ନିରାକାରପୁର,୯ା୧୨(ମାନସ ଚନ୍ଦ୍ର ପଟ୍ଟନାୟକ): ଏକ ହୋଟେଲ ସମ୍ମୁଖରେ ପାର୍କିଂକୁ ନେଇ ମାଡ଼ପିଟ୍ ହୋଇଛି। ଆନ୍ଧ୍ରପ୍ରଦେଶର ବିଶାଖାପାଟଣା ଥାନା ଶ୍ରୀନଗର ଗ୍ରାମ ଗଜୁଏକାର ଗୋପାଳ ପଟେଲ(୬0) ନାମକ ଜଣେ ବ୍ୟକ୍ତି ଜଙ୍କିଆ ଥାନାରେ ଏକ ଲିଖିତ ଅଭିଯୋଗ କରିଥିବା ବେଳେ ହୋଟେଲ ପକ୍ଷରୁ ମଧ୍ୟ ଥାନାରେ ଲିଖିତ ଅଭିଯୋଗ ହୋଇଛି।
ପଟେଲଙ୍କ ଅଭିଯୋଗ ଅନୁଯାୟୀ, ତାଙ୍କର ଜଣେ ସମ୍ପର୍କୀୟଙ୍କ ବାହାଘରରେ ସେମାନେ କଟକରୁ ଏପି-୩୭-ଟିଏ-୨୧୭୩ ନମ୍ବର ବିଶିଷ୍ଟ ଏକ ଘରୋଇ ବସ୍ରେ ଶୁକ୍ରବାର ରାତି ପ୍ରାୟ ସାଢ଼େ ୯ଟାରେ ଫେରୁଥିଲେ। ଫେରିବା ବାଟରେ ଖୋର୍ଦ୍ଧା ସଦର ଥାନା ଅଧିନସ୍ଥ ତୋଟାପଡ଼ା ଛକସ୍ଥିତ ଏକ ହୋଟେଲରେ ଖାଇବାକୁ ଯାଇଥିଲେ। ତେବେ ବସ୍ ପାର୍କିଂକୁ ନେଇ ହୋଟେଲ ମାଲିକଙ୍କ ସହ ତାଙ୍କର ଝଗଡ଼ା ହୋଇଥିଲା। ଝଗଡ଼ା ପରେ ସେମାନେ ସେଠାରୁ ଆସୁଥିବା ସମୟରେ ଜଙ୍କିଆ ଥାନା ଅଧିନସ୍ଥ ଟୋଲ୍ଗେଟ୍ ପାଖରେ ତୋଟାପଡ଼ାର କିଛି ଯୁବକ ଆସି ବସ୍ଟିକୁ ଅଟକାଇ ତାଙ୍କୁ ମାଡ଼ପିଟ୍ କରିଥିବା ନେଇ ଲିଖିତ ଅଭିଯୋଗ ହେବା ପରେ ଥାନା ପକ୍ଷରୁ ୪୪୬/୨୩ରେ ଏକ ମାମଲା ରୁଜୁ ହୋଇଛି। ସେହିପରି ହୋଟେଲ ପକ୍ଷରୁ ଖୋର୍ଦ୍ଧା ସଦର ଥାନାରେ ଏକ ମୋକଦ୍ଦମା ରୁଜୁ ହୋଇଛି। ତେବେ ବସ୍ ପକ୍ଷରୁ ୪ଜଣଙ୍କୁ ସଦର ଥାନାରେ ପୋଲିସ ଅଟକ ରଖିଥିବା ବେଳେ ଜଙ୍କିଆ ଥାନାରେ ଜଣଙ୍କୁ ଅଟକ ରଖିଛି ଏବଂ ଏ ବସ୍ରେ ଥିବା ଯାତ୍ରୀଙ୍କ ମାଡ଼ରେ ହୋଟେଲ ମାଲିକଙ୍କ ପୁଅ ଗୁରୁତର ହୋଇଛନ୍ତି ବୋଲି ଜଙ୍କିଆ ଥାନା ଅଧିକାରିଣୀ ପ୍ରଜ୍ଞା ଋତୁମ୍ଭରା କର ସୂଚନା ଦେଇଛନ୍ତି।