩ ଓ ୯୨/୨୩ରେ ଦୁଇଟି ମାମଲା ରୁଜୁ କରିଛି। ମାମଲା ନଂ.୯୧ ବଳରେ ଅମ୍ବିକା ପଣ୍ଡାଙ୍କ ପୁଅ ଅରମାନ ପଣ୍ଡା(୨୨) ଓ ମାମଲା ନଂ. ୯୨ ବଳରେ ଶୁଶାନ୍ତ ପଣ୍ଡାଙ୍କୁ ଗିରଫ କରାଯାଇ କୋର୍ଟଚାଲାଣ କରାଯାଇଛି।
ରାତିରେ ସୁଶାନ୍ତଙ୍କ କ୍ଷେତରୁ ପୋଟଳ ଚୋରି ହେଉଛି ବୋଲି ତାଙ୍କ ପାଖକୁ ଫୋନ ଆସିଥିଲା। ଏହା ଜାଣି ସୁଶାନ୍ତ ଓ ସମ୍ପର୍କୀୟ ଭାଇ ଟିଟିଲି ବିଲକୁ ଯାଇଥିଲେ। ପୋଟଳ କ୍ଷେତର ପ୍ରାୟ ୧୦୦ମିଟର ଦୂରରେ ଏକ ବାଇକ୍ ନମ୍ବର-ଓଡି-୦୪-ପି-୯୫୪୦ ଥୁଆ ହୋଇଥିଲା। ଉକ୍ତ ଗାଡ଼ିର ଫଟୋ ଉଠାଇବା ବେଳେ ବାଇକ ଚାଳକ ସଦାନନ୍ଦପୁରର ବୋଲି ପରିଚୟ ଦେଇଥିଲେ। ତେବେ ସେ ଏତେ ରାତିରେ ଏଠାକୁ କାହିଁକି ଆସିଛନ୍ତି ବୋଲି ସୁଶାନ୍ତ ପଚାରିବାରୁ ସେମାନଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏହି ସମୟରେ ମାରଣାସ୍ତ୍ର ଓ ଠେଙ୍ଗାବାଡି ରଖି ପ୍ରସ୍ତୁତ ଥିବା ଅମ୍ବିକା ଓ ତାଙ୍କ ପୁଅମାନେ ସୁଶାନ୍ତ ଏବଂ ଟିଟିଲିଙ୍କୁ ଆକ୍ରମଣ କରିଥିଲେ। ଏହି ଖବର ଜାଣି ସୁଶାନ୍ତଙ୍କ ବଡ଼ ଭାଇ ଘଟଣାସ୍ଥଳରେ ପହଞ୍ଚତ୍ବାରୁ ଅମ୍ବିକାଙ୍କ ପରିବାର ତାଙ୍କ ମୁଣ୍ଡକୁ ମାଡ଼ ମାରି ଫଟାଇ ଦେଇଥିଲେ। ଏହି ଗଣ୍ଡଗୋଳରେ ଅମ୍ବିକାଙ୍କ ହାତ ଭାଙ୍ଗି ଯାଇଥିବା ଜଣାଯାଇଛି।
ଏଠାକୁ ସଦାନନ୍ଦପୁରରୁ ଆସିଥିବା ପଲସର କାହାର ଓ ରାତିରେ କେଉଁ ପରିସ୍ଥିତିରେ ପୋଟଳ କ୍ଷେତ ନିକଟକୁ ଆସିଥିଲା। ପୋଟଳ ଚୋରି ସମ୍ପର୍କରେ ଆସିଥିବା ଫୋନ କାହାର ଓ କିଏ ସୁଶାନ୍ତଙ୍କୁ ଫୋନ କରିଥିଲା, ସେ ସବୁ ଦିଗକୁ ପୋଲିସ ତଦନ୍ତ ପରିସରଭୁକ୍ତ କରିପାରିଲେ ଘଟଣା ପଛର ଅସଲ ରହସ୍ୟ ବୁଝାପଡ଼ିବ। ତେବେ ବାଇକ୍ରେ ଆସିଥିବା ବ୍ୟକ୍ତି ଜଣକ ପରିବା ବ୍ୟବସାୟୀ ବୋଲି ଅଭିଯୋଗ ହେଉଛି। ଅମ୍ବିକାଙ୍କ ପରିବାର ସୁଶାନ୍ତଙ୍କ ପୋଟଳ କିଆରିରୁ ପୋଟଳ ଚୋରି କରି ବିକ୍ରି କରିବାକୁ ବ୍ୟବସାୟୀଙ୍କୁ ଡାକି ଥାଇପାରନ୍ତି ବୋଲି ସନ୍ଦେହ କରାଯାଉଛି। ତେବେ ପୋଲିସର ତଦନ୍ତ କେଉଁ ଦିଗକୁ ଯାଉଛି, ଆଉ ଘଟଣାର ପ୍ରକୃତ କାରଣ ଖୋଜି ବାହାର କରିବାରେ ପୋଲିସ କେତେ ସକ୍ଷମ ହେଉଛି ତାକୁ ଦେଖିବାକୁ ବାକି ରହିଲା। ା ପ୍ରକାଶଥାଉକି, ଜମିବାଡି ବିବାଦକୁ କେନ୍ଦ୍ରକରି ସୁଶାନ୍ତ ଓ ଅମ୍ବିକାଙ୍କ ପରିବାର ମଧ୍ୟରେ ପୂର୍ବରୁ ବିବାଦ ଲାଗି ଆସୁଛି।